22 جاستاعى قازاق بالاسى اقش-تا ەڭ الىپ اۋە كومپانيالاردىڭ ءبىرىن باعىندىرىپ ءجۇر
الماتى وبلىسىنان شىققان داۋرەن ءسابيتوۆ نەبارى 22 جاسىندا امەريكانىڭ ەڭ الىپ اۋە كومپانيالارىنىڭ بىرىندە ۇشقىش-ينسترۋكتور بولىپ جۇمىس ىستەيدى، دەپ حابارلايدى Almaty-akshamy.kz Almaty-tv سايتىنا سىلتەمە جاساپ.
داۋرەن 1999 جىلى قازاقتىڭ قاراپايىم وتباسىندا تۋعان. بالا كەزىنەن ۇشقىش بولۋدى ارمانداعان ول الماتىداعى قتل-دى ءبىتىرىپ، بىردەن امەريكاعا جول تارتادى.
«2017 جىلى مەكتەپتە بىرگە وقىعان سىنىپتاستارىممەن ءبىر ۋاقىتتا اقش-تاعى كاليفورنيا شتاتىنىڭ سان-ماتەو قالاسىنا كەلدىك. دوستارىمنىڭ اراسىندا مەن عانا اۆياسيانى تاڭدادىم. ونىڭ ءوز تاريحى بار»، – دەپ ول اڭگىمەسىن الىستان باستادى.
داۋرەن ءسابيتوۆتىڭ اكەسى دە ۇشقىش ەكەن. ونىڭ وسى ماماندىقتى تاڭداۋىنا اكەسى زور ىقپال ەتكەن.
«اكەم كوپ جىل بويى اۆياسيا سالاسىندا جۇمىس ىستەپ ءجۇر. 5 جاسىمدا العاش رەت ءوزىنىڭ جۇمىس ورنىنا اپارعانى ەسىمنەن كەتپەيدى. ءوز كوزىممەن الىپ ۇشاقتاردى، ولاردىڭ ارنايى دايىندىقتان ءوتۋ پروسەسىن سول كەزدە ءبىرىنشى رەت كورسەم كەرەك. ءتىپتى، اكەممەن بىرنەشە رەت ۇشقان كەزدەرىم دە بولدى. ۇشقىشتاردىڭ كابيناسىنان عانا بايقاۋعا بولاتىن اۋەدەگى كورىنىس، كۇننىڭ شىعۋى مەن باتۋى مەنى بىردەن باۋراپ الدى. قىسقا قايىرعاندا، بولاشاقتا كىم بولاتىنىمدى 5 جاسىمدا-اق ءبىلدىم عوي»، – دەيدى ول.
ءقازىر ول Standord Flying ارنايى وقۋ ورنىندا ءبىلىمىن جەتىلدىرىپ، جوعارى ساناتتى سەرتيفيكات الۋعا دايىندالىپ ءجۇر.
ونىڭ ايتۋىنشا، امەريكاداعى ۇشقىشتاردى دايارلايتىن وقۋ ورىندارىنىڭ باعاسى قازاقستانمەن بىردەي.
«بىرەۋ سەنەر، بىرەۋ سەنبەس، ءبىراق اقش-تا ۇشقىشتاردى دايىندايتىن ورىندار قازاقستانداعى اكادەميالاردان ارزانىراق. اۆياسياسى ەڭ مىقتى دامىعان ەل بولسا دا، ۇشقىشتار ءۇشىن بار جاعدايدى جاساعان»، – دەيدى ول.
2021 جىلى داۋرەن بالا كەزدەگى ارمانىن ورىنداپ، امەريكانىڭ ەڭ اتاقتى اۋە كومپانيالارىنىڭ بىرىنە جۇمىسقا تۇرادى. ءقازىر ول California Airways كورپوراسياسىندا ۇشقىش-ينسترۋكتور بولىپ جۇمىس ىستەپ ءجۇر.
سونىمەن قاتار داۋرەن جەكە تاپسىرىس قابىلداپ، چارتەرلىك رەيستەردىڭ دە تىزگىنىن ۇستايدى.
اقش-تا ۇشقىشتىڭ دارەجەسىن ميل نە شاقىرىم ەمەس، ساعات انىقتايدى ەكەن. پيلوت ەسەبىندە داۋرەن 900 ساعات ۇشقان. بۇل جۇمىسقا شىققان ۋاقىت ەمەس، اۋەدەگى ەسەپ. باسقا ەلدەردە 900 ساعات ۇشۋ ءۇشىن 10-15 جىلىڭدى سارپ ەتۋىڭ مۇمكىن، ءبىراق تەك امەريكادا ەمەس.
كەيىپكەرىمىز قازاقستانداعى اۆياسيا جانە اۋە كومپانيالارى تۋراسىندا دا وي ءبولىستى. ونىڭ ايتۋىنشا، ەلدە اۋە بيلەتىنىڭ باعاسى تىم قىمبات.
جاس ۇشقىش قازاقستانعا قاشان ورالاتىنىن دا ايتىپ بەردى. ول ەلگە كەلىپ، جاس ستۋدەنتتەرمەن جۇمىس ىستەگىسى كەلەتىنىن العا تارتتى.
«5-6 جىلدان كەيىن ەلگە قايتىپ، امەريكادا جيناعان تاجىريبەمدى قازاقستان اۆياسياسىنىڭ دامۋىنا ارناسام دەيمىن. وقۋدى ەندى ءبىتىرىپ، ۇشاق ەكيپاجىنا اياق باسا الماي جۇرگەن جاستارعا باعىت كورسەتۋدى ارمانداپ ءجۇرمىن»، – دەيدى ول.