شقو-دا اۋىل تۇرعىنى اۋرۋحانادا بوقتاعانى ءۇشىن جاۋاپقا تارتىلدى.
اۋىل تۇرعىنى شەمونايحا اۋداندىق اۋرۋحاناسىنا اياعىنان جاراقات الىپ جۇگىنگەن. قابىلداۋ بولمەسىنە جەتكىزىلگەن ايەل باسقا ناۋقاستارمەن بىرگە تەكسەرۋگە كەزەك كۇتكەن. كۇتۋگە شىدامى جەتپەگەن تۇرعىن قوعامدىق ورىنداردا قولدانۋعا تىيىم سالىنعان سوزدەردى قولدانىپ، نارازىلىعىن ءبىلدىرىپتى. اۋرۋحانا قىزمەتكەرلەرى پوليسياعا جۇگىنۋگە ءماجبۇر بولعان، دەپ حابارلايدى Almaty-akshamy.kz Ulysmedia.kz-كە سىلتەمە جاساپ.
ايەلگە قارسى اكىمشىلىك ءىس قارالعان شەمونايحا اۋداندىق سوتىندا تۇرعىننىڭ قوعامدىق ورىنداعى بالاعات ءسوز ءۇشىن بۇعان دەيىن دە جاۋاپقا تارتىلعانى انىقتالدى. سوت وعان ءۇش تاۋلىككە اكىمشىلىك قاماۋعا الۋ جازاسىن تاعايىندادى.
ەسكە سالايىق، 6 ناۋرىزدان باستاپ اكىمشىلىك قۇقىقبۇزۋشىلىق تۋرالى كودەكسكە بالاعات سوزدەر ايتقانى ءۇشىن جازانى كۇشەيتەتىن تۇزەتۋلەر كۇشىنە ەندى. بۇدان بىلاي قوعامدىق ورىنداردا بوقتاعاندار 69 مىڭ تەڭگە ايىپپۇل (بۇرىن 17 250 تەڭگە بولعان) ارقالايدى نەمەسە 15 تاۋلىككە دەيىنگى مەرزىمگە قاماۋعا الىنادى. مۇنداي نورمالار ق ر اقبتك-نىڭ 434-بابىنا ەنگىزىلگەن.