بۇل رەتتە ۆاكسينانىڭ اشىلعان قۇتىسىن 4 ساعاتقا دەيىن ساقتاۋعا جول بەرىلەدى.
ق ر باس سانيتار دارىگەرى ەرلان قيسياوۆتىڭ 3 قىركۇيەكتەگى قاۋلىسى بويىنشا QazCovid-in ۆاكسيناسىن ەگۋ جانە ساقتاۋ ءتارتىبى بەكىتىلدى، دەپ حابارلايدى Almaty-akshamy.kz.
«QazCovid-in ۆاكسيناسىن شىعارۋ نىسانى: 0،5 مل (ءبىر دوزا)، 1،0 مل (ەكى دوزا)، 1،5 مل (ءۇش دوزا)، 2،5 مل (بەس دوزا)، سىيىمدىلىعى 3 مل، رەزەڭكە تىعىنمەن تىعىندالعان جانە Flip-off ءتيپتى پلاستيكالىق قاقپاعى بار مەتالل قالپاقپەن ورالعان، Ι سىنىپتاعى ءتۇسسىز شىنىدان جاسالعان قۇتىدا بولادى»، - دەپ جازىلعان قۇجاتتا.
سونداي-اق، ۆاكسينا قۇتىسى كەلۋشىلەردىڭ سانى ىشىندەگى دوزا سانىنا سايكەس رەتتەلىپ اشىلاتىنى ايتىلعان. ءبىر رەت ينەمەن تەسىلگەن قۇتىداعى ارتىلعان ۆاكسينانى ءتيىستى تەمپەراتۋرادا 4 ساعات بويى ساقتاۋعا بولاتىنى كورسەتىلگەن.
«ينەمەن تەسىلگەن ورنىن سپيرتپەن وڭدەپ، ۆاكسينا دوزاسىن العاننان كەيىن ىشىندە ۆاكسيناسى بار اشىلعان قۇتىنى بىردەن قۇتىدا اشىلعان ۋاقىتىن كورسەتە وتىرىپ، تەمپەراتۋراسى پليۋس 2-دەن پليۋس 8ºس-قا دەيىنگى توڭازىتقىشقا ورنالاستىرادى. بۇل رەتتە ۆاكسينانىڭ اشىلعان قۇتىسىن 4 ساعاتقا دەيىن ساقتاۋعا جول بەرىلەدى»، - دەپ جازىلعان قاۋلىدا.
ەسكە سالساق، باس سانيتار دارىگەردىڭ وسى قاۋلىسىندا ۆاكسينا پاسپورتى قازاقستاندا جارامدى ەلدەردىڭ ءتىزىمى جاڭارتىلعان بولاتىن.