مەملەكەت باسشىسى جوعارى سوت كەڭەسىنىڭ ءتوراعاسى دەنيس ءشيپپتى قابىلدادى
پرەزيدەنتكە جوعارى سوت كەڭەسىنىڭ بىلتىرعى اتقارعان جۇمىستارىنىڭ قورىتىندىلارى، سونىڭ ىشىندە سۋديالاردىڭ ىرىكتەلۋىن جەتىلدىرۋ شارالارى، سوتتاردىڭ كادرلىق رەزەرۆىن قالىپتاستىرۋ بارىسى جانە سۋديالارعا قاتىستى تارتىپتىك تاجىريبەنىڭ جاعدايى تۋرالى مالىمەت بەرىلدى، دەپ حابارلايدى Almaty-akshamy.kz Akorda.kz-كە سىلتەمە جاساپ
دەنيس ءشيپپتىڭ ايتۋىنشا، كەڭەستىڭ قىزمەتى زاماناۋي HR تاسىلدەرىن كەڭىنەن قولدانۋعا جانە زاڭگەرلەر قوعامداستىعى وكىلدەرىن بەلسەندى تۇردە تارتۋعا ءمان بەرە وتىرىپ، اشىقتىق پەن شىنايىلىق قاعيداتتارى بويىنشا جۇمىس ىستەۋگە نەگىزدەلگەن.
سۋديالاردى ىرىكتەۋ كەزىندە ولاردىڭ كاسىبي جانە جەكە قاسيەتتەرىنە شىنايى باعا بەرىلىپ، قوعامدىق پىكىر جان-جاقتى زەرتتەلەدى.
بۇل رەتتە سوڭعى جىلدارى بىلتىر العاش رەت سوت جۇيەسىنىڭ قاتارىن تولىقتىرعان سۋديالاردىڭ سانى، جۇمىستان كەتكەندەردەن باسىم بولعانى بايقالدى. وسىلايشا سوت كورپۋسىنا ءبىرىنشى رەت 103 ادام تاعايىندالىپ، 90 سۋديانىڭ وكىلەتتىگى توقتاتىلدى.
قاسىم-جومارت توقايەۆقا سوت كادرلارىن بارىنشا جاڭارتۋدى جانە سوت جۇيەسىنە تاجىريبەلى مامانداردى تارتۋدى قامتاماسىز ەتۋگە باعىتتالعان جۇمىستاردىڭ پەرسپەكتيۆتى باعىتتارى باياندالدى. سۋديالاردى ىرىكتەۋ ماسەلەلەرى بويىنشا زاڭعا ەنگىزىلگەن قوسىمشالاردى ىسكە اسىرۋ اياسىندا بيىل سالالىق ماماندار ءۇشىن وبلىستىق سوتتارداعى سۋديا لاۋازىمىنا ارنايى كونكۋرس وتكىزۋ جوسپارلانىپ وتىر.
كەڭەس جۇمىسىنىڭ اشىقتىعىن ودان ءارى ارتتىرۋ ماقساتىمەن زاڭگەرلەر قوعامداستىعى وكىلدەرىنىڭ قاتىسۋىن كەڭەيتۋ جۇمىستارى جۇرگىزىلۋدە.