امەريكا ازاماتى حاميش پاۋلس كىشى ءجۇزدىڭ 4 تايپاسىن، 31 رۋىن تۇگەل جاتقا بىلەدى.
حاميش پاۋلس 2017 جىلدان بەرى اتىراۋدا تۇرادى. وسى ۋاقىت ىشىندە ول قازاق حالقىنىڭ ءسالت-داستۇرى مەن مادەنيەتىنە قانىعىپ ۇلگەرگەن، دەپ حابارلايدى Almaty-akshamy.kz.
حاميش «تەڭىزشيەۆرويل» ج ش س ۇكىمەت جانە قوعاممەن بايلانىس دەپارتامەنتى باس مەنەدجەرىنىڭ ورىنباسارى بولىپ جۇمىس ىستەيدى. جىل سايىن ارىپتەستەرىمەن بىرگە ءداستۇرلى ناۋرىز مەرەكەسىن تويلايدى. ول بۇل مەرەكەنى جاقىنداردىڭ باسىن قوساتىن تاماشا مەرەكە دەپ بىلەدى.
وعان بۇل كۇنى كوپشىلىكتىڭ ۇلتتىق كيىممەن جۇرەتىنى ەرەكشە ۇنايدى. ويۋمەن كومكەرىلگەن ۇلتتىق ناقىشتاعى كيىمدەر كوزدىڭ جاۋىن الاتىنىن ايتادى.
«ماعان باۋىرساق، كوجە ۇنايدى. مەندە ءتىپتى قازاقتىڭ ۇلتتىق كيىمى بار، ماعان ونى سىيعا تارتقان. ول كيىمدى ەرەكشە ءىس-شارالارعا كيەمىن. ونىڭ ويۋلارى مەن تۇستەرى كوڭىل-كۇيدى كوتەرەدى. قازاقستان مەن بۇرىن بارعان ەلدەردەن ەرەكشە. مۇنداعى ادامدار وتە مەيىرىمدى، قوناقجاي. ال بۇل ەلدىڭ تابيعاتى، ءتىپتى تاماشا»، دەيدى حاميش.
ول بوس ۋاقىتىندا قازاق حالقىنىڭ رۋلارى جايىندا وقيدى.
«مەنى ءبىر حالىقتىڭ رۋ تارماقتارعا قالاي بولىنەتىنى قىزىقتىرادى. مەن قازاقستانداعى 200-دەن استام رۋمەن تانىسىپ شىقتىم. ازىرگە كىشى ءجۇزدىڭ رۋىن عانا بىلەمىن»، دەيدى ول.
حالقىمىزدىڭ سالت-داستۇرىنەن بولەك، ول قازاقتىڭ ۇلتتىق ويىندارى مەن مۋزىكالىق اسپاپتارىنا دا قىزىعادى. مىسالى، ول جاقىندا اسىق اتۋ مەن لاڭگى تەبۋدى ۇيرەندى. حاميش اسىق اتۋ ۇقىپتىلىققا، العىرلىققا، تاپقىرلىققا دۇرىس ەسەپتەۋگە ۇيرەتسە، لاڭگى دالدىك پەن ەپتىلىكتى دامىتادى دەيدى.
«ماعان بۇل ويىنداردى كەنجە ۇلىم ۇيرەتتى. ول دا اتىراۋ قالاسىندا تۇرادى. بۇل ويىن تۇرلەرىن ول مەكتەپتەن ۇيرەنىپ كەلدى. ال 15 جاستاعى بالام دومبىرا تارتۋدى ۇيرەندى. ول مۋزىكا مەكتەبىندە وقيدى، ءقازىر 6 كۇيدى شەرتە الادى. سۇيىكتى كۇيلەرىمىز - «اداي»، «بالبىراۋىن». مەنىڭ تۇسىنۋىمشە، بۇل اتىراۋداعى ەڭ تانىمال تۋىندىلار»، دەپ تۇيىندەدى ول.