قوعامدىق ماڭىزعا يە ءپاتۋالار تالقىلاندى

بۇل قاتاردا «اسكەري بورىشتى وتەۋدىڭ ۇكىمى»، «شاشتى ترانسپلانتاسيالاۋدىڭ ۇكىمى» سياقتى تاقىرىپتار بار.

قمدب باسپا ءسوز قىزمەتىنىڭ مالىمەتىنە سايكەس، الماتى قالاسىنداعى ورتالىق مەشىتتە قمدب ءتوراعاسى، باس ءمۇفتي ناۋرىزباي قاجى تاعان ۇلىنىڭ توراعالىعىمەن ءوتىپ جاتقان عۇلامالار كەڭەسىنىڭ ءحححىىى ماجىلىسىندە قوعامدىق ماڭىزى بار ءپاتۋالاردىڭ ءماتىنى تالقىلاندى، دەپ حابارلايدى Almaty-akshamy.kz

اتاپ ايتقاندا، «اسكەري بورىشتى وتەۋدىڭ ۇكىمى»، «قاۋەسەت تاراتۋدىڭ ۇكىمى»، «مەملەكەت جانە جەكە تۇلعانىڭ مۇلكىنە قول سۇعۋدىڭ ۇكىمى»، «جانۋارلاردىڭ اعزاسىن ادامعا سالۋدىڭ ۇكىمى»، «شاشتى ترانسپلانتاسيالاۋدىڭ ۇكىمى»، «ارتىق ساۋساقتى الۋدىڭ ۇكىمى»، ت.ب. تاقىرىپتا ازىرلەنگەن ءپاتۋالاردىڭ ءماتىنى تالقىعا سالىنۋدا. سونىمەن قاتار، «يسلام ەنسيكلوپەدياسى» كىتابىنىڭ ءى تومىنىڭ، «بابالار ىزىمەن: قازاق دالاسىنداعى مۇسىلماندىق مەكتەپ» كىتابىنىڭ جانە «ق.ا. ءياساۋيدىڭ ءومىرى، قىزمەتى، شىعارماشىلىعى» كىتابىنىڭ مازمۇنى جان-جاقتى قارالۋدا.

باس ءمۇفتي ناۋرىزباي قاجى تاعان ۇلى ناتيجەلى ەڭبەك ەتىپ كەلە جاتقان عالىمدارعا العىس ءبىلدىرىپ: «اللاعا شۇكىر، عۇلامالار كەڭەسىنىڭ جۇمىسى جوعارى دەڭگەيدە ءوتىپ كەلەدى. سونىڭ ناتيجەسىندە بىلتىر «ءپاتۋالار جيناعىنىڭ» ءۇشىنشى تومىن جارىققا شىعاردىق. سونىمەن قوسا عىلىمي جوبالاردى قولعا الدىق. وسى ورايدا ەڭبەك ەتىپ، اتسالىسقان بارشاڭىزعا تاعى دا اللا رازى بولسىن دەپ شىنايى العىسىمدى جەتكىزەمىن»، - دەدى.