استانا قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا ق.بيشىمبايەۆتىڭ ءىسى بويىنشا القابيلەر القاسىنا كانديداتتاردى ىرىكتەيتىن جابىق وتىرىس ءجۇرىپ جاتىر.
وتىرىستا 12 ادامنان تۇراتىن (10 نەگىزگى جانە 2 قوسالقى) القابيلەر القاسى قۇرىلادى. وسىعان وراي، كەشە القابيلەر القاسىنا ىرىۋكتەۋ ءتارتىبى ءتۇسىندىرىلدى.
«قازاقستان رەسپۋبليكاسىنىڭ سوتى ەڭ الدىمەن ىستەردى زاڭدىلىق، زاڭ مەن سوت الدىنداعى بارلىعىنىڭ تەڭدىگى، تاراپتاردىڭ تەڭدىگى جانە اشىقتىق قاعيداتتارىن ساقتاۋعا باعىتتالعانىن اتاپ وتكىم كەلەدى.
وزدەرىڭىزگە ءمالىم، ق.بيشىمبايەۆقا قاتىستى سوت تالقىلاۋىنا قوعامنىڭ قىزىعۋشىلىعىنىڭ ارتقانىن ەسكەرە وتىرىپ، وسى ءىس بويىنشا اشىق سوت وتىرىستارىنان اشىق ونلاين-ترانسلياسيا ۇيىمداستىرۋ تۋرالى شەشىم قابىلداندى.
وسىلايشا، ونلاين-ترانسلياسيا ارقىلى كەز كەلگەن ادام، سونىڭ ىشىندە ب ا ق وكىلدەرى بۇل سوت پروسەسىنىڭ بارىسىن باقىلاي الادى»، — دەپ جازدى جوعارعى سوتتىق باسپا ءسوز قىزمەتى وكىلى پەريزات ءسادۋاقاس.
بۇل شەشىم سوت تالقىلاۋىنىڭ اشىق ءارى جاريالى بولعانىن جانە جالعاساتىنىن بىلدىرەدى.
پروسەسكە قاتىسۋشىلاردىڭ جانە قاتىسۋعا نيەت بىلدىرۋشىلەردىڭ كوپتىگىن ەسكەرە وتىرىپ، وتىرىستان ونلاين-ترانسلياسيا جۇرگىزىلەتىن قوسىمشا ەكى زال ۇيىمداستىرىلدى.