30 دەلەگات سايلاندى، ونىڭ 33،3%-ى ايەلدەر.
الماتىدا Nur Otan پارتياسى قالالىق فيليالى ساياسي كەڭەسىنىڭ وتىرىسىندا پارتيا سەزىنە قاتىساتىن دەلەگاتتار ءتىزىمى جاساقتالدى، دەپ حابارلايدى Almaty-akshamy.kz
پارتيانىڭ قالالىق فيليالىنىڭ ساياسي كەڭەسىنىڭ جۇمىسىنا الماتى قالاسى اكىمىنىڭ ورىنباسارى ا.قىرىقبايەۆ، پارتيانىڭ قالالىق فيليالى ءتوراعاسىنىڭ ءبىرىنشى ورىنباسارى م.وتىنشييەۆ، الماتى قالاسى ءماسليحاتىنىڭ حاتشىسى س.كانكۋروۆ جانە قالالىق ءماسليحاتتاعى پارتيا فراكسياسىنىڭ جەتەكشىسى ل.يبراگيموۆا، سونداي-اق فيليالدىڭ اكتيۆى، دەپۋتاتتار مەن اۋداندىق فيليالداردىڭ وكىلدەرى قاتىستى. ساياسي كەڭەس مۇشەلەرى دەلەگاتتار قۇرامىنىڭ جوعارى دەڭگەيىن اتاپ ءوتتى.
«بارلىق دەلەگاتتار پارتيا جارعىسىنا سايكەس سايلاندى. الماتىدان 30 دەلەگات سايلاندى. دەلەگاتتار قۇرامى قوعامنىڭ بارلىق سپەكترىن قامتيدى جانە وعان ەكونوميكا، بيزنەس، ءبىلىم بەرۋ، مادەنيەت، مەملەكەتتىك باسقارۋ، دەنساۋلىق ساقتاۋ ورگاندارىنىڭ جانە ت.ب. ءتۇرلى سالالارىنىڭ وكىلدەرى كىردى. ال ايەلدەردىڭ قۇرامى 33،3% قۇرادى»، - دەپ حابارلادى الماتى قالاسى ءماسليحاتىنداعى Nur Otan فراكسياسىنىڭ جەتەكشىسى ءلاززات يبراگيموۆا.
بۇدان بولەك، "نۇروتاندىقتار" پارتيانىڭ بارلىق جۇمىسىن تۇبەگەيلى قايتا قۇرۋدى جۇزەگە اسىرۋدا ەل پرەزيدەنتى قويعان جاڭا مىندەتتەردى تالقىلادى. پارتيا مۇشەلەرىنىڭ پىكىرىنشە، تەك پارتيانىڭ عانا ەمەس، تۇتاس ەلدىڭ جاڭعىرۋ كەزەڭىندە پارتيانىڭ جاڭا كوشباسشىسى قاسىم-جومارت توقايەۆقا قازاقستاندى دەموكراتيالاندىرۋدىڭ كەلەسى كەزەڭىن قالىپتاستىرۋدا جان-جاقتى قولداۋ كورسەتۋ قاجەت.
«ەلدىڭ باستى ساياسي كۇشى رەتىندە ورنىققان Nur Otan رەفورمالاردى جۇزەگە اسىرۋعا بەلسەندى قاتىسىپ، قازاقستاندى سەرپىندى قايتا قۇرۋ مەن جاڭعىرتۋدىڭ نەگىزگى قوزعاۋشى كۇشى بولاتىنى ءسوزسىز. نۇروتاندىقتار قالا تۇرعىندارىنىڭ سۇرانىسىنا سايكەس ءوز جۇمىستارىن كۇشەيتۋگە دايىن. پارتيانىڭ قالالىق فيليالى ساراپشىلارمەن، ساياساتتانۋشىلارمەن جانە قوعامدىق پىكىر بەلسەندىلەرىمەن ءتۇرلى فورماتتا كوپتەگەن كەزدەسۋلەر وتكىزدى، وندا پارتيالىق جۇمىستىڭ مازمۇنى مەن ادىستەرىن جاڭارتۋ بويىنشا ۇسىنىستار جينالدى. ناتيجەسىندە ءبىز پارتيا جۇمىسىن قايتا قۇرۋ بويىنشا ءوز ۇسىنىستارىمىزدى ازىرلەدىك جانە ولاردى ءارى قاراي قاراستىرۋ ءۇشىن پارتيانىڭ ورتالىق اپپاراتىنا جولدادىق»، - دەپ تۇيىندەدى پارتيانىڭ الماتى قالالىق فيليالى ءتوراعاسىنىڭ ءبىرىنشى ورىنباسارى مەيىرجان وتىنشييەۆ.
ەستەرىڭىزگە سالساق، Nur Otan پارتياسىنىڭ ءتوراعاسى قاسىم-جومارت توقايەۆ اعىمداعى جىلدىڭ 1 ناۋرىزىندا كەزەكتەن تىس XXII سەزدى شاقىرۋ تۋرالى شەشىم قابىلدادى. سەزگە بارلىق وڭىرلەردەن دەلەگاتتار قاتىسادى.