بۇگىندە قازاقتىڭ حالىق اۋىز ادەبيەتى كوميكس تۇرىندە جارىق كورۋدە.
قىلقالام شەبەرلەرى كىشكەنتاي وقىرماندارعا باتىرلار مەن حانداردىڭ جانە ۇلى تۇلعالاردىڭ ءومىرىن سۋرەت ارقىلى جەتكىزىپ جاتىر. شىمكەنتتىك 24 جاستاعى سەناريست بەك-اتا دانيالدىڭ تۋىندىلارى اقش، ۇلىبريتانيا مەن ءۇندىستانداعى باسىلىمداردا شىعارىلىپ جاتىر. ەندى ونەر يەسى جۋىردا باتىرلار جايلى كوميكس جازىپ، ونى الەمدىك نارىققا شىعارۋدى كوزدەپ وتىر، دەپ حابارلايدى Almaty-akshamy.kz 24.kz-كە سىلتەمە جاساپ.
ونەر يەلەرى كوميكستى دامىتۋ ارقىلى وسكەلەڭ ۇرپاقتى تاربيەلەپ، كىتاپقا باۋلۋعا بولادى دەيدى. ءتىپتى ۇلتتىق قۇندىلىقتارىمىزدى دارىپتەپ، ۇلتتىق سانا مەن ار-ۇيات سىندى قاسيەتتەردى دە وسى جانر ارقىلى جەتكىزۋدە. قىلقالام شەبەرى ماگيرا تىلەۋبەردينا دا ءبىر جىلدان اسا ۋاقىت قازاقشا كوميكسكە بەت بۇرعان. ونىڭ ايتۋىنشا، ءقازىر جاس وقىرمان قازاق حاندارى مەن باتىرلارىنىڭ تاعدىرى، ءومىرى مەن قايسارلىعىنا قىزىعادى.
«مەن وسى ادەبيەت تۇلعالارىنان شابىتتانامىن. مەن ءۇشىن ولار ۇلكەن تۇلعالار. سول ءۇشىن مەن ولارعا قاراپ، كەيىپكەرلەرىمدى جاسايمىن. ولاردى باسقا تۇرعىدا، زاماناۋي تۇردە كورسەتكىم كەلەدى. ءبىز بەك-اتا سەناريست ەكەۋمىز «ەسەك مەرگەن» باتىر تۋرالى كوميكس شىعارعىمىز كەلگەن. سول ءۇشىن ءبىز كوللابوراسيا رەتىندە جۇمىس ىستەپ، مەن سۋرەت جاعىن دامىتىپ جاتىرمىن»، - دەيدى سۋرەتشى-كوميكسيست ماگيرا تىلەۋبەردينا.
ماگيرا تىلەۋبەردينا سەنريست بەك-اتا دانيالمەن بىرلەسىپ، جۋىردا جاڭا تۋىندى شىعارماق. وندا قازاق فولكلورىندا كەزدەسەتىن، بويىندا جويقىن كۇشى بار، «جەزتىرناق» تا بەينەلەنگەن. ياعني، تاريحتىڭ ءمالىم دە بەيمالىم سىرىن وسى كوميكس ارقىلى وقىرمانعا جەتكىزۋدى كوزدەپ وتىر.
«كەيىپكەرلەردىڭ كەلبەتىنە ەموسيا قوسىپ، جان ءبىتىرۋ ارقىلى تاريحتى وقىرماندارعا جەتكىزۋ وڭاي. شەتەلدە «باتىردىڭ ساياحاتى» دەگەن ۇعىم بار. بىزدەگى باتىرلاردىڭ دا الگى «سۋپەرمەندەردەن» قاي جەرى كەم؟ ەگەر ولار قيالدان تۋسا، ءبىزدىڭ باتىرلار – ءومىر ءسۇرىپ، قازاق حالقىن قورعاپ، ەرلىك جاساعان جاندار. ەندى ولاردىڭ تەڭدەسى جوق تاباندىلىعىن وسى جانر ارقىلى دارىپتەپ، ءتىپتى شەت مەملەكەتتەردىڭ نارىعىنا دا شىعۋعا بولادى. مەنىڭ تۋىندىلارىم ۇلىبريتانيا، اقش پەن ءۇندى ەلدەرىندە دە بار»، - دەيدى سەناريست، كوميكسيست بەك-اتا دانيال.
ون ساۋساعىنان ونەرى تامعان كوميكس سالۋشىلار 20 بەتتىك تۋىندىعا كوز مايىن تاۋىسىپ، 2-3 اي ۋاقىتىن جۇمسايدى. ارينە، زامان اعىمىنا ساي تاريحتى، ادەبيەت پەن ءىلىمدى دە كوميكس ارقىلى وقىتۋعا بولادى. ءتىپتى تۇيتكىلدى ماسەلەلەردى دە وسى جانر ارقىلى جەتكىزىپ جۇرگەندەر دە بار. باستىسى، بويدا دارىن، ىنتا مەن قاجىرلىق بولۋ كەرەك.