رەسەيدە QIWI بانكتىڭ ليسەنزياسىن قايتارىپ الۋ سالدارىنان ءىرى بانكتەردىڭ تولەم قىزمەتتەرى ىستەن شىعىپ، اسىرەسە، كوممۋنالدىق-شارۋاشىلىق قىزمەتتەرى اقىسىن تولەۋ كەزىندە پروبلەما تۋىندادى، دەپ حابارلايدى اlmaty-akshamy.kz
انىعىندا، رەسەي بانكى QIWI توبىنا كىرەتىن QIWI بانكتىڭ ليسەنزياسىن كەرى قايتارىپ الدى.
ماماندار بۇل رەسەيدەگى سوڭعى ءبىر جارىم جىلدا ءبىرىنشى رەت بولعان وقيعا ەكەنىن ايتىپ وتىر. ورتالىق بانك بۇل ارەكەتىن بانكتىڭ فەدەرالدى زاڭدار مەن رەتتەۋشىنىڭ نورماتيۆتىك اكتىلەرىن بۇزعانىمەن تۇسىندىرەدى.
«ءاۋ باستا بانكتىڭ بيزنەس-مودەلى تاۋەكەلى جوعارى وپەراسيالاردى جۇرگىزۋگە نەگىزدەلگەن ەدى. قارجى ينستيتۋتى زاڭدى بۇزدى، ازاماتتاردىڭ جەكە دەرەگىن ءجونسىز قولدانىپ، ولارعا ءقاۋىپ ءتوندىردى»، – دەدى وب وكىلى.
وسى وقيعاعا وراي QIWI Kazakhstan «ءبىز حالىقارالىق بيزنەستىڭ ءبىر بولىگىمىز، ءبىراق رەسەي بانكىمەن بايلانىسىمىز بار»،-دەپ مالىمدەدى. قازاقستاندىق كومپانيا QIWI توبى بيزنەستى حالىقارالىق جانە رەسەيلىك دەپ ەكىگە بولگەنىن جەتكىزدى.
«رەسەيدە QIWI Bank، Contact اقشا اۋدارىمدارى جۇيەسى، ROWI جانە Realweb كومپانيالار توبى، Flocktory قالدى. QIWI Kazakhstan QIWI PLC حالىقارالىق بيزنەسىنىڭ بولىگى بولىپ سانالادى جانە كومپانيا وسى باعدارلاما اياسىندا دامۋعا كۇش جۇمسايدى. سىزدەردىڭ سۇراقتارىڭىز كوپ ەكەنىن تۇسىنەمىز، قولىمىزعا قانداي دا ءبىر اقپارات تۇسكەن جاعدايدا، حابارلايمىز»،-دەدى كومپانيا وكىلى.
QIWI Kazakhstan قۇرامىنا 17،2 ميلليوننان استام ۆيرتۋالدى ءاميان، 181 مىڭنان استام تەرمينال، ونىڭ ىشىندە قازاقستانداعى 30 مىڭنان استام تولەم قابىلداۋ پۋنكتتەرى كىرەدى.