قازاقستان مۇسىلماندارى ءدىني باسقارماسى يسلام دىنىندەگى قاسيەتتى ءۇشىنشى مەكەن سانالاتىن قۇدىس جەرىندە بولىپ جاتقان قانتوگىسكە قاتتى الاڭداۋشىلىق بىلدىرەدى جانە قانشاما جىلدان بەرى شەشىمىن تاپپاي كەلە جاتقان ماسەلەنىڭ بەيبىت جولمەن، ءوزارا ىمىرا اياسىندا شەشىلۋىن تىلەيدى.
«ادامزات بالاسىن بىرلىك پەن يگىلىككە شاقىرعان پايعامبارلار ءىزى قالعان قاسيەتتى مەكەننىڭ بۇگىندە سوعىس الاڭىنا اينالىپ، مىڭداعان بەيكۇنا جانداردىڭ، اسىرەسە سابيلەر مەن بەيبىت تۇرعىنداردىڭ وققا ۇشىپ، قازا تابۋى بارشامىزدىڭ جانىمىزعا قاتتى باتۋدا. اۋىر جاراقات الىپ، ۇرەي قۇشاعىندا ءومىر ءسۇرىپ وتىرعان جانداردىڭ تەز ساۋىعىپ كەتۋىن تىلەيمىز.
قازاقستان مۇسىلماندارى ءدىني باسقارماسى تاراپتاردى بەيبىت كەلىسىمگە كەلۋگە جانە قانتوگىستى شۇعىل توقتاتىپ، حالىققا زارار كەلتىرمەۋگە ۇندەيدى.
سونداي-اق، پالەستينا حالقىنىڭ حالىقارالىق كەلىسىمدەر مەن رەزوليۋسيالاردا بەكىتىلگەن تاريحي قۇقىعىن قولدايتىندىعىن مالىمدەيمىز.
ەلىمىزدەگى بارشا مۇسىلمان قاۋىمىن قاسيەتتى مەكەننىڭ تىنىشتىعى مەن اماندىعى ءۇشىن دۇعا جاساۋعا شاقىرامىز. اللا تاعالا جەر بەتىن ءتۇرلى بۇلىكتەر مەن سوعىستان امان ەتكەي. ءامين»! - دەلىنگەن قمدب مالىمدەمەسىندە.