ەلىمىزدە ونلاين-كازينو جارنامالاعان 34 بلوگەر انىقتالدى، دەپ حابارلايدى aqshamnews.kz
جىل باسىنان بەرى قارجىلىق مونيتورينگ اگەنتتىگى 34 بلوگەردىڭ ونلاين-ويىنداردى جارنامالاۋعا قاتىسى بارىن انىقتادى. ولاردىڭ 11ء-ى اكىمشىلىك جاۋاپكەرشىلىككە تارتىلدى، ال 23 كونتەنت جاساۋشىعا قاتىستى ماتەريالدار مادەنيەت مينيسترلىگىنە شارا قابىلداۋ ءۇشىن جولداندى.
كوپشىلىگى زاڭدى جۇيەلى تۇردە بۇزعانى بەلگىلى بولدى. ماسەلەن، حيپ-حوپ ورىنداۋشى «Baller» (شىن اتى – شىڭعىسحان كوپبايەۆ) جىل باسىنان بەرى اتالعان باپ بويىنشا بەس رەت جاۋاپقا تارتىلعان.
600 مىڭنان استام جازىلۋشىسى بار مۋزىكانت-بلوگەر رينات شامشىراققا قاتىستى دا ونلاين-كازينو جارنامالاعانى ءۇشىن اكىمشىلىك ءىس قوزعالعان.
بلوگەر «Niko_nett» پەن ينفليۋەنسەر قايسار قامزا دا ەرەكشە نازاردا. سوڭعىسى ءوزىنىڭ تەلەگرام-ارناسىندا زاڭسىز ويىنداردى ۇنەمى ناسيحاتتاپ، جالعان جەڭىمپازداردىڭ ۆيدەولارىن جاريالاپ كەلەدى.
سول سياقتى، نايل تۇرعانوۆ ونلاين-كازينو جارناماسى ءۇشىن 8 ملن تەڭگەدەن استام قارجى العان.
ال نۇرعازى توقتاروۆ (Nakonay Qarapaiym) الەۋمەتتىك جەلىلەرىندە ازاماتتاردى زاڭسىز ويىندارعا تارتۋ ماقساتىندا اگرەسسيۆتى ناۋقان جۇرگىزىپ، جارناما ءۇشىن 15،8 ملن تەڭگە الىپ، ونىڭ جارتىسىنا جۋىعىن سول پلاتفورمالاردىڭ وزىندە ويناپ ۇتىلىپ قالعان.
ماريام قۇلجابايەۆا (oomariko) ينتەرنەت-كازينودا تىركەلۋگە شاقىرعان قاراپايىم ستوريستەرىن 350 مىڭ تەڭگەگە باعالاعان.
وعان قوسا، زۋحرا حاكييەۆا، ديانا حالمەتوۆا، اسەم اۋباكيروۆا، ارينا بايكوۆا، كۇمىساي ايىمبەتوۆا جانە باسقا دا بلوگەرلەردىڭ اتى بەلگىلى.
ميلليونداعان تابىسقا كەنەلگەن بلوگەرلەر ايىپپۇلدارىن تولەپ، زاڭسىز ارەكەتىن قايتا جالعاستىرىپ ءجۇر. وسىعان بايلانىستى قما ونلاين-كازينو جارناماسى ءۇشىن قىلمىستىق جاۋاپكەرشىلىك ەنگىزۋ باستاماسىن كوتەرىپ وتىر.