مەملەكەت باسشىسىنىڭ سپورتتىق ينفراقۇرىلىمدى جانە بۇقارالىق سپورتتى دامىتۋ جونىندەگى تاپسىرمالارى اياسىندا الماتىدا حالىقارالىق دەڭگەيدەگى جاڭا فۋتبول ستاديونىن سالۋ جوسپارلانىپ وتىر. جۇمىس ساپارى بارىسىندا قالا اكىمى دارحان ساتىبالدى جوبامەن تانىستى.
جوبالاۋشىلاردىڭ مالىمەتىنشە، ستاديون 35 مىڭ كورەرمەنگە ەسەپتەلىپ، ۋەفا-نىڭ 4-سانات تالاپتارىنا ساي بولادى. جوبادا جاتتىعۋ بازالارى، جانكۇيەرلەرگە ارنالعان دەمالىس ايماقتارى، زاماناۋي قاۋىپسىزدىك جۇيەسى جانە ىرگەلەس اۋماقتى اباتتاندىرۋ قاراستىرىلعان.
الماتى اكىمى جوبانى ىسكە اسىرۋ قالالىق ينفراقۇرىلىمدى دامىتۋدا ماڭىزدى قادام ەكەنىن اتاپ ءوتتى. حالقى 2 ميلليوننان اساتىن ەلىمىزدىڭ ەڭ ءىرى مەگاپوليسى ءوسىپ كەلەدى، تۇرعىنداردىڭ، اسىرەسە جاستار مەن ستۋدەنتتەردىڭ سپورت پەن سالاۋاتتى ءومىر سالتىنا قىزىعۋشىلىعى كۇننەن-كۇنگە ارتىپ وتىر. وسى ورايدا حالىقارالىق دەڭگەيدەگى زاماناۋي ارەنانىڭ سالۋدىڭ ماڭىزى ەرەكشە.
«وزدەرىڭىز بىلەسىزدەر، پرەزيدەنتتىڭ تاپسىرماسى بويىنشا جۇمىستى جەدەلدەتۋىمىز قاجەت. كەلەر جىلى قۇرىلىس-مونتاج جۇمىستارىن باستاۋ كەرەك. بولاشاقتا بۇل جەردە مەترو بەكەتىن جانە الماتىنىڭ لوگيستيكالىق حابىن سالۋ جوسپارلانعان»، – دەدى قالا اكىمى دارحان ساتىبالدى.
جاڭا ستاديوندى قۇلجا تاس جولى مەن تالعار تاس جولىنىڭ اراسىندا سالۋ جوسپارلانعان. جوبا جۇزەگە اساتىن اۋماقتىڭ كولەمى شامامەن 15 گەكتار. بۇل جەر قالانىڭ ماڭىزدى كولىك-لوگيستيكالىق تورابىنا اينالىپ، ارەنانى قالالىق ينفراقۇرىلىمعا ءتيىمدى كىرىكتىرۋگە مۇمكىندىك بەرەدى. مۇنداي شەشىم كورەرمەندەر مەن قوناقتارعا ىڭعايلى بولۋى ءۇشىن ءىرى سپورت نىساندارىن كولىك حابتارىنىڭ ماڭىنا ورنالاستىرۋ جونىندەگى الەمدىك تاجىريبەگە ساي كەلەدى.
جوبانى تانىستىرۋ كەزىندە قالا اكىمى كولىك قولجەتىمدىلىگىن قامتاماسىز ەتۋ، اۆتوتۇراق ورىندارىن ۇيىمداستىرۋ جانە نىساندى قالالىق ورتاعا قوسۋ ماسەلەلەرىن پىسىقتاۋدى تاپسىردى. سونداي-اق، دارحان ساتىبالدى 65 جىلدان استام بۇرىن سالىنعان ورتالىق ستاديون ساقتالىپ، جەڭىل اتلەتيكا ينفراقۇرىلىمى ەسكەرىلە وتىرىپ جاڭعىرتىلاتىنىن، ءارى قاراي دا الماتىداعى سپورت تاريحىنىڭ ءبىر پاراسى بولىپ قالا بەرەتىنىن ايتتى.