الەمدە جۇمىسسىزدار سانى كوبەيەدى - بولجام

بيىل الەمدە جۇمىسسىزدار سانى 3 ملن-عا ارتادى.

ەكونوميكانىڭ قۇلدىراۋىنا بايلانىستى ادامدار ساپاسى تومەن جۇمىس ورىندارىنا كەلىسۋگە ءماجبۇر بولادى. حالىقارالىق ەڭبەك ۇيىمى جاڭا بايانداماسىندا وسىنداي بولجام جاساپ وتىر، دەپ حابارلايدى Almaty-akshamy.kz 24.kz-كە سىلتەمە جاساپ. 

ساراپشىلاردىڭ پىكىرىنشە، بۇل الەمدەگى گەوساياسي احۋالدىڭ ۋشىعۋى، پاندەميانىڭ كەسىرى مەن لوگيستيكالىق بۋىنداردىڭ اجىراۋىنا بايلانىستى. سونداي-اق باياندامادا ءتۇرلى ايماقتاردا 2023 جىلى ەڭبەك نارىعى ءارتۇرلى وزگەرەتىنى ايتىلعان. ماسەلەن، افريكا مەن اراب ەلدەرىندە جۇمىس ورىندارىنىڭ سانى 3 پايىزعا ارتادى. ال سولتۇستىك امەريكادا جۇمىسسىزدىق دەڭگەيى وسەتىن ءتۇرى بار. ۋكرايناداعى جانجال ەۋروپا مەن ورتالىق ازيا مەملەكەتتەرىنە ەڭ ۇلكەن اسەر ەتتى. دەگەنمەن وسى ايماقتاردا جۇمىسسىزدار سانى ايتارلىقتاي وسپەيدى. 

«بولجام بويىنشا الەمدە جاڭا جۇمىس ورىندارىنىڭ اشىلۋى 1%-عا دەيىن باياۋلايدى. بۇل بىلتىرعى جىلمەن سالىستىرعاندا ەكى ەسە از. جۇمىس ىزدەپ جۇرگەن 208 ملن ادام بار. بۇعان وتباسىلىق جاعدايعا بايلانىستى ەڭبەك ەتە المايتىن تاعى 267 ملن تۇرعىندى قوسىڭىز»، - دەيدى حالىقارالىق ەڭبەك ۇيىمى باس ديرەكتورىنىڭ كومەكشىسى مانۋەلا تومەي.

ساراپشىلاردىڭ پىكىرىنشە، الداعى جىلدارى سيفرلاندىرۋ مەن اۆتوماتتاندىرۋدىڭ سالدارىنان ەڭبەك نارىعى تۇپكىلىكتى وزگەرەدى. كوپتەگەن ماماندىقتار، ءتىپتى ەكونوميكانىڭ كەيبىر سالالارى جويىلادى نەمەسە قاجەتى ازايادى. الايدا ونىڭ ەسەسىنە يننوۆاسيالىق جاڭا ماماندىقتار پايدا بولادى. سوندىقتان ءبىراز ادامعا ومىردەن ارتتا قالماس ءۇشىن، جاڭا ماماندىقتار يگەرۋگە تۋرا كەلەدى.