ءال-فارابي اتىنداعى قازاق ۇلتتىق ۋنيۆەرسيتەتىندە جاس كاسىپكەرلەر فورۋمى ءوتتى. سپيكەر رەتىندە نۇرلان سماعۇلوۆ، ارمانجان بايتاسوۆ، اسىلبەك قوجاحمەتوۆ، قايرات ماجىبايەۆ، گاۋحار قاپپاروۆا، نۇرجان جاڭابەكوۆ جانە باسقا دا كوپتەگەن تانىمال كاسىپكەرلەر ءسوز سويلەدى. ولار بيزنەس سالاسىنداعى جەتكەن جەتىستىكتەرى مەن ساتسىزدىكتەرى تۋرالى قاتىسۋشىلارعا كەڭىنەن ايتىپ بەردى. قازۇۋ مەن TAN Media Group ۇيىمداستىرعان فورۋم تاۋەلسىزدىكتىڭ 30 جىلدىعى مەن ق ر تۇڭعىش پرەزيدەنت كۇنىنە وراي ۇيىمداستىرىلدى.
شارانىڭ باسىندا ءال-فارابي اتىنداعى قازۇۋ-دىڭ باسقارما توراعاسى-رەكتورى جانسەيىت تۇيمەبايەۆ جينالعانداردى فورۋمنىڭ اشىلۋىمەن قۇتتىقتاپ، ماڭىزدىلىعىنا توقتالدى. ءوز سوزىندە ۋنيۆەرسيتەت باسشىسى جاس بۋىندى كاسىپكەرلىككە باۋلۋ ەل ەكونوميكاسىن دامىتۋ ءۇشىن وزەكتى ەكەنىن جەتكىزدى.
«تۇڭعىش پرەزيدەنتىمىز – ەلباسى نۇرسۇلتان نازاربايەۆ قىزمەتىنە كىرىسكەن العاشقى جىلدارى «الدىمەن-ەكونوميكا، سودان سوڭ-ساياسات» قاعيداسىن ۇستاندى. بۇل ءوز كەزەگىندە ەلىمىزدىڭ نارىقتىق ەكونوميكاعا كوشۋىنە، كاسىپكەرلىكتى دامىتۋعا، ەل ەڭسەسىن كوتەرۋگە جول اشتى. قازاقستان ەكونوميكاسىنىڭ تاۋەلسىزدىك جىلدارى باعىندىرعان بەلەس، العان اسۋىندا كاسىپكەرلىكتىڭ ۇلەسى زور. قازىرگى تاڭدا ءبىزدىڭ ەلىمىزدە جاس بيزنەسمەندەرگە جان-جاقتى قولداۋ كورسەتىلىپ كەلەدى. ماسەلەن، قازۇۋ-دا ەكونوميكا جانە بيزنەس جوعارى مەكتەبى جۇمىس ىستەيدى. جىل سايىن وسى جەردەن 500 باكالاۆر، ماگيستر جانە PhD دوكتورلارى وقۋلارىن ءتامامداپ شىعادى. بۇگىنگى ءوتىپ جاتقان فورۋمنىڭ جاس ماماندار ءۇشىن بەرەرى مول دەپ ەسەپتەيمىن»،– دەپ اتاپ ءوتتى جانسەيىت تۇيمەبايەۆ.
فورۋم اياسىندا ءسوز سويلەگەن كاسىپكەرلەردىڭ كوپشىلىگى - قازاق ۇلتتىق ۋنيۆەرسيتەتىنىڭ تۇلەكتەرى. سولاردىڭ ءبىرى - «Muzzone» مۋزىكالىق تەلەارناسىنىڭ جانە «TAN Media Group» ج ش س باسشىسى، ءال-فارابي اتىنداعى قازۇۋ ديرەكتورلار كەڭەسىنىڭ مۇشەسى ارمانجان بايتاسوۆ. ول ۋنيۆەرسيتەت قابىرعاسىندا وقىپ ءجۇرىپ-اق كاسىپكەرلىكپەن اينالىسقانىن ايتادى.
«قازۇۋ - ءبىزدىڭ الما-ماتەر. بۇگىنگى جيىنعا قاتىسۋشىلاردىڭ كوبى ستۋدەنت كەزىندە ءبىلىم مەن بيزنەستى قاتار الىپ جۇرگەندەر. 90-شى جىلدارى وتە قيىن بولدى. سوعان قاراماستان، بيزنەسكە دەگەن قىزىعۋشىلىعىمىزدىڭ ارقاسىندا وسىنداي جەتىستىككە جەتتىك. ال، قازىرگى جاستاردىڭ كاسىپپەن اينالاسۋىنا بارلىق مۇمكىندىكتەر قاراستىرىلعان. تەك كىتاپ وقىپ، وي-ورىستەرىن جەتىلدىرۋى قاجەت»،- دەيدى ۋنيۆەرسيتەت تۇلەگى.
سونداي-اق، فورۋمدا ءسوز سويلەگەن قازاقستاندىق بيزنەسمەن جانە قوعام قايراتكەرى، «RG Brands» جانە «Resmi Group» نەگىزىن قالاۋشى قايرات ماجىبايەۆ ساپالى ءبىلىم بەرۋدىڭ ماڭىزدىلىعىنا توقتالدى. ول ءوز كەزەگىندە ءبىلىمدى كاسىپكەر مول تابىسقا جەتەتىنىن ايتتى. سول سەبەپتەن، ول جاستاردى بيزنەس باستاۋدا قورىقپاۋعا شاقىردى.
سپيكەرلەر پايدالى اقپاراتپەن ءبولىسىپ قانا قويماي، قاتىسۋشىلاردىڭ سۇراقتارىنا جاۋاپ بەردى.
ءىس-شارا بارىسىندا ءال-فارابي اتىنداعى قازۇۋ مەن «TAN Media Group» ىنتىماقتاستىق تۋرالى مەموراندۋمعا قول قويدى.
سونىمەن قاتار، فورۋم اياسىندا 2 اپتا بۇرىن ۇيىمداستىرىلعان «Media café» بايقاۋىنىڭ قورىتىندىسى جاريالاندى. سايىستا ءۇش ادامنان قۇرالعان توپ، ياعني نۇرسۇلتان وڭداسىنوۆ، اسەم ەرلانوۆا، ءدىنامان سەرىكقان وزدەرىنىڭ كرەاتيۆتى جوبالارىن ۇسىنىپ، ءبىر جىل كوفەحانانى باسقارۋ گرانتىن جەڭىپ الدى. فورۋم ۇيىمداستىرۋشىلارى ۋنيۆەرسيتەت اۋماعىندا كوفەحانانىڭ قۇرىلۋىن تولىق قارجىلاندىرادى. وعان بارلىق قاجەتتى جابدىقتارمەن قامتاماسىز ەتۋ، وقىتۋ كىرەدى.
وسىلايشا، ۋنيۆەرسيتەت قابىرعاسىندا العاش رەت وتكەن فورۋمعا قاتىسا وتىرىپ، ستۋدەنتتەر پايدالى اقپارات الدى.
ءال-فارابي اتىنداعى قازۇۋ-دىڭ باسپا ءسوز قىزمەتى