بۇگىن قازاقستان مۇسىلماندارى ءدىني باسقارماسىنىڭ شاريعات جانە ءپاتۋا ءبولىمى 6 ماۋسىم كۇنى كەش باتقاندا جاڭا ايدىڭ كورىنۋىنە بايلانىستى زۋل-حيججا ايىنىڭ باستالعانىن حابارلاعان بولاتىن. سونداي-اق اراپا كۇنىنىڭ 15 ماۋسىمعا جانە قۇربان ايتتىڭ العاشقى كۇنى 16 ماۋسىمعا سايكەس كەلەتىنى ايتىلدى.
قمدب وسى ورايدا نەلىكتەن قۇربان ايتتىڭ ءبىرىنشى كۇنى 17 ماۋسىمنان 16 ماۋسىمعا اۋىسقانى جونىندە مالىمدەدى، دەپ حابارلايدى Almaty-akshamy.kz.
قمدب شاريعات جانە ءپاتۋا ءبولىمى ءار جىلدىڭ ءتورتىنشى توقسانىندا كەلەر جىلدىڭ ءدىني مەرەكەلەرى مەن كۇندەرى كورسەتىلگەن كەستە ازىرلەيدى. وندا حيجري ايلاردىڭ باستالۋى حالىقارالىق استرونوميالىق زەرتتەۋ ورتالىقتارىنىڭ مالىمەتتەرى نەگىزىندە جاسالادى. سونىمەن بىرگە ءپاتۋا ماماندارى ءدىني مەرەكەلەردىڭ ناقتى كۇندەرى جاڭا ايدىڭ كورىنۋىنە بايلانىستى كورسەتىلگەن ۋاقىتتان ءبىر كۇن شەگەرىلۋى نەمەسە العا جىلجۋى مۇمكىن ەكەنىن ەسكەرتىپ وتىرادى.
يسلام دىنىندە قاسيەتتى كۇندەر، تۇندەر جانە ايلار قاماري جىل ساناۋى نەگىزىندە انىقتالادى. مۇنداي جىل ساناق اي فازاسىنىڭ وزگەرۋىنە قاراي ەسەپتەلەدى. جاڭا ايدىڭ (ءھيلالدىڭ) كورىنۋىمەن جاڭا اي باستالادى. قاماري اي كەيدە 29 نە 30 كۇن بولادى.
زۋل-حيججا ايىن انىقتاۋ ءۇشىن زۋل-قاعدا ايىنىڭ 29-ندا ايدى باقىلايدى. كۇن باتقان كەزدە جاڭا اي كورىنسە، كەلەسى كۇنى زۋل-حيججا ايى باستالعان بولىپ سانالادى. ەگەر اۋا بۇلتتى بولىپ، اي كورىنبەسە، زۋل-قاعدا ايىن 30 كۇنگە تولىقتىرادى.
وسىعان وراي، ماۋسىمنىڭ 6-شى كەشى جاڭا ايدىڭ ناقتى كورىنۋىنە بايلانىستى 7 ماۋسىم زۋل-حيججا ايى باستالدى. سول سەبەپتى جىل باسىندا ەسكەرتكەنىمىزدەي قۇربان ايت كۇنى ءبىر كۇن بەرى جىلجىپ، 16 ماۋسىمعا ساي كەلدى.