كەز كەلگەن سالانىڭ دامۋى ونىڭ العاشقى كوشباسشىلارى مەن دارا تۋعان شەبەرلەرىنىڭ ەڭبەگىمەن ولشەنەدى. سپورتتا دا ءدال سولاي. قازاقستان اتىن الەمگە تانىتىپ جۇرگەن ساڭلاقتار از ەمەس. تالاي جىلعى تاباندى ەڭبەك پەن توگىلگەن اششى تەردىڭ ارقاسىندا حالىقارالىق ارەنادا جارقىراپ كورىنگەن نازىك جاندىلاردىڭ تابىسى تىپتەن ولشەۋسىز. Aqshamnews.kz وسى جولى ءدال سونداي رۋحتى، ەڭبەكقور ءارى تاباندى جەتى سپورتشى قىزدىڭ ءومىر جولىنا، جەڭىستەرىنە جانە ەل سپورتىنا قوسقان ۇلەسىنە شولۋ جاسايدى. ولار - سابينا التىنبەكوۆا، نازىم قىزايباي، زارينا دياس، جانسايا ابدىمالىك جانە ءابيبا ءابۋجاقىنوۆا، بالاۋسا مۇزدىمان جانە ەليزابەت تۇرسىنبايەۆا.
سۇلۋ دا سىمباتتى سپورتشى
سابينا التىنبەكوۆا - قازاق ۆولەيبولىنىڭ ايقىن ءارى جارىق جۇلدىزى، ەل اتىن حالىقارالىق ارەنادا تانىتقان سپورتشى. 1996 جىلى 5 قاراشادا اقتوبە قالاسىندا دۇنيەگە كەلگەن سابينا ەرتە جاستان سپورتقا قىزىعۋشىلىق تانىتتى. دارىندى بالالارعا ارنالعان ينتەرناتتا وقىعان ول 14 جاسىنان ۆولەيبولعا دەن قويادى. العاشقى كلۋبى - "كازحروم"، مۇندا ول كاپيتان بولىپ، كومانداعا جەتەكشىلىك ەتتى. ال 16 جاسىندا "الماتينوچكا-الماتى" كلۋبىنا اۋىسىپ، اناتوليي دياچەنكونىڭ جەتەكشىلىگىمەن جاتتىعىپ، كاسىبي مانسابىن جاڭا دەڭگەيگە شىعاردى.
سابينا حالىقارالىق دەڭگەيدە دە ءوزىن دالەلدەگەن سپورتشى. ول جاپونياداعى GSS Sunbeams كلۋبىندا كۇن سايىن سەگىز ساعاتتىق قارقىندى جاتتىعۋلاردان ءوتىپ، تەحنيكالىق شەبەرلىگىن شىڭدادى. كەيىن ءباا-نىڭ Al Wasl كلۋبىنا اۋىسىپ، 2022–2023 جىلدارى اراب ليگاسىنىڭ چەمپيونى اتاندى. 2020 جىلى يتالياداعى Volalto Caserta كلۋبىندا ونەر كورسەتۋگە مۇمكىندىك الدى، الايدا قارجىلىق سەبەپتەرمەن كەلىسىمشارت ۋاقىتىنان بۇرىن توقتاتىلدى.
سابينانىڭ حالىقارالىق ارەناداعى تانىمالدىعى تەك سپورتتىق جەتىستىكتەرىمەن عانا شەكتەلمەيدى. 2014 جىلى تايبەيدەگى ازيا جاسوسپىرىمدەر چەمپيوناتىندا ونىڭ سۇلۋلىعى مەن ەرەكشە حاريزماسى جۇرت نازارىن اۋدارىپ، ونى جاپوندىق انيمە كەيىپكەرىنە تەڭەگەن ەدى. سول كەزەڭنەن باستاپ سابينا ينتەرنەت-جۇلدىزعا اينالدى. 2021 جىلى الەمدەگى ەڭ تانىمال ءۇش ۆولەيبولشىنىڭ قاتارىنان ورىن الدى، بۇل ونىڭ كاسىبي بەدەلىن تاعى ءبىر دالەلدەدى.
جەكە ءومىرى مەن سپورت اراسىنداعى تەپە-تەڭدىكتى ساقتاعان سابينا 2020 جىلى شاڭىراق كوتەرىپ، 2021 جىلى انا اتاندى. دەگەنمەن، ول سپورتتى تاستامادى جانە 2025 جىلعى قىركۇيەكتەن باستاپ "استانا" كومانداسىندا جاڭا سەرپىنمەن ونەر كورسەتىپ كەلەدى.
سابينا التىنبەكوۆا – ۆولەيبولشى عانا ەمەس، ەلدىڭ ماقتانىشى، حالىقارالىق ارەناداعى قازاق قىزدارىنىڭ بەينەسى، سپورت پەن سۇلۋلىقتى ۇيلەستىرگەن دارا تۇلعا.
قازاق ايەلدەر بوكسىنىڭ سيمۆولى
ايەلدەر بوكسىنىڭ شىنايى سيمۆولىنا اينالعان نازىم قىزايباي - قازاق قىزدارى اراسىنان شىققان تۇڭعىش الەم چەمپيونى. ول 1993 جىلى 14 قىركۇيەكتە الماتى قالاسىندا دۇنيەگە كەلگەن.
نازىمنىڭ ەسىمى اۋەسقوي بوكس الەمىندە ەرتە تانىلدى. ول الەم بىرىنشىلىكتەرىندەگى ەڭ العاشقى جۇلدەسىن 2012 جىلى يەلەنگەن. قىتايدىڭ سينحۋانداو قالاسىندا وتكەن الەم چەمپيوناتىندا قىزايباي قولا جۇلدەگەر اتاندى.
اراعا ەكى جىل سالىپ نازىمعا الەم چەمپيوناتىنىڭ التىنى بۇيىردى. 2014 جىلى وڭتۇستىك كورەيانىڭ چەدجۋ قالاسىندا ول 48 كەلى سالماقتا الەم چەمپيونى اتاندى. بۇل بوكستان قازاق قىزدارى ەنشىلەگەن الەمدىك سىننىڭ العاشقى التىنى بولاتىن.
ال 2024 جىلى وتىز جاسىندا نازىم قىزايباي العاش رەت باعىن وليمپيادا ويىندارىندا سىناپ كوردى. فرانسيادا وتكەن پاريج وليمپياداسىندا ول 50 كەلى سالماقتا سىنعا ءتۇسىپ، جارتىلاي فينالدا بوكستان الەم جانە ازيا ويىندارىنىڭ چەمپيونى، قىتايلىق قارسىلاسىنا ەسە جىبەرىپ الدى. وسىلايشا، العاشقى وليمپيادادان "قولامەن" قايتتى.
ال 2025 جىلى سەربيادا وتكەن الەم بىرىنشىلىگىندە ءۇشىنشى رەت التىن الىپ، ءوزىنىڭ ناعىز اڭىز سپورتشى ەكەنىن دالەلدەدى. وسى جەڭىستەرى ارقىلى نازىم قازاقستان تاريحىنداعى ەڭ تابىستى ايەل بوكسشىعا اينالدى.
2024 جىلى پاريج وليمپياداسىندا 50 كەلىگە دەيىنگى سالماقتا سىنعا تۇسكەن قىزايباي جارتىلاي فينالدا قارسىلاسىنا ەسە جىبەرىپ، قولا مەدال جەڭىپ الدى. بۇل - قازاق بوكسشى قىزدارى ءۇشىن ۇلكەن بەلەس. وليمپيادادان كەيىن ول قازاقستان ايەلدەر قۇراماسىنىڭ كاپيتانى بولىپ سايلاندى.
نازىم قىزايباي – رينگتە دە، ودان تىس ومىردە دە قايسار مىنەزىمەن، ەڭبەكقورلىعىمەن، تاباندىلىعىمەن تانىلعان تۇلعا. ونىڭ ءار جەتىستىگى قازاق قىزدارىنىڭ الەمدىك ارەناداعى بەدەلىن بيىكتەتىپ كەلەدى.
قازاق بوكسىنىڭ جاڭا جۇلدىزى
بالاۋسا مۇزدىمان. ول كەيىنگى جىلدارى قازاق ايەلدەر بوكسىنىڭ دامۋىنا سەرپىن بەرىپ، جانكەشتى مىنەزىمەن، تەحنيكاسىمەن ەرەكشەلەنگەن سۇلۋ دا سىمباتتى سپورتشى. 1997 جىلى الماتى وبلىسى اقشي اۋىلىندا دۇنيەگە كەلگەن ول بالا كەزىنەن العىر بولىپ وسكەن. مەكتەپتى "التىن بەلگىمەن" اياقتاعان بالاۋسا باستاپقىدا حيرۋرگ بولۋدى ارمانداپ، الماتىداعى س.ج. اسفەندياروۆ اتىنداعى قازاق ۇلتتىق مەديسينا ۋنيۆەرسيتەتىنە تۇسپەك بولعان. الايدا مەكتەپ بىتىرگەن سوڭ اقش-تاعى وقۋ-جاتتىعۋ جيىنىنا كەتكەن كەزىندە اتا-اناسى ونىڭ سپورتتىق جولىنا كەدەرگى كەلتىرمەۋ ءۇشىن قۇجاتتارىن سپورت جانە تۋريزم اكادەمياسىنا تاپسىرعان.
بوكسقا 13 جاسىندا كەلگەنىنە ءبىر جىل وتكەندە ول قازاقستاننىڭ جاسوسپىرىمدەر اراسىنداعى چەمپيونى اتاندى. تاعى ءبىر جىلدان كەيىن جاستار اراسىنداعى الەم چەمپيوناتىنىڭ "التىنىن" جەڭىپ الىپ، قازاق سپورتىندا جاڭا ەسىمنىڭ جارق ەتكەنىن كورسەتتى. كەيىن ەرەسەكتەر اراسىندا دا جۇلدەلى ورىندار الىپ، جوعارى دەڭگەيدەگى سپورتشى رەتىندە قالىپتاستى.
ءقازىر بالاۋسا 54 كەلى سالماقتا ونەر كورسەتىپ، قازاقستان ۇلتتىق قۇراماسىنىڭ ۇمىتكەرلەرى قاتارىندا ءجۇر.
كاسىبي بوكستاعى مانسابى دا قىزىققا تولى. بالاۋسا 2017 جىلى اقش-تاعى قارسىلاسى تەنەيشا ۋەستى جەڭىپ، كاسىبي رينگتە دەبيۋت جاسادى. الايدا ودان كەيىن التى جىل بويى كاسىبي بوكستا بوي كورسەتپەدى. تەك 2023 جىلى قايتا رينگكە ورالىپ، جەرلەسى زۋحرا يسرايلوۆانى ۇتىپ، ەكىنشى جەڭىسىنە قول جەتكىزدى.
2024 جىلى بالاۋسا WBA Asia تيتۋلىن جەڭىپ الىپ، كاسىبي دەڭگەيدە ءبىرىنشى بەلبەۋىنە قول جەتكىزدى. ال 2025 جىلى الماتىدا وتكەن بوكس كەشىندە ءۇندىستان وكىلى مامتا سينگحپەن جولىعىپ، UBO تۇجىرىمى بويىنشا ەكىنشى جەڭىل سالماقتا الەم چەمپيونى اتاعىن ساراپقا سالدى. ون راۋندقا جوسپارلانعان ايقاستى ءتورتىنشى راۋندتا ، قازاقستاندىق سپورتشى قارسىلاسىن تەحنيكالىق نوكاۋتپەن توقتاتىپ، كاسىبي مانسابىنداعى توعىزىنشى جەڭىسىنە جەتتى. وسىلايشا، بالاۋسا مۇزدىمان ءوز مانسابىندا العاش رەت الەم چەمپيونى اتاندى.
بالاۋسانىڭ ۇلكەن ارمانى – قازاقستاننىڭ ايەلدەر بوكسىن دامىتۋ، الەمگە تانىتۋ جانە شىن مانىندە ءوز ەلىنىڭ اتىن شىعارۋ. ول "الەم قازاق بوكسىنان تەك GGGء-دى عانا ەمەس، بۇكىل قازاقستان بوكس مەكتەبىن تانۋى كەرەك" دەپ ەسەپتەيدى.
قازاقستان تەننيسىنىڭ نازىك تە قايسار مىنەزدى وكىلى
زارينا دياس - حالىقارالىق تەننيس ارەناسىندا قازاقستاننىڭ اتىن اسقاقتاتىپ كەلە جاتقان دارىندى سپورتشىلاردىڭ ءبىرى. ول 1993 جىلى الماتى قالاسىندا دۇنيەگە كەلدى. بالا كەزىندە وتباسىمەن چەحياعا كوشىپ، پراگادا ورنالاسقان ايگىلى "سپارتا" اكادەمياسىندا ءتالىم الدى. ءدال وسى جەردە ونىڭ كاسىبي تەننيس جولى قالىپتاسىپ، بولاشاق چەمپيوننىڭ العاشقى قادامى باستالدى.
زارينا 9 جاسىنان باستاپ حالىقارالىق جارىستاردا كوزگە ءتۇسىپ، Prague Open جانە RPM Junior Open تۋرنيرلەرىندە توپ جاردى. تابيعي تالانتى مەن تاباندىلىعى ونى جاسوسپىرىمدەر اراسىندا ەڭ ءۇمىت كۇتتىرەتىن سپورتشىلار قاتارىنا قوستى.
ونىڭ مانسابىنداعى ەڭ جارقىن ساتتەردىڭ ءبىرى - 2010 جىلعى كرەمل كۋبوگى. بۇل تۋرنيردە ول الەمنىڭ ۇزدىك تەننيسشىلەرىنىڭ ءبىرى، سەربيالىق ەلەنا يانكوۆيچتى جەڭىپ، شىن مانىندە ۇلكەن سەنساسيا جاسادى. كەيىن Australian Open، Wimbledon، US Open جانە French Open جارىستارىندا بىرنەشە راۋندقا ءوتىپ، قازاقستان ايەلدەر تەننيسىنىڭ جاڭا دەڭگەيگە كوتەرىلۋىنە ىقپال ەتتى.
2011 جىلى يىعىنا جاسالعان اۋىر وپەراسيا مانسابىنا ءقاۋىپ توندىرگەنىمەن، زارينا تاباندىلىق تانىتىپ، كورتقا قايتا ورالدى. 2018 جىلى مايامي تۋرنيرىندە سۆەتلانا كۋزنەسوۆانى، 2019 جىلى گيفۋدا ليان ەن شۋونى ۇتىپ، ءوز دەڭگەيىن تاعى ءبىر دالەلدەدى. 2020 جىلى گونكونگتاعى ITF تۋرنيرىندە كەزەكتى تيتۋلىن جەڭىپ الدى.
قازاقستان اتىنان ونەر كورسەتۋدى سانالى تۇردە تاڭداعان زارينا ەشقاشان جەكە ءومىرىن جاريالاپ، جاھانعا جار سالعان ەمەس. سپورتقا ادالدىعى، ەڭبەكقورلىعى، ءتارتىبى مەن شىدامدىلىعى - ونىڭ باستى ەرەكشەلىكتەرى. سونىڭ ناتيجەسى رەتىندە ول الەمدىك رەيتينگتىڭ ۇزدىك 100 قاتارىنا العاش رەت 2014 جىلى ەنگەن.
جۋىردا زارينا جاپونيانىڭ تاكاساكي قالاسىندا وتكەن ءتۋرنيردىڭ 1/8 فينالىندا وڭتۇستىك كورەيا سپورتشىسى سو ءحون پاكتى 6:4، 7:6 ەسەبىمەن ۇتىپ، تاعى دا ءوز شەبەرلىگىن كورسەتتى.
زارينا دياس - قازاقستان تەننيسى تاريحىنداعى ەرەكشە ورىن الاتىن، ويىنى مىقتى، تالانتى دارا سپورتشى. ونىڭ ءاربىر جەڭىسى - ەل سپورتىنىڭ بەدەلىن بيىكتەتىپ كەلە جاتقان ۇلكەن ەڭبەك جەمىسى.
قازاق شاحماتىنىڭ جاڭا ءداۋىرىن اشقان دارا تالانت
جانسايا ابدىمالىك - الەم شاحماتىنداعى ەڭ جارقىن جۇلدىزداردىڭ ءبىرى، قازاقستان تاريحىندا العاش بولىپ "حالىقارالىق گروسسمەيستەر" اتاعىن يەلەنگەن ايەل. العاشقى جاتتىقتىرۋشىسى ءارى تىرەگى - اكەسى دانيار اشيروۆ.
جانسايانىڭ شاحماتتاعى تالانتى وتە ەرتە بايقالدى. بار بولعانى التى جاسىندا الماتى قالاسىنىڭ 8 جاسقا دەيىنگى قىزدار اراسىنداعى چەمپيوناتىندا جەڭىسكە جەتىپ، العاشقى تيتۋلىن يەلەندى. ءبىر جىلدان سوڭ قازاقستان چەمپيونى اتانىپ، ۋكرايناداعى حالىقارالىق تۋرنيردە التىن مەدال الىپ، ءبىرىنشى رازرياد نورماسىن ورىندادى.
2008 جىل - ونىڭ جۇلدىزى جارقىراعان كەزەڭ. جانسايا قازاقستاننىڭ ابسوليۋت چەمپيونى اتانىپ قانا قويماي، يراندا ازيا چەمپيونى بولىپ، قازاق شاحمات تاريحىنداعى ەڭ جاس قۇرلىق چەمپيونى اتاندى. ال ۆەتنامدا وتكەن الەم چەمپيوناتىندا 10 ۇپاي جيناپ، 8 جاسقا دەيىنگى الەم چەمپيونى اتاعىن جەڭىپ الدى.
وسە كەلە ول جاسوسپىرىمدەر جارىسىندا دا ەرەكشە جەتىستىكتەرگە جەتتى. 2010 جىلى - فيدە شەبەرى، 2011 جىلى – الەم چەمپيونى جانە حالىقارالىق ماستەر اتاندى. 2013 جىلى 20 جاسقا دەيىنگى الەم بىرىنشىلىگىندە كۇمىس جۇلدە الىپ، چەحياداعى ەرلەر تۋرنيرىندە توپ جاردى.
2014 جىل جانسايا ءۇشىن تاريحي كەزەڭ بولدى. ول فيدە-دەن حالىقارالىق گروسسمەيستەر-ايەل اتاعىن الىپ، ايەلدەر رەيتينگىنىڭ ۇزدىك جۇزدىگىنە ەندى. سول جىلى الەمنىڭ ەكس-چەمپيونى اناتوليي كارپوۆتىڭ ءوزى قاتىسقان شاحمات اكادەمياسىنىڭ اشىلۋى - ونىڭ بەدەلىنىڭ جانە تالانتىنىڭ مويىندالۋى ەدى.
جانسايانىڭ مانسابى ودان ءارى قارقىندى دامىدى. 2016 جىلى قازاقستان چەمپيونى اتاندى. 2017 جىلى - قازاقستان تاريحىندا العاش بولىپ ايەلدەر اراسىنان ەرلەردىڭ حالىقارالىق ماستەرى اتاعىن يەلەندى. سول جىلى اقش-تا وتكەن World Open تۋرنيرىندە گروسسمەيستەرلىك نورمانى ورىنداپ، 20 جاسقا دەيىنگى الەم چەمپيونى اتاندى. 2018 جىلى بارلىق ءۇش گروسسمەيستەرلىك نورمانى تولىق ورىنداپ شىقتى.
2021 جىلى گيبرالتارداعى ايەلدەر گران-پريىندە جەڭىسكە جەتىپ، حالىقارالىق گروسسمەيستەر اتاعىن تولىقتاي رەسمي يەلەندى. بۇل جەتىستىك - الەمدىك شاحماتتاعى قازاق قىزىنىڭ بيىك مارتەبەسىن ايقىن كورسەتتى.
2022 جىلى گەرمانيانىڭ OSG Baden-Baden كومانداسىمەن بىرگە ايەلدەر بۋندەسليگاسىنىڭ چەمپيونى اتاندى. شاحماتتان بولەك، ول جاس بۋىنعا قولداۋ كورسەتىپ، ەلىمىزدە شاحمات مەكتەبىن دامىتۋعا ەرەكشە ۇلەس قوسىپ كەلەدى. 2025 جىلى جەزقازعاندا قازاقستانداعى ەڭ ءىرى شاحمات اكادەمياسىن اشۋى - سونىڭ دالەلى.
بىلتىر تۇرمىس قۇرعان جانسايا 2025 جىلى انا اتانىپ، ءقازىر بالا كۇتىمىنە بايلانىستى دەمالىستا. دەگەنمەن ول شاحماتتان الىستاعان ەمەس، ەلىمىزدىڭ جاستارىمەن جۇمىس ىستەپ، جاڭا چەمپيونداردى تاربيەلەۋگە اتسالىسۋدا.
جانسايا ابدىمالىك - قازاق سپورتىنىڭ جاڭا تولقىنىنا شابىت سىيلاعان، الەمدىك دەڭگەيدەگى ينتەللەكتۋال تۇلعا. ونىڭ جەڭىستەرى – تاباندىلىقتىڭ، دارىننىڭ جانە اسقان ەڭبەكقورلىقتىڭ كورىنىسى.
قازاق دزيۋدوسىنىڭ جارقىن جۇلدىزى
ءابيبا ءابۋجاقىنوۆا – قازاقستاننىڭ دزيۋدو تاريحىنداعى جارقىن تۇلعا، الەمدىك ارەنادا ەل نامىسىن بيىككە كوتەرگەن سپورتشى. 1997 جىلى دۇنيەگە كەلگەن ءابيبا 48 كەلىگە دەيىنگى سالماقتا ونەر كورسەتەدى. ول ءوزىنىڭ تاباندىلىعى مەن ەڭبەكقورلىعى ارقىلى قازاقستان ايەلدەر دزيۋدوسىنىڭ كوشباسشىسىنا اينالدى.
دزيۋدوعا ءابيبا 11 جاسىندا كەلدى. تۋعان جەرى مەن وتباسى جايلى كوپ اقپارات جوق، ءبىراق سپورتقا دەگەن ماحابباتى ونى تاشكەنتتەن الماتىعا جەتەلەدى. جەكە ومىرىندە كوپ نارسەنى جاريالاماسا دا، سپورتتاعى جەتىستىكتەرى ءاردايىم ەل نازارىندا بولدى. ول رەسپۋبليكالىق سپورت كوللەدجىندە جالعىز وقىپ، جاتتىعۋلارىن تاباندىلىقپەن جالعاستىردى.
ءابيبانىڭ حالىقارالىق ارەنداعى جەتىستىكتەرى نازار اۋدارارلىق:
- 2021 جىلى بىشكەكتە وتكەن ازيا چەمپيوناتىنىڭ فينالىندا قىتايلىق لي ياناننان جەڭىلىپ، كۇمىس مەدال الدى.
- 2022 جىلى استانادا وتكەن ازيا بىرىنشىلىگىندە جاپون سپورتشىسى ۆاكانە كوگاعا جول بەرىپ، تاعى دا كۇمىس مەدال جەڭىپ الدى. سول جىلى تاشكەنتتە وتكەن الەم چەمپيوناتىندا قولا مەدال يەلەندى – بۇل قازاقستان ايەلدەر دزيۋدوسىنداعى ماڭىزدى جەتىستىك بولدى.
- 2023 جىلى پورتۋگالياداعى گران-پري سەرياسىندا التىن مەدال جەڭىپ، بۇل تۋرنيردە جەڭىسكە جەتكەن العاشقى قازاقستاندىق ايەل دزيۋدوشى اتاندى.
- 2025 جىلى بۋداپەشتتەگى الەم چەمپيوناتىندا كۇمىس مەدال الىپ، الەمدىك دەڭگەيدەگى سپورتشى ەكەنىن تاعى دالەلدەدى. جارتىلاي فينالدا بەلگيالىق لويس پەتيردى يپپونمەن جەڭسە، فينالدا تەك جاپون سپورتشىسىنا جول بەردى.
ءابيبا ءابۋجاقىنوۆا - دزيۋدوشى عانا ەمەس، قازاق قىزدارىنىڭ قايسارلىعى مەن تاباندىلىعىن كورسەتەتىن ۇلگى تۇلعا. ول وزىنە عانا ەمەس، جاس بۋىنعا دا موتيۆاسيا بەرىپ كەلەدى. ەلىمىزدىڭ تۋىن بيىككە كوتەرىپ، حالىقارالىق جارىستاردا قازاقستان اتىن تانىتىپ كەلەدى.
ءتورت اينالىمدىق سەكىرۋدى ورىنداعان تۇڭعىش سپورتشى
ەليزابەت بايتاق قىزى تۇرسىنبايەۆا - قازاقستاننىڭ ەڭ دارىندى جانە الەمگە تانىلعان مانەرلەپ سىرعاناۋشىلارىنىڭ ءبىرى. ول 2000 جىلى ماسكەۋ قالاسىندا دۇنيەگە كەلگەن. دەنساۋلىعى ءالسىز بولعاندىقتان، اتا-اناسى ونى شىنىقتىرۋ ماقساتىندا جاستايىنان مانەرلەپ سىرعاناۋعا بەرگەن. ءدال وسى شەشىم كەيىن ونىڭ مانەرلەپ سىرعاناۋ سپورتىندا جۇلدىزىنىڭ "جانۋىنا" سەپ بولدى.
ەليزابەت جاسىنان رەسەيدىڭ بەلدى مەكتەپتەرىندە جاتتىقتى: ناتاليا دۋبينسكايا، الەكساندر شۋبين، ەلەنا ۆودورەزوۆا، سۆەتلانا سوكولوۆسكايا، كەيىن الەمگە ايگىلى ەتەري تۋتبەريدزەنىڭ دارىستەرىن الدى. 2013 جىلى ول تورونتوعا كوشىپ، وليمپيادا چەمپيوندارىن دايارلاعان كانادالىق باپكەر برايان ورسەردىڭ توبىندا جاتتىقتى.
2014 جىلدان باستاپ قازاقستان اتىنان حالىقارالىق جارىستارعا قاتىسىپ، جاسوسپىرىمدەردەن ەرەسەكتەر قاتارىنا ءوتتى. 2019 جىلى ونىڭ مانەرلەپ سىرعاناۋ مانسابىنداعى ەڭ جارقىن كەزەڭى باستالدى. ەليزابەت ءتورت قۇرلىق چەمپيوناتىندا جانە الەم چەمپيوناتىندا كۇمىس جۇلدە يەلەندى.
تۇرسىنبايەۆانىڭ سپورت تاريحىنداعى ەڭ ۇلكەن جاڭالىعى 2019 جىلى بولدى. سايتامادا وتكەن الەم چەمپيوناتىندا ول ءتورت اينالىمدىق سالحوۆتى "تازا" ورىندادى. وسى ارقىلى ول رەسمي جارىستا ءتورت اينالىم سەكىرۋدى ورىنداعان الەمدەگى تۇڭعىش ەرەسەك فيگۋريست اتاندى.
جەتىستىكتەرى ءۇشىن ەليزابەت "دارىن" مەملەكەتتىك جاستار سىيلىعىن يەلەنىپ، "ەڭبەك سىڭىرگەنى ءۇشىن" مەدالىمەن ماراپاتتالدى.
الايدا سپورتشىنىڭ ءساتتى باستالعان مانسابى ۇزاققا بارمادى. دەنساۋلىعىنا بايلانىستى، سوزىلمالى ارقا جاراقاتى 2021 جىلى ەليزابەتتىڭ رەسمي تۇردە سپورتتى اياقتاۋىنا سەبەپ بولدى.
ەليزابەت تۇرسىنبايەۆا - ءتورت اينالىمدىق سەكىرۋدى ورىنداۋى بۇكىل الەمدىك مانەرلەپ سىرعاناۋعا جاڭا لەپ اكەلگەن تاريحي وقيعا بولدى.