جيىندا ورتا ءبىلىم بەرۋ ساپاسىن ارتتىرۋدىڭ نەگىزگى اسپەكتىلەرى مەن وقۋ ءۇردىسىن وڭتايلاندىرۋ ادىستەرى تالقىلاندى.
2023 جىلدىڭ 9 جەلتوقسانىندا اباي ۋنيۆەرسيتەتىندە ق ر پەداگوگيكالىق عىلىمدار اكادەمياسىنىڭ پرەزيدەنتى، اباي اتىنداعى قازۇپۋ-دىڭ پروفەسسورى اسقاربەك قۇسايىنوۆتىڭ «ورتا ءبىلىم بەرۋ ساپاسىن كوتەرۋدىڭ عىلىمي-پراكتيكالىق نەگىزدەرى» مونوگرافياسىنىڭ تۇساۋكەسەرى ءوتتى، دەپ حابارلايدى Almaty-akshamy.kz
ءىس-شاراعا ق ر وقۋ-اعارتۋ ءمينيسترى عاني بەيسەمبايەۆ، اباي اتىنداعى قازۇپۋ، قازقىزپۋ، ابىلاي حان اتىنداعى قازحق جانە ءاتۋ، ءال-فارابي اتىنداعى قازۇۋ وكىلدەرى، سونىمەن قاتار كوللەدج وقىتۋشىلارى مەن مەكتەپ ديرەكتورلارى قاتىستى.
عاني بەيسەمبايەۆ مونوگرافيا اۆتورىن قۇتتىقتاپ، پەداگوگيكالىق جوعارى وقۋ ورىندارىنىڭ ەلىمىزدەگى بارلىق مەكتەپتەرگە پەداگوگ كادرلارىن دايارلاۋداعى رولىنە توقتالدى. ۇلتتىق بايانداما جوباسىنىڭ ءبىلىم بەرۋدى دامىتۋعا باعىتتالعان نەگىزگى قۇجات ەكەنىن ايتا كەلە، مينيستر ءبىلىم سالاسىنداعى قولجەتىمدىلىك پەن تەڭدىكتى قامتاماسىز ەتۋ، قولايلى ءبىلىم بەرۋ ورتاسىن قۇرۋ جانە ادامي كاپيتالدى دامىتۋدى قامتيتىن ورتاق مىندەتتەردى جۇزەگە اسىرۋ جولىنداعى ەكى مينيسترلىكتىڭ بىرلەسكەن جۇمىسىن ەرەكشە اتاپ ءوتتى.
ق ر عىلىم جانە جوعارى ءبىلىم مينيسترلىگى مەن وقۋ-اعارتۋ مينيسترلىگى اراسىندا جاقىندا قول قويىلعان مەموراندۋم اياسىندا جوعارى وقۋ ورىندارىنىڭ رەكتورلارى مەن ءبىلىم باسقارمالارىنىڭ باسشىلارى ءبىلىم بەرۋ ساپاسىن ارتتىرۋ جانە جوعارى بىلىكتى پەداگوگ كادرلاردى دايارلاۋ بويىنشا بەلسەندى جۇمىس اتقارىپ جاتقانى ايتىلدى. سونداي-اق بىرلەسكەن عىلىمي زەرتتەۋلەر جۇرگىزىلىپ، ءبىلىم جانە عىلىم سالالارىندا ىنتىماقتاستىق ورناتۋ باستامالارى جۇزەگە اسىرىلاتىن بولادى.
مونوگرافيانىڭ تۇساۋكەسەر راسىمىندە ورتا ءبىلىم بەرۋ ساپاسىن ارتتىرۋدىڭ نەگىزگى اسپەكتىلەرى مەن وقۋ ءۇردىسىن وڭتايلاندىرۋ ادىستەرى تالقىلاندى. سونداي-اق تۇراقتى دامۋعا قول جەتكىزۋ ءۇشىن مەكتەپتەر مەن جوعارى وقۋ ورىندارى اراسىنداعى ءوزارا ىنتىماقتاستىق ورناتۋدىڭ ماڭىزدىلىعى ەرەكشە اتاپ ءوتىلدى. قاتىسۋشىلار پروفەسسور اسقاربەك قۇسايىنوۆتىڭ مونوگرافياسىنىڭ عىلىمي-تاجىريبەلىك قۇندىلىعىن جوعارى باعالاپ، بۇل ەڭبەكتى رەسپۋبليكا بويىنشا ءبىلىم بەرۋ ۇيىمدارىندا – مەكتەپتەردە، پەداگوگيكالىق كوللەدجدەر مەن جوعارى وقۋ ورىندارىندا تالقىلاۋدى ۇسىندى.