20 شىلدە – قۇربان ايت مەرەكەسىنىڭ ءبىرىنشى كۇنى. قازاقستان مۇسىلماندارى ءدىني باسقارماسى كوپتەگەن مۇسىلمان ەلدەرىنىڭ عۇلامالارىمەن كەڭەسىپ، وسىنداي ءپاتۋا قابىلدادى.
يسلام دىنىندە زۇلحيججا ايىنىڭ العاشقى ون كۇنى قاسيەتتى كۇندەر سانالادى. ھيجري جىل ساناۋى بويىنشا 1442 جىلدىڭ زۇلحيججا ايى 11 شىلدە كۇنى باستالدى. ال اراپا كۇنى 19 شىلدەگە سايكەس كەلەدى.
باس ءمۇفتيدىڭ باستاماسىمەن قاسيەتتى قۇربان ايت مەرەكەسىنە وراي قمدب ورتالىق اپپاراتىندا ارنايى جۇمىس توبى قۇرىلىپ، نۇر-سۇلتان قالاسى بويىنشا قۇرباندىققا شالىناتىن مال باعاسىن ناقتىلادى، دەپ حابارلايدى Almaty-akshamy.kz
بيىلعى «QURBAN-2021» جوباسى بويىنشا قۇربان شالۋدى ۇيىمداستىرۋ جۇمىستارىنا جاۋاپتى قمدب جۇمىس توبى ەلورداداعى «باراكات»، «BIG شانحاي» جانە ت.ب مال بازارلارىن ارالاپ، جەرگىلىكتى قوي ساتۋشىلارمەن كەزدەستى.
كەزدەسۋ بارىسىندا جۇمىس توبى ساتىلىمداعى قويدىڭ باعالارىن ناقتىلادى. قمدب اپپارات باسشىسى عىلىمبەك جادىگەر ۇلى مەملەكەت تاراپىنان رۇقسات بەرىلگەن جاعدايدا بيىل قۇربان شالۋ ءراسىمى ەكى جولمەن جۇزەگە اساتىنىن ايتىپ ءوتتى. سونىمەن قاتار شاريعات جانە ءپاتۋا ءبولىمى مەڭگەرۋشىسىنىڭ ورىنباسارى حاسان امانقۇل جەرگىلىكتى قوي ساتۋشىلارعا قۇرباندىققا شالاتىن مالدىڭ شاريعات تالابىنا ساي بولۋىن ءتۇسىندىردى.