ابدىبەك قاليبەك جاپونياداعى زاماناۋي قوندىرعىلارمەن جابدىقتالعان ورتالىق اۋرۋحانادا جۇمىس ىستەيدى.
ول ءقازىر قۇرتتىڭ سۋىنان ادامنىڭ يممۋنيتەتىن كوتەرىپ، قارتايۋدىڭ الدىن الاتىن ءدارى ازىرلەپ جاتىر، دەپ حابارلايدى Almaty-akshamy.kz
«ءوزىمىزدىڭ ۇلتتىق تاعامىمىز قۇرتتىڭ سارى سۋىنان ءبىر بيوقوسپا جاساپ جاتىرمىن. ونى «فۋزيلاكس» دەپ اتادىم. ءونىمدى ءارى اتاۋىن پاتەنتتەپ الدىم. بۇل ءدارى يممۋنيتەتتى كوتەرەدى. اسىرەسە، ونىڭ سپورتشىلارعا تيگىزەتىن پايداسى كوپ. ولار، ادەتتە، بۇلشىق ەتىن قاتايتۋ ءۇشىن كوبىنە اقۋىز ءىشىپ جاتادى عوي. قۇرتتىڭ سۋىندا سونداي قاسيەت بار. بۇل قوسپانىڭ ىشىندە ون التى ءتۇرلى قۇرام بار. مىسالى، قۇرتتىڭ سۋىن زەرتتەپ كورسەڭىز، ىشىنەن ون ءتۇرلى قۇرام تاباسىز. سوعان ءوزىم ازىرلەگەن التى ءتۇرلى قوسپانى قوستىم. وسى ءدارىنى ازىرلەپ جاتقانىمىزعا بەس جىل بولدى. جاپونيادا ءبىر ءدارىنى شىعارۋ ءۇشىن كەم دەگەندە تورت-بەس جىل كەتەدى. بۇيىرسا، وسى جىلدىڭ سوڭىنا دەيىن ءۇش ءتۇرلى ءونىمدى ازىرلەپ شىعارماق ويىمىز بار، – دەيدى ابدىبەك قاليبەك.
ابدىبەك قاليبەك – قىتايدىڭ ءۇرىمشى قالاسىندا تۋىپ-وسكەن قازاق. شىڭجاڭ مەديسينالىق ۋنيۆەرسيتەتىندە كلينيكالىق مەديسينا ماماندىعىن العان. كەيىن 2004 جىلى جاپونياداعى Juntendo ۋنيۆەرسيتەتىنىڭ ماگيستراتۋراسى مەن دوكتورانتۋراسىن بىتىرگەن. ونىڭ ەندىگى ارمانى – تۋعان ەلىنە، جەرىنە پايداسىن تيگىزۋ.
«جاس ۇلعايعان سايىن قوعامعا پايدا كەلتىرۋدىڭ ورايىن ىزدەپ، ارتىڭنان ءىز قالدىرۋ ءۇشىن شاكىرت تاربيەلەۋدى، ءبىلىم مەن بىلىكتىلىكتى دۇرىس ارناعا باعىتتاۋدى كوپ ويلايدى ەكەنسىڭ. ەلدەگى مەديسينا جۇيەسىن وزگەرتەتىن بىلىكتى مامان رەتىندە بارىپ، ەڭبەك ەتكىم كەلەدى. وسى سالادا جيناعان جيىرما جىلدىق تاجىريبەمە سۇيەنىپ، قازاقستان مەديسيناسىن ىلگەرىلەتۋگە مۇمكىندىك بەرسە ەكەن دەيمىن»، - دەدى ول «تۇركىستان» گازەتىنە بەرگەن سۇحباتىندا.