قاسىم-جومارت توقايەۆتىڭ اتىنا ناۋرىز مەرەكەسىنە وراي شەت مەملەكەتتەردىڭ باسشىلارىنان قۇتتىقتاۋلار كەلىپ ءتۇسىپ جاتىر. بۇل تۋرالى Almaty-akshamy.kz اقورداعا سىلتەمە جاساپ حابارلايدى.
جۇڭگو حالىق رەسپۋبليكاسىنىڭ ءتوراعاسى سي سزينپين ەل ۇكىمەتى مەن حالقىنىڭ، سونداي-اق ءوزىنىڭ اتىنان جولداعان قۇتتىقتاۋ جەدەلحاتىندا دوستاس قازاقستان حالقىنا باق-بەرەكە، ال قاسىم-جومارت توقايەۆقا زور دەنساۋلىق جانە ونىڭ جاۋاپتى جۇمىسىنا تابىس تىلەدى.
– مەن جۇڭگو جانە قازاقستان اراسىنداعى قارىم-قاتىناستىڭ دامۋىنا ايرىقشا ءمان بەرەمىن. ءسىزدىڭ قىتايعا مەملەكەتتىك ساپارمەن كەلەتىنىڭىزگە جانە بيىل مامىر ايىندا وتەتىن العاشقى "جۇڭگو – ورتالىق ازيا" سامميتىنە قاتىساتىنىڭىزعا قۋانىشتىمىن. ەكى ەلدىڭ ىنتىماقتاستىعىن ودان ءارى دامىتۋ، سونداي-اق جۇڭگو مەن ورتالىق ازيا اراسىنداعى بايلانىستى نىعايتۋ ماسەلەلەرى جونىندە وزىڭىزبەن پىكىر الماسامىز دەپ سەنەمىن، – دەپ جازىلعان سي ءسزينپيننىڭ جەدەلحاتىندا.
اقش پرەزيدەنتى دجو بايدەن قاسىم-جومارت توقايەۆتى جانە قازاقستان حالقىن ناۋرىز مەيرامىمەن جانە رامازان ايىنىڭ باستالۋىمەن قۇتتىقتادى.
– ەلدەرىمىزدىڭ اراسىنداعى ءوزارا ستراتەگيالىق سەرىكتەستىك پەن حالىقتارىمىزدىڭ دوستىق قارىم-قاتىناسى بۇكىل ايماقتاعى بەيبىتشىلىكتى ساقتاۋعا جانە ءوڭىردى وركەندەتۋگە سەپتىگىن تيگىزەدى. بۇگىن استانادان الماتىعا دەيىنگى جانە بۇكىل ەل تۇرعىندارى كوكتەمگى جاڭارۋ مەرەكەسىن تويلايدى. قازاقستاننىڭ جارقىن بولاشاعىن جانە ەلدە تەڭ قۇقىقتار مەن مۇمكىندىكتەردى قامتاماسىز ەتەتىن ءسىزدىڭ ساياسي جانە ەكونوميكالىق رەفورمالارىڭىزدى امەريكا قۇراما شتاتتارى ءاردايىم قولدايتىنىن راستايمىن. ناۋرىز قۇتتى بولسىن! ۇلىس وڭ بولسىن! – دەپ جازعان دجو بايدەن.