قازاقستاندىقتار 12 مامىردان باستاپ رەجيسسەر اقان ساتايەۆتىڭ «ۇلى دالا تاڭى» تاريحي دراماسىن كينوتەاترلاردان كورە الادى.
تاريحي كينوتۋىندى قازاق حاندىعىندا جانىبەك حاننىڭ ۇلى – قاسىم حان بيلىك ەتكەن كەزدەرى تۋرالى باياندايدى. ءدال وسى جىلدارى قازاق حاندىعى وركەندەپ قانا قويماي، شىعىس دەشتى-قىپشاقتىڭ كەڭ اۋماعىنا باقىلاۋ ورناتىلىپ، قازاقتار دەربەس ەتنيكالىق قاۋىمداستىق رەتىندە ءبىزدىڭ اۋماقتان تىس جەرلەرگە دە بەلگىلى بولدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
قاسىم حان ادەت-عۇرىپتىق زاڭدارعا ارقا سۇيەپ، تاريحقا «قاسىم حاننىڭ قاسقا جولى» دەگەن اتپەن ەنگەن ءوزى دايىنداعان كونستيتۋسيالىق قۇجاتتىڭ كومەگىمەن ەل باسقاردى. تاريحي كينوتۋىندىنىڭ سەنارييىن بەلگىلى كينودراماتۋرگ بەكبولات شەكەروۆ، نازيرا باقايەۆا جانە اقان ساتايەۆ جازدى.
قاسىم حاننىڭ جاس كەزىن دانيار ورازايەۆ وينايدى، ەرەسەك قاسىم حان – بەرىك ايتجانوۆ، جاس بۇرىندىق حان – ايدوس ابدىقادىروۆ، ەرەسەك بۇرىندىق حان – ەرىك جولجاقسىنوۆ. مۇحاممەد شايباني – نۇرلان ءالىمجانوۆ. جاھان بەگىمنىڭ جاس كەزىن التىناي نوگەربەك، ەگدە جاھان بەگىمدى شامشاگۇل مەندياروۆا وينايدى. ءالي ءراشيدتىڭ جاس كەزىن – قۋانىش قۇدايبەرگەن، ەرەسەك ءالي ءراشيدتى – تۇڭعىشباي جامانقۇلوۆ سومدايدى.
«تاريحي ءفيلمدى تۇسىرۋگە 2500 ادام تارتىلدى. ولاردىڭ ءارقايسىسى ءوز جۇمىسىنا ۇلكەن جاۋاپكەرشىلىكپەن قارادى. ءبىزدىڭ كەڭەسشى-تاريحشىلارىمىزدىڭ ايتۋىنشا، بۇل عىلىمي جۇمىسقا ۇقساس بولعان. بارلىق تاريحي مالىمەتتەر، فاكتىلەر ەكراندا كورسەتىلەدى. 14 عاسىر ءبىزدىڭ حالقىمىزدىڭ ىرگەلى كەزەڭى ەكەنى بەلگىلى»، - دەدى اقان ساتايەۆ.
ءفيلمنىڭ ءتۇسىرۋ جۇمىستارى 2021 جىلى اقپان ايىنىڭ سوڭىندا الماتى وبلىسى پانفيلوۆ اۋدانىندا باستالعان بولاتىن. ناۋرىزدىڭ ورتاسىندا تۇسىرىلىمدەر «قازاقفيلم» كينوستۋدياسىنىڭ پاۆيلوندارىندا تۇرعىزىلعان «سىعاناق قالاسى»، «بۇرىندىق حاننىڭ تاق زالى» جانە «سامارقاند – شايباننىڭ اۋلاسى» دەكوراسيالارىندا جۇرگىزىلدى.
جاز ايلارىندا قاپشاعاي قالاسىنىڭ ماڭىندا كۇردەلى ساحنالاردىڭ ءبىرى – ۇلىتاۋداعى شايقاس ءتۇسىرىلدى. بۇل ساحناعا Nomad Stunts كاسكادەرلەر توبى ارنايى تارتىلدى. ءفيلمنىڭ تريۋكتەرىن جايداربەك كۇنعوجينوۆ، ەسبولات ابدىبەرىك جانە ادىلەت اقماتوۆ ورىندادى.