بۇل ازاماتتاردىڭ ءىسى بويىنشا مەملەكەتتىك ادۆوكات جۇمىس ىستەپ جاتىر
وڭتۇستىك كورەياعا زاڭسىز كىردى دەپ كۇدىككە ىلىنگەن قازاقستاننىڭ ەكى ازاماتىنىڭ ءىسى سوتقا جولداندى. بۇل تۋرالى سىرتقى ىستەر مينيسترلىگىنىڭ رەسمي وكىلى ايبەك سمادياروۆ ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«كورەياداعى ءبىزدىڭ ازاماتتارمەن ەلمىزدىڭ كونسۋلى كەزدەستى. ۋاقىتشا تەرگەۋ يزولياتورىندا ۇستاۋ بويىنشا ولاردىڭ شاعىمدارى جوق. ۇستالعان ادامداردىڭ تۋىستارىمەن تۇراقتى بايلانىستامىز. پروكۋراتۋرا ءىستى سوتقا جولدادى. سوتتىڭ العاشقى وتىرىسى مامىر ايىنىڭ ورتاسىندا ءوتۋى مۇمكىن»، - دەدى ا. سمادياروۆ ەلورداداعى باسپا ءسوز ءماسليحاتىندا تىلشىلەر سۇراعىنا جاۋاپ بەرە وتىرىپ.
ونىڭ ايتۋىنشا، بۇل ازاماتتاردىڭ ءىسى بويىنشا مەملەكەتتىك ادۆوكات جۇمىس ىستەپ جاتىر.
ەسكە سالايىق، ناۋرىزدىڭ سوڭىندا ەكى وتانداسىمىز وڭتۇستىك كورەياعا كىرۋگە تىيىم سالىنعانىنا قاراماستان اتالعان ەلگە زاڭسىز اياق باسقانى تۋرالى حابارلاعان ەدىك.
10 ءساۋىر كۇنى وڭتۇستىك كورەياعا زاڭسىز كىرگەن جەرلەستەرىمىز تەرگەۋ يزولياتورىندا قاماۋدا وتىرعانى بەلگىلى بولدى.