ءال-فارابي اتىنداعى قازۇۋ-دىڭ ەكونوميكا جانە بيزنەس جوعارى مەكتەبىنىڭ قارجى جانە ەسەپ كافەدراسى ق ر عجبم گرانتتىق قارجىلاندىرۋ شەڭبەرىندە «قازاقستاننىڭ جاسىل ەكونوميكانى دامىتۋ جاعدايىندا ESG قارجى قۇرالدارىن ترانسفورماسيالاۋ» جوباسىن ىسكە اسىرۋدا.
جوبا قارجى جۇيەسىندە جاڭا ESG (environmental، social and governance) باعىتىن دامىتۋ ماقساتىندا «جاسىل» قارجى قۇرالدارىن زەرتتەۋگە ارنالعان، دەپ حابارلايدى Almaty-akshamy.kz عىلىم جانە جوعارى ءبىلىم مينيسترلىگىنە سىلتەمە جاساپ.
جوبا ەبجم قارجى جانە ەسەپ كافەدراسىنىڭ مەڭگەرۋشىسى، ەكونوميكا عىلىمىنىڭ كانديداتى، قاۋىمداستىرىلعان پروفەسسور اجار نۇرماعامبەتوۆانىڭ جەتەكشىلىگىمەن جۇزەگە اسىرىلۋدا. عالىمدار توبىندا ەكونوميكا عىلىمىنىڭ كانديداتى، قارجى جانە ەسەپ كافەدراسىنىڭ دوسەنتى م.ا. ءاليا نۇرعالييەۆا جانە دوكتورانت قارلىعاش قۇربانوۆا سياقتى بىلىكتى ماماندار بار.
«زەرتتەۋ اياسىندا ماڭىزدى ناتيجەلەرگە قول جەتكىزىلدى. جۇمىس بارىسىندا «جاسىل ەكونوميكا»، «جاسىل قارجى»، «ESG قۇرالدارى» جانە «ESG-تاۋەكەلدەر» ۇعىمدارىنىڭ ناقتىلانعان تۇسىندىرمەسى ازىرلەندى. سونداي-اق «جاسىل بانكينگ» تاجىريبەسى مەن بانكتەردىڭ تابىستىلىعى جانە «جاسىل بانكينگتىڭ» ارتىقشىلىعىن بەلگىلەۋ ماقساتىندا بىرنەشە سىزىقتىق رەگرەسسيانىڭ جەتىلدىرىلگەن مودەلىن قۇرۋ اراسىندا ءوزارا بايلانىس ورناتىلدى. قازاقستاننىڭ جاسىل ەكونوميكاعا كوشۋ مىندەتتەرىن ىسكە اسىرۋ كەزىندە دەلدالدار سانىن بارىنشا ازايتۋعا مۇمكىندىك بەرەتىن ESG قارجى قۇرالدارىن سيفرلاندىرۋعا باعىتتالعان وتاندىق جانە شەتەلدىك تاجىريبە جيناقتالدى»، – دەپ اتاپ ءوتتى جوبا جەتەكشىسى.
جوباعا قاتىسۋشىلاردىڭ عىلىمي ماقالالارى ق ر عىلىم جانە جوعارى ءبىلىم مينيسترلىگىنىڭ عىلىم كوميتەتى ۇسىنعان بەدەلدى، سونىڭ ىشىندە حالىقارالىق جۋرنالداردا جاريالاندى.
ىنتىماقتاستىق اياسىندا جوبا مۇشەلەرى «استانا» حالىقارالىق قارجى ورتالىعىنىڭ (احقو) جاسىل قارجى ورتالىعىمەن بىرلەسىپ جۇمىس ىستەدى. زەرتتەۋ توبى تۇراقتى دامۋ ماقساتتارىنا (تدم – 7، 8، 13، 17) قول جەتكىزۋ ءۇشىن قارجىلاندىرۋ قۇرالدارى مەن تەتىكتەرىن قاراستىرا وتىرىپ، «ورتالىق ازياداعى تۇراقتى قارجى نارىعى» تاقىرىبىندا بايانداما دايىندادى.
زەرتتەۋ ناتيجەلەرىن قارجى ۇيىمدارى، ەكىنشى دەڭگەيلى بانكتەر جاسىل قۇرالداردىڭ تيىمدىلىگىن باعالاۋ كەزىندە جانە احقو جاسىل قارجى ورتالىعى پايدالانا الادى. ورتالىق ازياداعى تۇراقتى قارجى نارىقتارى تۋرالى ەكى بىرلەسكەن تاقىرىپتىق باياندامانى شىعارۋ جوسپارلانۋدا.