ءال-فارابي اتىنداعى قازاق ۇلتتىق ۋنيۆەرسيتەتىندە جۇڭگو ۋنيۆەرسيتەتتەرىنىڭ كورمەسى ءوتتى. شارانى قازۇۋ مەن قحر ستيپەنديالىق كەڭەسى جانە الماتى قالاسىنداعى قحر باس كونسۋلدىعى ۇيىمداستىردى.
كورمەنىڭ اشىلۋىنا ق ر پرەزيدەنتىنىڭ كەڭەسشىسى مالىك وتاربايەۆ، ق ر عىلىم جانە جوعارى ءبىلىم ۆيسە-مينيسترى دارحان احمەت-زاكي، جۇڭگو ستيپەنديالىق كەڭەسى باس حاتشىسىنىڭ ورىنباسارى تيان لۋلۋ، قحر-دىڭ الماتىداعى باس كونسۋلى سزيان ۆەي، ءال-فارابي اتىنداعى قازۇۋ-دىڭ باسقارما ءتوراعاسى – رەكتورى جانسەيىت تۇيمەبايەۆ، قازۇۋ ديرەكتورلار كەڭەسىنىڭ ءتوراعاسى قايرات ءمامي، جۇڭگو جانە قازاقستان جوو-لارىنىڭ باسشىلارى مەن ءبىلىم الۋشى جاستار قاتىستى.
ق ر پرەزيدەنتىنىڭ كەڭەسشىسى مالىك وتاربايەۆ مەملەكەت باسشىسى قاسىم-جومارت توقايەۆتىڭ قۇتتىقتاۋىن جەتكىزىپ، شارانىڭ تابىستى وتۋىنە تىلەكتەستىك ءبىلدىردى. «قازاقستان مەن جۇڭگو مەملەكەتارالىق تىعىز قارىم-قاتىناس پەن حالىقارالىق بايلانىستىڭ جاڭا دەڭگەيىنە قادام باستى. مەملەكەت باسشىسى اعىمداعى جىلى قىتايعا ەكى رەت رەسمي ساپارمەن بارىپ، ءبىرقاتار كەلىسىمدەرگە قول جەتكىزدى. پرەزيدەنت ءوز سوزىندە اتاپ وتكەندەي، بۇگىنگى تاڭدا ەكى ەل اراسىندا ىنتىماقتاستىقتىڭ التىن 30 جىلدىعى باستالدى. ساۋدا-ساتتىق، مۇناي-گاز، كولىك-ترانزيت جانە جوعارى تەحنولوگيا سالالارىنداعى جان-جاقتى ىقپالداستىق ارتىپ جاتىر. سونىڭ ىشىندە عىلىم جانە جوعارى ءبىلىم سالاسىندا بىرلەسكەن ينۆەستيسيالىق جوبالار جۇزەگە اسىرىلۋدا»، – دەدى مالىك وتاربايەۆ.
ءوز كەزەگىندە دارحان احمەت-زاكي ق ر عىلىم جانە جوعارى ءبىلىم ءمينيسترى ساياسات نۇربەكتىڭ قۇتتىقتاۋ حاتىن وقىپ بەردى. قۇتتىقتاۋ حاتتا: «قازىرگى تاڭدا جوعارى ءبىلىم بەرۋ سالاسىندا جۇڭگو مەن قازاقستان سەرىكتەستىگى تاريحي مۇمكىندىكتەرگە، كەڭ جانە كەلەشەگى زور جوبالارعا تولى. بۇگىنگى قارا شاڭىراق قازۇۋ-دا ءوتىپ جاتقان كورمە وسىنىڭ ايقىن كورىنىسى. ۇيىمداستىرىلعان كورمە عىلىم مەن ءبىلىم بەرۋدى دامىتۋدا دا ۇلكەن ماڭىزعا يە. سونداي-اق قوس مەملەكەت اراسىندا ستۋدەنتتەر الماسۋعا، تاجىريبەمەن بولىسۋگە مۇمكىندىك بەرەدى»، – دەلىنگەن.
جيىندا ءال-فارابي اتىنداعى قازۇۋ-دىڭ باسقارما ءتوراعاسى – رەكتورى جانسەيىت تۇيمەبايەۆ ءسوز سويلەپ، جۇڭگو ۋنيۆەرسيتەتتەرى كورمەسىنىڭ قازۇۋ-دا ءوتۋى قازاقستاننىڭ ءبىلىم، عىلىم سالاسىنداعى ەلەۋلى وقيعا ەكەنىن اتاپ ءوتتى. «قازىرگى تاڭدا قازۇۋ قىتايدىڭ 51 جوعارى وقۋ ورنىمەن سەرىكتەستىك ورناتىپ، تىعىز جۇمىس ىستەۋدە. مەملەكەت باسشىسى قاسىم-جومارت توقايەۆتىڭ قىتايعا رەسمي ساپارى اياسىندا وقۋ ورداسىندا سولتۇستىك-باتىس پوليتەحنيكالىق ۋنيۆەرسيتەتىنىڭ فيليالىن اشۋ جونىندە كەلىسىمگە قول جەتكىزىلدى. اعىمداعى جىلدىڭ قازان ايىندا اتالعان فيليال اشىلىپ، جۇمىسىن باستادى. ماقسات – عىلىمي باعىتتا بىرلەسىپ زەرتتەۋ جۇمىستارىن جۇرگىزۋ، ستۋدەنت دايارلاۋ جانە وقىتۋشىلار الماسۋ. قازۇۋ جۇڭگو ۋنيۆەرسيتەتتەرىمەن بايلانىستى جانداندىرۋعا جانە نىعايتۋعا باعىتتالعان بارلىق جۇمىستاردى جالعاستىرا بەرەدى»، – دەدى رەكتور جانسەيىت قانسەيىت ۇلى.
جيىن سوڭىندا قاتىسۋشىلار كورمەنى ارالاپ، جۇڭگو مەن قازاقستان دەلەگاسياسى شاعىن قۇرامدا كەلىسسوز جۇرگىزدى. تاراپتار سەرىكتەستىكتى نىعايتۋعا، ءبىلىم مەن عىلىم سالاسىنداعى بايلانىستاردى تەرەڭدەتۋگە باسا ءمان بەرە وتىرىپ، ەكى ەل ۋنيۆەرسيتەتتەرى اراسىنداعى قارىم-قاتىناستىڭ قازىرگى جاي-كۇيى مەن دامۋ پەرسپەكتيۆاسىن جان-جاقتى تالقىلادى.