قازپوشتا «قورعاس» اۋماعىندا بوند قويماسىن اشادى

قويما ەۋروپالىق وداق پەن ورتالىق ازيا ەلدەرىنە حالىقارالىق پوشتا جونەلتىلىمدەرىن قابىلداپ، ترانزيتپەن جىبەرە الادى

"قازپوشتا" قازاقستاننىڭ ترانزيتتىك الەۋەتىن دامىتىپ، "قورعاس" شىحو اۋماعىندا بوند قويماسىن اشادى، دەپ حابارلايدى Almaty-akshamy.kz inbusiness.kz-كە سىلتەمە جاساپ.

قويما ەۋروپالىق وداق پەن ورتالىق ازيا ەلدەرىنە حالىقارالىق پوشتا جونەلتىلىمدەرىن قابىلداپ، ترانزيتپەن جىبەرە الادى.

قازاقستاندىق بوندتىڭ قىزمەتتەرى ەلدەر اراسىنداعى تاۋار اينالىمىن ۇلعايتادى جانە تاۋارلاردى ەو جانە وا ەلدەرىنە جەتكىزۋ جىلدامدىعىن ەداۋىر قىسقارتادى. ايتا كەتەيىك، ەۋروپا ەلدەرىنە اۆيا جەتكىزۋ مەرزىمى 2-3 كۇنگە دەيىن، اۆتوموبيل كولىگىمەن جەتكىزۋ مەرزىمى 7-12 كۇنگە دەيىن قىسقارادى.

"قازپوشتا لوگيستيكالىق ينفراقۇرىلىمدى دامىتۋدى جانە جەتىلدىرۋدى جالعاستىرا بەرەدى. "قورعاس" شىحو-دا اشىلاتىن بوند قويماسى سينگاپۋر مەن دۋبايدىڭ ۇلگىسى بويىنشا جۇمىس ىستەيتىن بولادى. وسىنداي الاڭنىڭ اشىلۋىنىڭ ارقاسىندا ءبىز قازاقستاننىڭ ترانزيتتىك الەۋەتىن دامىتىپ، ينۆەستيسيا تارتۋ ءۇشىن قولايلى جاعداي جاسايمىز، ناتيجەسىندە جاڭا جۇمىس ورىندارىن قۇرۋعا كومەكتەسەمىز"، – دەدى "قازپوشتا" اق باسقارما ءتوراعاسى اسەل جاناسوۆا.