جەتى قازىنانىڭ ءبىرى قازاقى يتتەر مەملەكەتتىك دەڭگەيدە قورعاۋعا الىنۋى مۇمكىن
كوكشەتاۋلىق ەرعازى بايمول 10 جىلعا جۋىق تازى باپتاۋمەن اينالىسىپ كەلەدى. ءقازىر ونىڭ 4 بىردەي اڭشى ءيتى بار. ايتۋىنشا، اسىلتۇقىمدى يت اسىراۋ بۇگىندە ەكىنىڭ ءبىرىنىڭ قولىنان كەلمەيدى. سەبەبى ءبىر تازىنىڭ تاماعىنىڭ وزىنە جىلىنا 100 مىڭ تەڭگەدەن استام قارجى كەتەدى. ودان بولەك كۇتىمى مەن تاسىمالداۋى تاعى بار، دەپ حابارلايدى Almaty-akshamy.kz.
«ەت كوبىنەسە. ۆاكسيناسى بولادى جىل سايىن سالىناتىن. ءتۇرلى جارىسقا قاتىسىپ جۇرگەننەن كەيىن سول كەزدە الىس جەرلەردە، باسقا وبلىستاردا بولعان جارىستار بولادى، سونىڭ بارلىعىنا ءوز قاراجاتىمىزبەن بارامىز. كەيدە سول قاراجات بولماعان سوڭ جارىستارعا قاتىسا الماي قالاتىن كۇندەر دە بولادى»، - دەدى يتبەگى ەرعازى بايمول.
وسىلاي دەگەن جاس يتبەگى مەملەكەتتىك قولداۋدان ءۇمىتتى. ءبىراق سول ءۇمىت اقتالا ما؟ جاۋاپتى مينيسترلىك استانا وكىلدەرىنىڭ سوزىنشە، قازاقى يتتەردى قورعاۋعا قاجەت دەگەن 1،4 ملرد تەڭگە – سالانىڭ 3 جىلدىق بيۋدجەتى. ال ول تازى مەن توبەتتى ساقتاپ، كوبەيتۋمەن اينالىساتىن ارنايى عىلىمي ورتالىققا جانە يتبەگىلەر اراسىندا ءتۇرلى ءىس-شارالار وتكىزىپ، ۇلتتىق ساياتشىلىق ونەردى دامىتۋعا اتسالىسىپ جۇرگەن قوعامدىق بىرلەستىكتەرگە ۇلەستىرىلمەك.
«كوپتەگەن سۇراق تۋىنداپ جاتىر. اقشا قالاي ۇستالىنادى؟ اقشا قايدا بارادى؟ اقشا باسقا جاققا كەتىپ قالماي ما؟ ول ءوزى كوپ تە اقشا ەمەس. ءبىراق ونى وتە ءتيىمدى پايدالانۋ كەرەك. ءاربىر 3-4 يت ۇستاپ وتىرعان كىسىلەرگە بەرسە، اقشا تالان-تاراجعا كەتىپ قالادى. ولار ۇلكەن ءبىر ۇيىمعا جينالۋ كەرەك. مەنىڭ ءوز ويىم. ءبىراق بولاشاقتا بۇل ماسەلە دە قارالاتىن شىعار دەپ ويلايمىن»، - دەدى ق ر پارلامەنتى ءماجىلىسىنىڭ دەپۋتاتى ءامىرحان راحىمجانوۆ.
ال تازى وسىرۋشىلەردىڭ مۇددەسىن قورعاپ جۇرگەن فەدەراسيا ءتوراعاسى الماس ورالبەكتىڭ ايتۋىنشا، «قازاقى يتتەرگە مەملەكەتتىك قولداۋ كورسەتىلەدى» دەگەن حابار تاراعالى بەرى ەلىمىزدە ءتۇرلى ۇيىمدار قاپتاپ كەتكەن. ولاردىڭ تەك قاعاز جۇزىندە عانا جۇمىس ىستەمەسىنە كىم كەپىل؟، - دەيدى ساراپشى. سالانى دامىتامىز دەسەك، ەڭ الدىمەن كاسىبي ماماندار قاجەت.