قازدان قاشقان ءۇش جاسار كەرەي ماحامبەت ۇلى از ۋاقىت ىشىندە الەم جۇلدىزىنا اينالدى. ونىڭ ۆيدەوسى ءتىپتى امەريكالىق رەپەر Snoop Dogg رەپوست جاساپ، جەلىنى شۋلاتتى. اqshamnews.kz ءتىلشىسى جۇلدىزدىڭ اكەسىمەن سۇحباتتاستى.
كەرەي قالاي جۇلدىزعا اينالدى؟
كەرەيدىڭ اكەسى ماحامبەتتىڭ ايتۋىنشا، ءبارى ءبىر ساتتە بولعان وقيعا.
"قۇلىنعا جەم بەرىپ كەلە جاتقانبىز. بالام ارتتا قالىپ قويدى. قازدار ونىڭ قولىنداعى شەلەكتى تاماق دەپ ويلاپ، سوڭىنان جۇگىرگەن. ال ول قورقىپ قاشا باردى. سول ءساتتى ۆيدەوعا ءتۇسىرىپ، 9 تامىزدا جەلىگە سالعان ەدىم. ءبىر اپتادا-اق 100 ميلليون قارالىمعا جەتتى. ءقازىر Instagram-دا 150 ميلليونعا، ال TikTok-تا 50 ميلليونعا جۋىقتادى"، – دەيدى اكەسى.
جەلى قولدانۋشىلارى كىشكەنتاي كەرەيدى "قاز قۋعان بالا" دەپ اتاپ كەتكەن. شەتەلدىكتەر دە، وزگە قازاقتار دا بالاعا ءتانتى بولىپ، پىكىر قالدىرىپ جاتىر. ۆيدەو 12 ميلليون لايك پەن 55 مىڭ پىكىر جيناپ ۇلگەرگەن.
كەرەي كىم؟
ءۇش جاستاعى كەرەي اقتوبەدەگى كۇنشۋاق شاعىناۋدانىندا تۇرادى. بالاباقشاعا بارىپ ءجۇر. اكەسى - مەكتەپتەگى دەنە شىنىقتىرۋ ءپانىنىڭ ءمۇعالىمى، ال ۇيىندە جىلقى، قاز، پوني باعىلادى. بالاپان كەزىنەن جان-جانۋاردىڭ ورتاسىندا وسكەن كەرەي نەگىزى قازدان قورىقپايدى ەكەن. ءبىراق سول كۇنى ارتىنان قۋالاعان قازدىڭ ارقاسىندا جۇلدىزعا اينالدى.
كەرەيدىڭ ەكى باۋىرى بار. اكەسى بالالارىنىڭ بەينەجازباسىن ءجيى ءتۇسىرىپ، الەۋمەتتىك جەلىگە سالىپ جۇرەدى.
"ەندى الەۋمەتتىك جەلىنى كاسىبي تۇردە دامىتقىم كەلەدى"، – دەيدى ول.
اكەسىنىڭ ايتۋىنشا، الەمدىك رەپەر رەپوست جاساعان سوڭ، وعان جازىپ، ۆيدەونىڭ ءتۇپنۇسقاسىن سۇرايتىندار كوبەيگەن.
"ونىڭ 88 ميلليون وقىرمانى بار. الەمنىڭ تۇكپىر-تۇكپىرىنەن ۆيدەونىڭ ءتۇپنۇسقاسىن اقشاعا ساتىپ الۋدى سۇراپ جازىپ جاتىر. قۇجاتتار دا جىبەرىپ جاتىر، ءبىراق ونى تۇگەل اۋدارىپ، ءتۇسىنۋ كەرەك"، – دەدى ول.
العاشقى ۇسىنىستار
ۆيدەودان كەيىن كەرەيگە العاشقى ۇسىنىستار دا ءتۇسىپتى.
"قولىنداعى شەلەكتى كوردىڭىز بە؟ سول كومپانيا 75 ليتر ءونىم بەردى. باسقا ۇسىنىستار ازىرگە تۇسكەن جوق"، – دەيدى اكەسى كۇلىپ.
قازاقتىڭ كىشكەنتاي اتقۇمارى
كەرەي اتقا ءمىنۋدى ەرەكشە جاقسى كورەدى.
"كىشكەنتايىنان جىلقىعا اۋەس. جانۋارمەن بىرگە وسكەن سوڭ، تابيعاتقا جاقىن"، – دەيدى اكەسى.
كىشكەنتاي عانا ءبىر ءسات ميلليونداعان ادامنىڭ كوڭىلىن كوتەردى. اقتوبەنىڭ شاعىناۋدانىنان باستالعان وقيعا بۇگىندە بۇكىل الەمگە تارادى.
"تۋعان-تۋىس، دوستار، ءتىپتى دۇكەندەگىلەر دە تانىپ جاتىر. بازارعا بارعاندا "بۇل قازدان قاشقان بالا ەمەس پە؟" دەپ جاتىر"، - دەيدى ماحامبەت مىرزا.