باس ءمۇفتي يسلام ليگاسىنىڭ باس حاتشىسىن قىركۇيەك ايىندا ەلىمىزدە وتەتىن الەمدىك جانە ءداستۇرلى دىندەر ليدەرلەرىنىڭ VII سەزىنە قاتىسۋعا شاقىردى.
قمدب ءتوراعاسى، باس ءمۇفتي ناۋرىزباي قاجى تاعان ۇلى ەر-رياد قالاسىندا دۇنيەجۇزىلىك يسلام ليگاسىنىڭ باس حاتشىسى شەيح، دوكتور مۇحاممەد يبن ابدۋلكاريم ال-يسسامەن كەزدەستى، دەپ حابارلايدى Almaty-akshamy.kz قمدب سايتىنا سىلتەمە جاساپ.
كەزدەسۋدە ەكى ەل اراسىنداعى دوستىق، رۋحاني بايلانىستار ءسوز بولدى. دۇنيەجۇزىلىك يسلام ليگاسىنىڭ باس حاتشىسى قمدب ءتوراعاسىنا «ءدىن ۇستانۋشىلار اراسىنداعى ورتاق قۇندىلىقتار فورۋمىنا» قاتىسىپ، جاساعان بايانداماسى ءۇشىن العىسىن ءبىلدىرىپ، ورتاق باستامالارعا قولداۋ كورسەتۋگە دايىن ەكەنىن ايتتى.
«قازاقستاننىڭ ءبىز ءۇشىن ورنى بولەك. سىزدەرمەن اراداعى قالىپتاسقان دوستىق بايلانىستى ءارى قاراي دامىتۋعا ءارقاشان نيەتتىمىز. قازاقستان كوپتەگەن ەلدەرگە ءوزىنىڭ تۇراقتىلىعىمەن، ءدىنارالىق كەلىسىمدى ساقتاۋداعى وزىندىك ۇلگىسىمەن تانىمال. ءبىز اركەز ورتاق جوبانى بىرگە اتقارۋعا دايىنبىز» دەدى ليگا باس حاتشىسى.
ءوز كەزەگىندە ناۋرىزباي قاجى تاعان ۇلى ماڭىزدى جيىننىڭ ناتيجەلى بولعانىن ايتىپ، ليگانىڭ جۇمىسىنا تابىس تىلەدى.
«دۇنيەجۇزىلىك يسلام ليگاسى قازاقستاندا وتەتىن الەمدىك جانە ءداستۇرلى دىندەر ليدەرلەرىنىڭ سەزىن، ءبىزدىڭ ورتاق باستامالارىمىزدى ءاردايىم قولداپ كەلەدى. ءوزىڭىزدى قىركۇيەك ايىندا قازاقستان استاناسىندا وتەتىن الەمدىك جانە ءداستۇرلى دىندەر ليدەرلەرىنىڭ VII سەزىنە قاتىسۋ ءۇشىن ارنايى شاقىرامىز. ءبىزدىڭ ماقساتىمىز – تاۋەلسىزدىك العان تۇستان بەرى بەيبىتشىلىكتى ۇستانۋ، الەمدە بولىپ جاتقان جانجال، ءدىنارالىق قاقتىعىستاردىڭ الدىن الۋ. وسى رەتتە ليگانىڭ اتقارىپ وتىرعان جۇمىسى وراسان زور. مۇسىلمان ۇمبەتىنىڭ اۋىزبىرشىلىگىن نىعايتۋ باعىتىندا دا كوپتەگەن جۇمىس اتقارىلۋدا. ءبىزدىڭ دە ماقساتىمىز ءدىني كوزقاراستارىمىز ءبىر بولىپ، ورتاق مۇددەگە قاراي ويىسساق دەيمىن. وزىڭىزبەن پىكىر الماسىپ، سۇحباتتاسقانىما قۋانىشتىمىن. اللا رازى بولسىن! ليگانىڭ جۇمىسىنا بولاشاقتا دا تابىس تىلەيمىن!» دەدى باس ءمۇفتي.