قازاقستان اجىراسۋ كورسەتكىشى بويىنشا الەمدە ەكىنشى ورىندا تۇر. نەگە؟ قانشا جىلدىق تاريحى بار بەرىك وتباسى ينستيتۋتى نە ءۇشىن السىرەپ بارادى؟ Aqshamnews.kz ءتىلشىسى وسى سۇراقتارعا جاۋاپ ىزدەپ، وتباسىلىق گەشتالت-تەراپيەۆت، پسيحولوگ ۇلمەكەن ساندىبەكقىزىمەن اڭگىمە ءوربىتتى.
ۇلمەكەن ساندىبەك قىزى
پسيحولوگ، گەشتال-تەرپايەۆت
ادەتتە جۇرتتار نە سەبەپتى اجىراسادى؟
پسيحولوگ وتباسىلىق ماسەلەمەن كەلەتىن جۇپتاردىڭ داۋلاساتىن سەبەپتەرى ءارتۇرلى كەلەتىنىن ايتتى.
"ءبىرى ءوزىنىڭ دۇرىس ەكەنىن دالەلدەۋ ءۇشىن كەلەدى. ەكىنشىسى - شىن مانىندە وتباسىن ساقتاپ قالعىسى كەلەتىندەر. ءبىراق قۇلاق اسپاۋ، سەزىمگە سالقىن بولۋ قارىم-قاتىناستى ءجيى بۇزادى"، - دەيدى پسيحولوگ.
ونىڭ تاجىريبەسىندە اجىراسۋعا الىپ كەلەتىن 5 نەگىزگى سەبەپ بار:
-
بىر-بىرىنە، قۇلاق اسپاۋ؛
-
تەك ەرلەر ەمەس، ايەلدەر تاراپىنان دا كوزگە ءشوپ سالۋ؛
-
تاۋەلدىلىك (ماسكۇنەمدىك، قۇمار ويىن ت.ب.)؛
-
پسيحولوگيالىق، ەموسيالىق قىسىم؛
-
وتباسىنداعى داعدارىس، قاجۋ، جاڭاشا بايلانىس ورناتا الماۋ.
"قارجى جەتىسپەۋشىلىگى دە بار، ءبىراق وندايلار ادەتتە تەك ءبىر رەت كەلەدى. نەگىزگى پروبلەما - ەموسيالىق ساۋاتسىزدىق"، - دەيدى ول.
"بارىنە ايەل كىنالى": بۇل قايدان شىققان تۇسىنىك؟
قوعامدا "ايەل شىداۋى كەرەك، ءبارى ايەلگە بايلانىستى" دەگەن ۇستانىم ءالى بار. ءبىراق پسيحولوگ مۇنى قاتە تۇسىنىك دەيدى.
"ەر ادامعا كوزگە ءشوپ سالۋعا بولادى، ال ايەل جاساسا كاتاستروفالىق قاتە دەگەن تۇسىنىك ءالى بار. بۇل - ۇرپاقتان-ۇرپاققا جالعاسىپ كەلە جاتقان جالعان سەنىم. وتباسى 50/50 جاۋاپكەرشىلىك الىپ، قۇرىلعاندا عانا مىقتى بولادى"، - دەپ قوستى مامان.
ونىڭ ايتۋىنشا، كوپ اجىراسۋ "جۇرت ايتتى" دەپ اسىعىس قۇرىلعان نەكەنىڭ سالدارىنان دا بولادى.
بۇرىن "شىدا" دەيتىندەر، ءقازىر "الدىمەن ءوزىڭدى ويلا" دەگەنگە قالاي كوشتى؟
بۇگىندە جاستار اراسىندا وتباسىلىق قۇندىلىقتار وزگەردى. بۇرىن ايەل كوبىنە قاتىگەزدىككە دە، قورلىققا دا ءۇنسىز شىدادى. ءقازىر جاعداي باسقاشا. ۇلمەكەن حانىمنىڭ ايتۋىنشا، بۇل تۇسىنىكتەردىڭ وزگەرۋىنە زاماننىڭ دامۋى دا اسەر ەتىپ جاتىر.
“ەتى سەنىكى، سۇيەگى مەنىكى” دەگەن زامان ارتتا قالدى. ءقازىر ادام ءوز قۇنىن بىلەدى. ايەل ءجابىر كورسە، ول تەك ءوزىن ەمەس بولاشاق ۇرپاعىن جارالايدى. ءبىر كۇن انا اۋىرسا، بۇكىل ءۇيدىڭ بەرەكەسى كەتەدى. سوندىقتان ايەلدىڭ ساۋلىعى - وتباسىنىڭ اماندىعى"، - دەيدى ۇلمەكەن ساندىبەك قىزى.
قاي جاستا وتباسىن قۇرعان دۇرىس؟
ءقازىر جاستار بۇرىنعىدان كەش ۇيلەنەدى. بۇل دۇرىس پا؟
"بيولوگيالىق جاس ەشتەڭەنى شەشپەيدى. ءبىراق ورتا ەسەپپەن قىزدار ءۇشىن 25–30 جاس، جىگىتتەر ءۇشىن 28–35 جاس - سانالى نەكە جاسى. ادام “نە ءۇشىن ۇيلەنەمىن؟” دەگەن سۇراققا جاۋاپ بەرە العاندا عانا وتباسىن قۇرعانى دۇرىس"، - دەيدى پسيحولوگ.
كەيىنگى جىلدارى قىزداردىڭ "الدىمەن ءۇي، كولىك الىپ الايىن" دەۋى دە بەكەر ەمەس دەيدى مامان:
"ءار ادام قاۋىپسىزدىك پەن سەنىم ىزدەيدى. تاۋەلسىز ايەل باقىتسىز وتباسى قۇرمايدى"، - دەدى ۇلمەكەن ساندىبەك قىزى.
ەسكە سالايىق، ءقازىر ەل اراسىندا تانىمال ازىلكەش تۇرسىنبەك قاباتوۆ پەن جارى ءمولدىر مۇقاننىڭ اجىراسۋى تالقىلانىپ جاتىر.