مۇنداي مارتەبەنى قازاقستاننىڭ 17 وبلىسى مەن ءۇش مەگاپوليسىندە ورنالاسقان 20 ۇزدىك ورىنعا بارعان ساياحاتشى يە بولا الادى.
ەڭ باستى مىندەت - تۋريست بەلگىلەنگەن ورىندارعا جاي بارىپ قانا قويماي، سوندا ورناتىلعان فوتوزوناعا ارنايى سۋرەتكە ءتۇسىپ، الەۋمەتتىك جەلىگە «Neonomad2022» حەشتەگىمەن سۋرەتتى جۇكتەۋى ءتيىس، دەپ حابارلايدى Almaty-akshamy.kz Qazaqtv.com سايتىنا سىلتەمە جاساپ.
ونداي فوتوعا تۇسەتىن العاشقى ورىن ءقازىر ەلورداداعى «نۇرلى جول» بۋلۆارىندا پايدا بولدى.
«بۇل اكسيا - العاشقى قادامداردىڭ ءبىرى عانا. ءبىرىنشى وسىنداي فوتورامكالار، كەيىن كۆەست ويلاپ تابۋ جوسپارىمىزدا بار. مىسالى، بۇگىن ول ورناتىلعان 20 فوتوزونانىڭ جانىنا فوتوعا ءتۇسۋ بولۋى مۇمكىن، ەرتەڭ ۇلتتىق پاركتەردىڭ بارلىعىنا بار، ال كەيىن ءتىپتى ۇلتتىق ساياباقتارداعى قوقىس تازالاۋ بولۋى مۇمكىن. ءقازىر فوتورامكالار تەك بىرنەشە قالالاردا ورنالاستىرىلدى، ءبىراق جەرگىلىكتى اكىمدىكتەر، جەكە سەرىكتەستەرىمىز بىزگە قولداۋ كورسەتۋدە. 1 تامىزعا دەيىن بارلىق 20 فوتورامكانى ورناتىپ ۇلگەرەمىز دەپ ۋادە ەتىلدى»، - دەدى «Kazakh Tourism» ۇك اق باسقارما ءتوراعاسى تالعات امانبايەۆ.
«نەونوماد-2022» اكسياسىنىڭ العاشقى قاتىسۋشىلارىنىڭ ءبىرى - 72 جاستاعى جيھانكەز سارسەنباي قوتىراشيەۆ بولدى. ەلورداعا جاياۋ جەتكەن قاريا بىردەن باس شاھاردىڭ كورىكتى ورىندارىن ارالاپ، ەستەلىك سۋرەتكە ءتۇستى. ءقازىر ەلوردانىڭ تورىندە ورنالاسقان فوتوعا تۇسۋگە ارنالعان ورىن كۇن ساناپ جۇزدەگەن قالا تۇرعىندارى مەن قوناقتارىنىڭ قىزىعۋشىلىعىن وياتۋدا.
جوبانىڭ قورىتىندىسى تەك جىل سوڭىنا قاراي بەلگىلى بولادى. دەگەنمەن، شارا جىل سايىن ءوز جالعاسىن تابادى. سوندىقتان «قازىرگى زامانعى كوشپەندى» مارتەبەسىن بولاشاقتا كەز كەلگەن ساياحاتشى الا الادى.