Facebook الەۋمەتتىك جەلىسىندە الاياقتاردىڭ جارناماسى تاعى دا تارالدى.
وندا جاڭا مەملەكەتتىك باعدارلاما اياسىندا بارلىق قازاقستاندىقتارعا قوسىمشا تولەمدەر تولەنەتىنى تۋرالى ايتىلعان. بۇل اقپاراتقا سەنبەگەن ءجون، دەپ حابارلايدى Almaty-akshamy.kz.
الاياقتار ەسكى ءتاسىلدى قولدانىپ وتىر: ۆيدەو جالعان داۋىسپەن دىبىستالعان. ال سەنىمدىرەك بولۋى ءۇشىن كۇنىن 2024 جىلعى 22 ءساۋىر دەپ كورسەتىلگەن.
شىن مانىندە، تارالعان ۆيدەودا بىر-بىرىمەن بايلانىسى جوق جاڭالىقتار سيۋجەتتەرى ۇسىنىلعان.
ەكرانداعى باستاپقى cۋرەت «مير» تەلەارناسىنىڭ» ۆمەستە» باعدارلاماسىنان الىنعان. ۆيدەودا ونىڭ جۇرگىزۋشىسى ەكاتەرينا ابراموۆا دا كورسەتىلگەن. تەلەارنانىڭ سايتىندا تۇرعىندارعا ديۆيدەندتەر تولەنەتىن قازاقستاندىق جاڭا مەملەكەتتىك باعدارلاما تۋرالى اقپارات جوق.
تاعى ءبىر ءۇزىندى – قازاقستان پرەزيدەنتى قاسىم-جومارت توقايەۆتىڭ توراعالىعىمەن وتكەن سىبايلاس جەمقورلىققا قارسى ءىس-قيمىل ماسەلەلەرى جونىندەگى كەڭەس وتىرىسى. تولىق ۆيدەوسى 2019 جىلعى 20 مامىردا Astana TV تەلەارناسىنىڭ سايتىندا ورنالاستىرىلعان. وندا قازاقستاندىقتارعا تولەنەتىن قوسىمشا تولەمدەر تۋرالى ايتىلمايدى.
مەملەكەت باسشىسىنىڭ رەسمي سايتىندا دا جاڭا تولەمدەر تۋرالى جارلىقتار جوق.
ق ر ەڭبەك جانە حالىقتى الەۋمەتتىك قورعاۋ مينيسترلىگىنىڭ رەسمي پورتالىندا دا الەۋمەتتىك قولداۋدىڭ جاڭا شارالارى تۋرالى جازىلماعان.
الاياقتار جوق تولەمدەردى تولەيمىز دەپ بۇرىن دا ايتىپ كەلگەن. بەيتانىس رەسۋرستاردا جەكە دەرەكتەردى قالدىرماڭىزدار. ولاردى الاياقتار يەمدەنىپ، ءوز ماقساتىندا پايدالانۋى مۇمكىن.