الماتى جۇرتشىلىعى قوستانايدان جاردەمىن ايامادى
الماتى اكىمدىگى قوستاناي وبلىسىندا زارداپ شەككەندەرگە گۋمانيتارلىق كومەك جيناعىن جاريالادى. بۇعان قالا تۇرعىندارى مەن ەرىكتى ازاماتتار ءوز ۇلەسىن قوسىپ جاتىر.
قوستاناي وبلىسىنداعى ورتكە بايلانىستى الماتىدا ورتتەن زارداپ شەككەندەرگە گۋمانيتارلىق كومەك جيناۋ باستالدى. الماتى قالاسى جاستار ساياساتى باسقارماسىنىڭ ءفرونت-وفيسىنىڭ ەرىكتىلەرى مەملەكەتتىك جاستار ساياساتى قورىمەن، كاسىپكەرلىك جانە ينۆەستيسيالار باسقارماسىمەن، سونداي-اق الماتى قالاسىنىڭ اۋداندىق اكىمدىكتەرىمەن بىرلەسىپ، قوستاناي وبلىسىنداعى ورتتەن زارداپ شەككەندەرگە گۋمانيتارلىق كومەك جيناعىن ۇيىمداستىردى.
گۋمانيتارلىق كومەك بەرىلدى
«قاراجات پەن قاجەتتى ازىق-تۇلىك، كيىم-كەشەك پەن قۇرىلىس ماتەريالدارىن جيناۋعا كاسىپكەرلەر، اۋداندىق اكىمدىكتەر قوسىلدى. بۇگىن قوستاناي وبلىسىنا گۋمانيتارلىق كومەكپەن ءتورت جۇك كولىگى اتتانادى. ءبىز نەگىزگى ازىق-تۇلىك – سۋ، قانت، ماي، جارما، پەچەنە، كەپتىرىلگەن جەمىستەر جانە ت.ب.، سونداي-اق ەرەسەكتەر مەن بالالارعا ارنالعان كيىم، مەكتەپ كەرەك-جاراقتارى، اياقكيىمدەر جينادىق»، – دەپ ءتۇسىندىردى جاستار ساياساتى باسقارماسىنىڭ باسشىسى قايىرجان مەڭدىعالييەۆ.
گۋمانيتارلىق كومەك جيناۋ جانە ەرىكتىلەردى قابىلداۋ قالانىڭ بارلىق سەگىز اۋدانىندا تاڭەرتەڭ ەرتە جۇرگىزىلەدى، جيىننىڭ باس شتابى بايتۇرسىنوۆ كوشەسى، 22، 1-بولمە مەكەنجايى بويىنشا DEPO EVOLUTIONS PARK بولىپ بەلگىلەندى. ازىق-تۇلىك، ۇزاق مەرزىمدى ساقتاۋ ونىمدەرى، دارى-دارمەكتەر، گيگيەنا قۇرالدارى، كيىم جانە توسەك-ورىن جابدىقتارى جينالادى.
«ءبىز قالالىق ۆولونتەرلىك ۇيىمداردى بىرىكتىردىك. جاستار ساياساتى باسقارماسىنىڭ ءفرونت-وفيسىنىڭ ەرىكتىلەرى، سونداي-اق ستۋدەنتتەر قاتارىنداعى مەملەكەتتىك جاستار ساياساتى قورىنىڭ ەرىكتىلەرى تاڭەرتەڭنەن باستاپ گۋمانيتارلىق كومەك قابىلداۋ پۋنكتتەرىندە جۇمىس ىستەۋدە. مەگاپوليس تۇرعىندارى دا شەتتە قالعان جوق. بىزگە كيىمدەر، بالالار تاعامدارىن اكەلۋدە. قازىرگى ۋاقىتتا ەرىكتىلەر جۇك كولىكتەرىن قوستاناي وبلىسىنا جونەلتۋدە»، – دەدى الماتى قالاسىنىڭ مەملەكەتتىك جاستار ساياساتى قورىنىڭ ديرەكتورى ءازيز قاجدەنبەك.
الماتى قالاسى جاستار ساياساتى باسقارماسىنىڭ باسشىلىعى قالا تۇرعىندارىن اكسياعا قوسىلۋعا جانە قوستاناي وبلىسىندا زارداپ شەككەن وتباسىلارعا كومەكتەسۋگە شاقىردى. كومەك كورسەتۋگە، ۆولونتەر بولۋعا نەمەسە ازىق-تۇلىكپەن قامتاماسىز ەتۋگە كومەكتەسكىسى كەلەتىندەردىڭ بارلىعىنا ۇيىمداستىرۋشىلار 8 707 438 77 33 تەلەفونى بويىنشا – الماتى قالاسىنىڭ ۆولونتەرلەر ءفرونت-وفيسىنىڭ باسشىسى نۇرسۇلتان بولاتۇلىنا قوڭىراۋ شالۋدى سۇرايدى.
سونىمەن قاتار، الماتىلىق ەرىكتىلەر قالپىنا كەلتىرۋ جۇمىستارىنا قاتىسادى، سونداي-اق قوستاناي وبلىسىندا جۇك جيناۋ ءۇشىن ارنايى قويمالار ۇيىمداستىرادى جانە حالىققا كومەك تاراتۋ جۇمىستارىن جۇرگىزەتىن بولادى.
العاشقى لەك
الماتىدان قوستانايعا جينالعان جىلۋدىڭ العاشقى لەگى 4 قىركۇيەكتە اتتانعان بولاتىن. وسى جۇمىستىڭ قالاي وربىگەندىگى تۋرالى دا ايتا كەتسەك دەيمىز. الماتىدا «جاستار رۋحى» كوۆوركينگ-ورتالىعىندا قوستانايداعى توتەنشە جاعدايعا بايلانىستى گۋمانيتارلىق كومەك ۇيىمداستىرىلدى.
بۇل شاراعا مۇرىندىق بولۋشى اmanat پارتياسىنىڭ الماتى قالالىق فيليالى بولىپ تابىلادى. بىرنەشە كۇننەن بەرى قوستاناي وبلىسىنىڭ اۋليەكول اۋدانىنداعى ورتتەن ورمان-توعاي عانا ورتەنىپ قويماي، ادام شىعىنى دا ورىن الدى. ءتىلسىز جاۋ ءبىرشاما اۋماقتى شارپىدى. سونىڭ سالدارىن جويۋعا الماتى جۇرتشىلىعى دا ءوز جاردەمدەرىن تيگىزۋدە.
اتالعان كومەك ورتالىعىنا بەلدى كاسىپكەرلەر، قالا تۇرعىندارى، قاراپايىم ازاماتتار دا ءوز ۇلەستەرىن قوسۋدا. ناقتىراق ايتقاندا، قانت، ۇن، كۇرىش، سارى ماي، سابىن سىندى تۇرمىستىق قاجەتتىلىك تۋدىراتىن زاتتار جينالۋ ۇستىندە. بۇل تۋرالى «جاستار رۋحى» جق اقف ءتوراعاسى اكەجان كەڭەسوۆ ءمالىم ەتتى.
سونىمەن قاتار، اتالعان ورتالىقتىڭ جۇمىسىنا قاراپايىم شاھار تۇرعىندارى مەن جاستار دا ءوز ۇلەستەرىن قوسىپ، اتسالىسۋدا.
«ءبىز وتباسىمىزبەن بىرگە وسى ءبىر كەلەڭسىز حاباردى ەستىدىك. انىق-قانىعىن الەۋمەتتىك جەلىلەردەن بىلدىك. وسى جاعدايعا جۇرەگىمىز اۋىردى. سول سەبەپتى دە از دا بولسا، كومەكتەسۋدى ويلادىق. سوندىقتان كيىم-كەشەك، ازىق-تۇلىك سىندى ءتۇرلى نارسەلەردى وتكىزدىك»، – دەدى ەرشات ءسابيتوۆ ەسىمدى قالا تۇرعىنى.
يگى نيەت تولاستار ەمەس
الماتىلىقتار باستاعان كومەككە قوسىلۋشىلار سانى وتە كوپ. العاشقى بىر-ەكى كۇنگى جىلۋدىڭ ۋاقىتىندا 200-دەن استام ادام ءوز ۇلەستەرىن قوسقان.
قالا تۇرعىندارى قوستانايداعى الاپات ءورتتىڭ سالدارىن ەستىگەننەن كەيىن دەگبىر تاپپادى. كەيبىرى قولىنداعى ازىق-تۇلىك، تۇرمىسقا قاجەتتى زاتتار، كورپە-توسەك سىندى، ت.ب. نارسەلەردى اكەلىپ وتكىزگەن. اسىرەسە، جاستار جاعى بەلسەندىرەك كورىندى. ولار الەۋمەتتىك جەلىنىڭ كومەگىمەن كوۆوركينگ-ورتالىققا بايلانىسقا شىعىپ، قول جاردەمىنەن باستاپ، بارشا ىستەرگە ءبىر كىسىدەي اتسالىسقانى بايقالادى.
وسىعان وراي قيىن ساتتە قول ۇشىن سوزىپ، كومەكتەسۋگە نيەتتەنگەن جانداردى تىلگە تارتقان بولاتىنبىز.
اكەجان باقىت ۇلى،
الماتى قالالىق «جاستار رۋحى» جاستار قاناتىنىڭ ءتوراعاسى:
ەلدىڭ بىرلىگىنە راحمەت
بۇگىن تاڭەرتەڭنەن باستاپ قوستانايعا كومەك قولىن سوزۋ ماقساتىندا گۋمانيتارلىق پۋنكت اشىلدى. وسى پۋنكتكە ەرىكتىلەر، تۇرعىندار، كومەكتەسۋگە نيەتتى جاستار كەلىپ جاتىر. مۇندا ازىق-تۇلىكتەن بولەك، جەكە گيگيەنالىق زاتتار اكەلىنۋدە. سونىمەن بىرگە، قۇرىلىس زاتتارىن دا الىپ كەلۋدە. جالپى، كومەكتەسەم دەۋشىلەر قاتارى ارتىپ بارادى.
الماتى قالاسىنىڭ اكىمدىگى، ءماسليحات دەپتۋتتارى قولداۋىن ءبىلدىرىپ جاتىر. ولار ءوز تاراپىنان ماتەريالدىق جانە رۋحاني جاردەمدەرىن اياماۋدا. دالىرەك ايتقاندا، قاراپايىم ازاماتتاردىڭ ەڭبەگى وراسان. شاھار تۇرعىندارى تۇرمىستا ءجيى قولدانىلاتىن زاتتاردى وتكىزدى. ونىڭ ءوزى ۇلكەن كومەك. وسىنداي قىسىلتاياڭ شاقتا قولىنداعى بارىن قوستاناي جۇرتشىلىعىنا ۇلەستىرىپ جاتقان جاندارعا ريزاشىلىعىمىز شەكسىز.
سوڭعى كۇندەرى بولعان ءتىلسىز جاۋدىڭ شىعىنىنىڭ ورنىن ءسال دە بولسا بۇتىندەۋگە اتسالىسۋ ماقساتىندا جۇك كولىكتەرىمەن بىرگە ءوزىم دە جولعا اتتانىپ بارامىن. ال كومەك قولىن سوزام دەۋشى جاندارعا ەسىك اشىق.
ەلىمىزدە ءار ۋاقىتتا تىنىشتىق، باقىت-بەرەكە ورناي بەرسىن. ەندى مۇنداي ىڭعايسىز وقيعا بولماسىن. تەك جاقسىلىق پەن مەيىرىم نۇرىن شاشقان شۋاقتى كۇندەردە جولىعۋعا جازسىن دەمەكپىز!
مەيىرجان وتىنشييەۆ،
الماتى قالالىق اmanat پارتياسىنىڭ اتقارۋشى حاتشىسى:
بىرلەسە كوتەرگەن جۇك جەڭىل
ءبىزدىڭ قالادا ۇيىمشىلدىق مىقتى. ازاماتتار كەلەڭسىز جاعدايدى ەستىگەن ساتتەن باستاپ، قول قۋسىرىپ قاراپ وتىرمادى. اmanat پارتياسىنىڭ باسشىسى ەرلان جاقان ۇلىنىڭ تاپسىرماسىنا سايكەس قوستاناي وبلىسىنداعى توتەنشە جاعدايعا جاردەمدەسۋ، قولداۋ جۇمىستارى جۇرگىزىلە باستادى. سوعان سايكەس ارنايى پۋنكتتەر اشىلدى. سوڭعى ۋاقىتتا ازىق-تۇلىك، گيگيەنالىق زاتتار، كورپە-جاستىققا دەيىن جينالدى. باس اياعى 6 Fuhra اۆتو كولىگى جونەلتىلدى. 1 جۇك كولىگى قالالىقتاردىڭ ءوز ەركىمەن تاپسىرعان زاتتارىن جينادى. وعان كومەك بىلدىرەم دەۋشىلەر سانى وتە كوپ. بۇل حالقىمىزدىڭ قيىن ساتتە جۇمىلا جۇك كوتەرەتىن قاسيەتكە يە ەكەندىگىن اڭعارتادى.
ءارقاشان بەرەكە-بىرلىگىمىز بەكەم بولسىن. ەلىمىزدە قانداي جاعداي بولسا دا، اۋىزبىرشىلىگىمىز بەن تىنىشتىعىمىز اجىراماسىن!
راۋان بايعابىل،
«جاستار رۋحى» جاستار قاناتىنىڭ بەلسەندىسى:
جىلى جۇرەكتى جاندار كوپ
قوستانايداعى ءورتتىڭ سالدارىن ەستىپ-بىلىپ، بەلسەندىلىك تانىتا باستادىق. قازاق جەرىندە بولعان اپات ايتىپ كەلگەن جوق. ياعني كۇتپەگەن جەردەن ورىن الدى. وسىعان وراي الماتىلىقتار قول قۋسىرىپ قاراپ وتىرمادى. ءاربىر بىزبەن نيەتتەس جان ءوزىنىڭ قولىنان كەلگەنشە بارىن بەرىپ، قولداۋ كورسەتۋدە. وسى ءبىر وقيعا ادامزاتتىڭ ادامشىلىعىن اڭعارتتى. ءبىزدىڭ شتابتى اشقان ۋاقىتتان باستاپ، كومەكتەسۋ نيەتىمەن كەلگەن كىسى قاراسى كوپ.
ءبىزدىڭ ەسەبىمىزشە، 50-گە جۋىق ەرىكتى كەلدى. ولار اتقارىلىپ جاتقان ىستەرگە قول كومەگىن بەردى. ودان بولەك، ءارتۇرلى تاعامدار، اپاتتى جاعدايدا اسا قاجەت بولاتىن زاتتاردى وتكىزدى. كوۆوركينگ-ورتالىعىمىزعا كەلۋشىلەردىڭ سانىندا شەك بولمادى. ءوزىم دە تاڭدانىپ قالدىم. مۇنداي جىلۋعا اتسالىسۋشىلاردى كورىپ، ريزاشىلىعىمىز ارتا ءتۇستى.
ەندى كەلەڭسىز وقيعاعا ۇشىرامايىق. اماندىق پەن ساۋلىقتا جولىعۋعا جازسىن!
گۇلجان بەكەنوۆا،
الماتى قالالىق ءماسليحاتىنىڭ دەپۋتاتى:
كومەك دىتتەگەن جەرىنە جەتەرىنە سەنەمىز
اپاتتى وقيعا ەشقايسىمىزدى اينالىپ وتپەدى. ەستىگەن بويدا قابىرعامىز قايىستى. ءتىلسىز جاۋدىڭ زالالىن ەستىگەن ساتتە، بىردەن قول ۇشىن بەرۋ كەرەك دەگەن شەشىمگە كەلدىك. قازاقستان رەسپۋبليكاسىنىڭ حالقى قوستاناي وڭىرىندەگى ءورتتىڭ سالدارىن جويۋعا ءوز كومەگىن تيگىزۋدە. وزدەرىڭىز كورىپ-بىلىپ وتىرعانداي، قالامىز دا بەيجاي قالىپ وتىرعان جوق. بۇكىل ەل-جۇرت بولىپ قولدارىنان كەلگەنشە، 6 جۇك كولىگىنە ەڭ قاجەتتى زاتتاردى تيەپ جونەلتتى. جولعا ساپار شەككەن كولىكتەردىڭ ىشىندە قۇرىلىس ماتەريالدارىنا دەيىن ارتىلعان. ول جەردەگى قانشاما ادام ۇيسىز-كۇيسىز، ورىن-جايسىز قالدى عوي. سول سەبەپتى، ۇيگە قاجەتتى دۇنيەلەردى دە قوسا جىبەردىك.
سونىمەن قاتار، قالالىق ءماسليحات دەپۋتتارى دا ايانىپ قالمادى. 30 توننالىق جۇك كولىگىنە تيەلەتىن جۇككە ءاربىر ءماسليحات دەپۋتاتى ۇلەس قوسىپ، ءوز قالتالارىنان كومەك جيدى. ونىمەن قوسا، كاسىپكەرلەردىڭ دە تيگىزگەن كومەگى ۇشان-تەڭىز بولىپ وتىر. ارينە، قاراپايىم جانداردىڭ دا كورسەتىپ جاتقان كومەگىن بايقاۋدامىز.
ءبىزدىڭ ويىمىزشا، جىبەرىلگەن كومەك سول جاقتاعى اعايىننىڭ جەتپەي جاتقان تۇسىن جامايدى دەگەن نيەتتەمىز.
P.S. قوستاناي وڭىرىندەگى ورتتەن كەلگەن زارداپقا بەيجاي قاراماعان «Alatay Aqparat» مەديا حولدينگى قۇرامىنداعى «Almaty aqshamy» جانە «ۆەچەرنيي Almaty» گازەتتەرى مەن سايتىنىڭ قىزمەتكەرلەرى ءبىر كۇندىك جالاقىسىن يگى كومەك رەتىندە اۋداردى.