الماتى اكىمى دارحان ساتىبالدى ينجەنەرلىك جەلىلەردىڭ قۇرىلىسى جانە قالانىڭ جۇيەلەرى مەن ينفراقۇرىلىم نىساندارىن كۇزگى-قىسقى كەزەڭگە دايىنداۋ ماسەلەلەرى بويىنشا كەڭەس وتكىزدى.
كەڭەستە ينجەنەرلىك ينفراقۇرىلىمنىڭ ۇزدىكسىز جۇمىسىن قامتاماسىز ەتۋ ءىس-شارالارى قارالدى. سۋ جانە ەنەرگەتيكا باسقارماسىنىڭ باسشىسى نۇرباقىت سەرىكباي سۋ قۇبىرى مەن كارىز جەلىلەرىندەگى جوندەۋ جۇمىستارى تۋرالى باياندادى.
«25 تامىزدان باستاپ روزىباكييەۆ پەن بايقاداموۆ كوشەلەرىنىڭ قيىلىسىندا، سونداي-اق ساتپايەۆ – بايتۇرسىن ۇلى، بۇقار جىراۋ – ماركوۆ جانە بەكماحانوۆ كوشەلەرىندە كولىك قوزعالىسى اشىلدى. 1 قىركۇيەككە دەيىن لاۆرەنيەۆ پەن عابدۋللين كوشەلەرىندە قوزعالىس قايتا جاندانادى. ال جامبىل جانە جاروكوۆ كوشەلەرىندە قوزعالىس 7 قىركۇيەككە دەيىن اشىلادى»، – دەدى نۇرباقىت سەرىكباي.
سونىمەن قاتار كەڭەستە «تاماريكس»، «ساكۋرا» جانە «التىن سيتي» تۇرعىن ءۇي كەشەندەرىندەگى ماسەلەلەر قارالدى. بۇل جەردە قۇرىلىس كومپانيالارىمەن بىرلەسىپ جىلۋ قازاندىقتارىن ىسكە قوسۋ جۇمىستارى جۇرگىزىلۋدە.
قالا اكىمى دارحان ساتىبالدى يەسىز مودۋلدىك قازاندىقتاردىڭ جۇمىسىن ەرەكشە باقىلاۋعا الۋدى تاپسىردى. ونىڭ ايتۋىنشا، جاۋاپتى مەكەمەلەردىڭ بولماۋى جىلۋمەن قامتۋدا اقاۋلارعا اكەلمەۋى ءتيىس.
بۇدان بولەك، مەردىگەر ۇيىمدارمەن ءوزارا جۇمىس ماسەلەلەرى تالقىلاندى. اكىم قازىلعان جەرلەردەگى جول جابىندىسىن قىسقا مەرزىمدە قالپىنا كەلتىرۋدى مىندەتتەدى.
كەڭەس قورىتىندىسىندا دارحان ساتىبالدى كۇزگى-قىسقى كەزەڭگە دايىندىق — اكىمدىكتىڭ باستى باعىتتارىنىڭ ءبىرى ەكەنىن اتاپ ءوتتى. بارلىق ءىس-شارالاردىڭ ورىندالۋى تۇراقتى باقىلاۋدا بولادى.