قازاقتىڭ كاسكادەرلەرى گولليۆۋد فيلمىنە ءتۇستى

وتاندىق كاسكادەرلەر توپ جارۋدا.

قازاق ەلىنىڭ Nomad Stunts توبىنىڭ كاسكادەرلەرى گولليۆۋدتىڭ «كيللەر كودەكسى» ءفيلمىنىڭ تۇسىرىلىمىنە قاتىناستى، دەپ حابارلايدى Almaty-akshamy.kz. Qazaqtv.com سايتىنا سىلتەمە جاساپ.

كارتينا رەجيسسەرى – مارتين كەمپبەلل. سونداي-اق فيلمدە باستى رولدەردى سەميۋەل لەروي دجەكسون مەن مايكل كيتون سومداعان.

اتالعان جوباعا  Nomad Stunts توبىنىڭ 10 كاسكادەرى قاتىستى.

توپ جەتەكشىسى جايداربەك كۇنعوجينوۆتىڭ ايتۋىنشا، تۇسىرىلىمگە قاتىسۋ تۋرالى ۇسىنىس 2019 جىلدىڭ سوڭىندا تۇسكەن. كاسكادەرلەردى تاڭداۋ بارىسىندا فيلم ۇيلەستىرۋشىسى مەن رەجيسسەر سۇرانىسىنا سايكەس كەلەتىن جىگىتتەر مەن قىزدار تاڭدالىپ الىندى.

بۇل ءتۇسىرىلىمدى كاسكادەرلەر 2020 جىلدىڭ اقپانىندا رۋمىنيادا باستاعان. Nomad Stunts كاسكادەرلەرى تەك تۇسىرىلىمگە قاتىسىپ قانا قويماي، كەيىپكەرلەردى دۋبلياجداپ، سونىمەن قاتار ەپيزودتىق كورىنىستەرگە اكتەر رەتىندە قاتىسقان.

وتاندىق كاسكادەرلەر توبى ءۇشىن بۇل العاشقى گولليۆۋدتىق جوبا ەمەس. ولاردىڭ فيلم قورجىنىندا «مۋلان»، «ۇيگە جول» جوباسى جانە Netflix پەن HBO سەريالدارى بار. كاسكادەرلەر گولليۆۋد، بولليۆۋد جانە تۇركيانىڭ جەتەكشى ستۋديالارىمەن بىرلەسىپ جۇمىس جاسايدى.