بەدەلدى باعدارلاما 1986 جىلدان بەرى جۇمىس ىستەيدى جانە بۋندەستاگتا تاجىريبەدەن وتۋگە مۇمكىندىك بەرەدى.
نەمىس ساياساتىنىڭ «جۇرەگى» – بۋندەستاگتا تاعىلىمدامادان ءوتۋ – ەكىنىڭ بىرىنە بەرىلە بەرمەيتىن مۇمكىندىك. جوعارى ءبىلىم، ءتىل بىلۋدەن باسقا، ساياساتتانۋ سىرتتانى بولۋ – شارت. بيىل ىرىكتەۋگە الەمنىڭ 33 ەلىنەن 96 ادام قاتىستى، دەپ حابارلايدى Almaty-akshamy.kz 24.kz-كە سىلتەمە جاساپ.
ۇزدىكتەر قاتارىندا وتانداستارىمىز ۆيكتوريا پۋلنيكوۆا، سىمبات سەرىكوۆا جانە ناديرا مۇحامەدجان بار. قىزدارىمىز دەپۋتاتتار بيۋروسىندا نەمىس دەموكراتياسى ۇلگىسىمەن جاقىنىراق تانىسپاق.
«وسى گەرمانياداعى ساياسي ءومىردىڭ ءبىر ەرەكشەلىگى - دەپۋتاتتار تەك بەرليندە جۇمىس ىستەمەيدى، ولار تاعى دا سايلانعان ايماققا ءار اپتا سايىن ءجيى-جيى بارىپ تۇرادى جانە سول جەردە ازاماتتارمەن كەزدەسەدى. ياعني، ازاماتتار مەن سايلاۋشىلاردىڭ دەپۋتاتپەن بايلانىسى وتە تىعىز جانە كەز كەلگەن ۋاقىتتا سول ايماقتان ادامدار مىندا كەلە الادى جانە دەپۋتاتتارمەن كەزدەسە الادى. ۋاقىتىن بەلگىلەپ، بيۋروعا وزدەرى كىرە الادى. ياعني، گەرمانيانىڭ كەز كەلگەن ازاماتى نە ءۇشىن سايلاعانىن، كىمگە داۋىس بەرگەنىن ءوزى كورە الادى»، - دەيدى IPS باعدارلاماسىنىڭ ستيپەندياتى ناديرا مۇحامەدجان.
نەمىس پارلامەنتىندە 736 دەپۋتات جۇمىس ىستەيدى. رەسمي شارالارمەن قاتار جەرگىلىكتى تۇرعىندارمەن كەزدەسۋ ادەتكى جۇمىس جوسپارىنا ەنىپ كەتكەن. تاعىلىمداما اياسىندا ءار ستيپەنديات دەپۋتاتتىڭ بىرىنە بەكىتىلىپ، كەڭسەدە كومەكتەسەدى، ءتىپتى پلەنارلىق وتىرىستارعا قاتىسا الادى.
«ءبىرىنشى ايدا تەوريا، ياعني پارلامەنتتىڭ قالاي جۇمىس ىستەيتىنى تۋرالى ايتىلادى. مەنى ەڭ قاتتى تاڭ قالدىرعانى – كواليسيا، ياعني بۇل – 3 فراكسيادان تۇراتىن جانە ولاردىڭ باسىمدىقتارى ءارتۇرلى پارتيالاردان تۇراتىن باسقارۋشى كواليسيا. بۋندەستاگدا وپپوزيسيا دا بار. دەموكراتيانىڭ ەڭ ماڭىزدى نۇكتەسى، ولار ءبىر ۇستەلگە وتىرادى، ءتىپتى كەيبىر كەلىسپەۋشىلىك تۋىنداسا دا، ورتا تۇسىن تاۋىپ، كەلىسۋگە تىرىسادى»، - دەيدى IPS باعدارلاماسىنىڭ ستيپەندياتى ۆيكتوريا پۋلنيكوۆا.
تاعىلىمداماعا قاتىسۋشىلار جازدا دەپۋتاتتىڭ سايلاۋ وكرۋگىنە ساياحات جاساماق.
«تالقىلاۋلار بارىسىندا حالىق ءۇشىن ءتيىمدى ەتۋ تۋرالى وتە قىزۋ پىكىرتالاستار جۇرەدى. گەرمانيانىڭ ساياسي ءومىرىنىڭ ءبىر ەرەكشەلىگى، دەپۋتاتتار تەك بەرليندە عانا جۇمىس ىستەمەيدى. ولار ءوزى سايلانعان تۋعان وكرۋگىنە ءجيى بارادى. جەرگىلىكتى جۇرتپەن كەزدەسەدى. ياعني، دەپۋتات پەن سايلاۋشىلار اراسىنداعى بايلانىس وتە تىعىز»، - دەيدى IPS باعدارلاماسىنىڭ ستيپەندياتى سىمبات سەرىكوۆا.
ستيپەنديالىق باعدارلاما 5 ايعا سوزىلادى. تاعىلىمدامادان كەيىن وتانداستارىمىز ەلگە ورالىپ، تاجىريبەسىمەن ءبولىسۋدى جوسپارلاپ وتىر.