بايلانىس نارىعىندا مىندەتتەمەلەرىنە سالعىرت قارايتىن وپەراتوردىڭ كۇدىكتى ايلا-تاسىلدەرى تولاستاماي تۇر...
سوڭعى ۋاقىتتا «قازاقتەلەكوم» جۇمىسىنىڭ شيكىلىگىنە ارىزداناتىن وقىرماندارىمىز كوبەيدى. «Alataý Aqparat» ۇجىمىنىڭ دا اتالعان كومپانياعا شاعىمى بار.
پرەزيدەنتىمىز قاسىم-جومارت توقايەۆتىڭ تاپسىرماسى بويىنشا ەل ەكونوميكاسىن كوتەرۋدەگى جاڭا باعدار، ونىڭ ىشىندە مەملەكەت نارىعىنداعى ءىرى مونوپوليستەرمەن كۇرەس ءوز جەمىسىن بەرۋدە. اتاپ ايتقاندا، جىل باسىنان بەرى «قازاقتەلەكوم» اكسيالارىنىڭ بەلگىلى ءبىر بولىگى مەملەكەت مەنشىگىنە قايتارىلدى. الايدا، ۇلتتىق بايلانىس وپەراتورىنىڭ جۇمىسىنداعى شيكىلىكتەرگە تۇتىنۋشىلار نارازىلىعى ءالى دە توقتاماي تۇر. مونوپوليست كومپانيانىڭ قيتۇرقى «سحەمالارىنان» بايلانىس قىزمەتتەرىن ادال تۇتىنۋشىلار زارداپ شەگۋدە. مىندەتتەمەلەرىنە سالعىرت قارايتىن وپەراتوردىڭ ايلا-تاسىلدەرىنىڭ كەسىرى «Alataý Aqparat» جاۋاپكەرشىلىگى شەكتەۋلى سەرىكتەستىگىنە دە ءتيدى.
كوپتەگەن جىل بويى «قازاقتەلەكوم» اكسيونەرلىك قوعامى «Alataý Aqparat» جاۋاپكەرشىلىگى شەكتەۋلى سەرىكتەستىگىنە (اتاۋى وزگەرگەنگە دەيىن «الماتى اقشامى» گازەتى» ج ش س جانە «ۆەچەرنيي الماتى «گازەتى» ج ش س بولعان) قىزمەت كورسەتىپ كەلگەن.
2020 جىلدىڭ قىركۇيەگىندە «Alataý Aqparat» جشس-نىڭ بۋحگالتەرياسى قارجىلاي شىعىستاردى زەردەلەپ، باقىلاۋ بارىسىندا «قازاقتەلەكومنىڭ» كورسەتىلەتىن قىزمەتتەرگە سايكەس كەلمەيتىن سوماداعى اقشالاي وتەم سۇراعانىن انىقتايدى. ءىستىڭ ءمان-جايىنا قانىعۋ ءۇشىن «Alataý Aqparat» كومپانياسى ۇلتتىق بايلانىس وپەراتورىنىڭ كەڭسەسىنە حات جولدادى.
«قازاقتەلەكوم» قىزمەتكەرلەرى ءوز جاۋابىندا «Alataý Aqparat» جشس-ىنا 319 (!) ابونەنتتىك تەلەفون نومىرلەرى تىركەلگەنىن حابارلادى. وعان قوسا كوپ جىلدان بەرگى تۇراقتى وقىرماندارىمىزعا جاقسى تانىس «Almaty aqshamy» جانە «ۆەچەرنيي Almaty» گازەتتەرى رەداكسيالارىنىڭ بۇرىنعى مەكەن-جايلارىندا (ابىلاي حان داڭعىلى، 2، الماتى-2 ۆوكزالىنىڭ جانىندا) تاعى بەس ابونەنتتىك ءنومىردىڭ تيەسىلى ەكەنىن ايتادى. ايتا كەتكەن ءجون، ءبىزدىڭ باسىلىمدار ايتىلعان مەكەنجايدان 2011 جىلى كوشىپ كەتكەن!
«Alataý Aqparat» اتىنداعى ءۇش جۇزدەن استام ابونەنت تۋرالى ايتقاندا، مىنا فاكتىنى ويعا العان ءجون: ءبىزدىڭ كومپانيانىڭ شتاتىندا ءداستۇرلى تۇردە 80-گە جۋىق ادام جۇمىس ىستەيدى. بۇل ءتارتىپ قانشاما جىلدان بەرى وزگەرمەگەن.
ءبىزدىڭ كومپانياعا ءۇش جۇزدەن استام ابونەنتتىك ءنومىردىڭ جازىلۋى كەلەسىدەي جاعدايدا ورىن العان: ءبىر كەزدەرى ينتەرنەت بايلانىستىڭ ساپاسىنا نارازى بولعان «Almaty aqshamy» جانە «ۆەچەرنيي Almaty» باسىلىمدارىنىڭ باسشىلارى ۇلتتىق وپەراتوردان بۇل جاعدايدى دۇرىستاۋدى وتىنەدى. «قازاقتەلەكوم» وكىلدەرى ءوز كەزەگىندە جاڭا شارتتار اكەلىپ، قۇجاتتارعا قول قويىلعاننان كەيىن بارلىق ماسەلەلەردى شەشۋگە ۋادە بەرەدى. ايتىلعان ۋاقىتتا ينتەرنەتكە قوسىلۋ جىلدامدىعى سەكۋندىنا نەبارى 6 مبيت بولدى. بۇل جىلدامدىقتىڭ جۇمىسى اقپارات تاراتۋعا نەگىزدەلگەن 80 ادامدىق ۇجىم ءۇشىن وتە از ەكەنى ايتپاسا دا تۇسىنىكتى. اتالمىش جاڭا شارتتارعا قول قويىلعاننان كەيىن «Alataý Aqparat» كومپانياسى ءۇش ءجۇز ابونەنتتىك ءنومىردىڭ يەگەرى بولدى. الايدا، ينتەرنەتكە قوسىلۋ جىلدامدىعى ۋادە ەتىلگەندەي ەمەس، نەبارى 2 مبيتكە ۇلعايدى. قىزمەت كۇشى 6 مبيت ورنىنا 8 مبيت بولعانىمەن، قىزمەت قۇنى ايىنا 480 مىڭ تەڭگەگە دەيىن وسكەن.
«قازاقتەلەكوم» كومپانياسى جەكە تۇلعالارعا جىلدامدىعى سەكۋندىنا 100-دەن 500 مبيتكە دەيىن جەتەتىن قىزمەتتەردى بار بولعانى 7 مىڭ تەڭگەگە جالعايتىنىن ەسكەرسەك، ينتەرنەت بايلانىسى ءالسىز ءۇش ءجۇز ابونەنتتىك نومىرگە جارتى ميلليون تەڭگەگە جۋىق اقشا الۋى ءادىل قىزمەتكە ەمەس، الاياقتاردىڭ ارباۋىنا ۇقسايدى.
بۇل دالەلدى ايعاقتارىمىزبەن مونوپوليست كومپانيا وكىلدەرى العاشقىدا كەلىسەدى. ءسويتىپ، «Alataý Aqparat» ج ش س مەن «قازاقتەلەكوم» اق اراسىندا كەلىسسوز جۇرگىزىپ، ناتيجەسىندە قايتا ەسەپ جۇرگىزۋگە ۋاعدالاسادى. الايدا، ءىس جۇزىندە ۇلتتىق وپەراتور قىزمەتكەرلەرى بۇل باعىتتاعى جۇمىس بارىسىن سوزا بەرگەندىكتەن، ولارعا ءبىزدىڭ تاراپتان تاعى دا حات جولدانادى. وعان ءتيىستى ماسەلە «الماتى تەلەكوم» وڭىرلىك تەلەكوممۋنيكاسيا ديرەكسياسىنىڭ قاراۋىنا شىعارىلعانى جونىندە جاۋاپ الدىق.
«قازاقتەلەكوم» 2020 جىلدىڭ 24 قاراشاسىندا وڭىرلىك ديرەكسيانىڭ 2 297 000 تەڭگە سومماعا قايتا ەسەپتەۋ جۇرگىزگەنى تۋرالى ەسەپ بەردى. 2021 جىلدىڭ 29 قاڭتار كۇنى ۇلتتىق وپەراتور ىشكى تەكسەرۋلەر نەگىزىندە قايتا ەسەپتەۋ سوماسى 8 575 921 تەڭگەگە دەيىن وسكەنىن جانە كىنالى قىزمەتكەرلەر مەن ونىڭ تىكەلەي باسشىسىنا تارتىپتىك جازالاۋ شارالارى قابىلدانعانىن حابارلادى.
دەگەنمەن، ءبىر جىلدان استام ۋاقىت بويى ەسەپتەلگەن 8،5 ميلليون تەڭگە «Alataý Aqparat» جشس-ىنە قايتارىلمادى. وسىعان وراي ءبىزدىڭ تاراپىمىزدان وتكەن جىلدىڭ اقپان ايىندا «قازاقتەلەكوم» اكسيونەرلىك قوعامىنىڭ ۇستىنەن سوتقا دەيىنگى شاعىم جىبەرىلدى. الايدا، كومپانيا وكىلدەرى ۋاعدالاستىقتان، كەلىسسوزدەن جالتارا باستادى. سوتقا دەيىنگى تاعى ءبىر شاعىم جىبەرىلگەندە، ولار ءوز ەسەپتەرىمەن وزدەرى كەلىسپەيتىنىن جانە ەشقانداي قاراجاتتى كەرى قايتارمايتىنىن مالىمدەدى.
الماتىنىڭ مامانداندىرىلعان اۋدانارالىق سوتىندا «قازاقتەلەكومعا» قارسى تالاپتاردى قاراۋ ءبىر جىلعا جۋىق ۋاقىتقا سوزىلدى. وسى ۋاقىت ىشىندە «قازاقتەلەكوم» اق زاڭگەرلەرى «Alataý Aqparat» جشس-نا 1،6 ميلليون تەڭگە بەرەشەك سوماسىن ءوندىرىپ الۋ تۋرالى قارسى ارىز جازادى. ماەس 2021 جى لدىڭ جەلتوقسانىندا كەلىپ تۇسكەن بۇل ارىزدى وسى جىلدىڭ اقپان ايىندا قاناعاتتاندىرىپ، ءبىزدىڭ كومپانيامىزعا 8،5 ميلليون تەڭگەنى قايتارۋ تۋرالى تالاپتى قابىلداۋدان باس تارتتى.
سوتتىڭ شەشىم شىعارۋداعى دالەلدەرىن ەرەكشە اتاپ وتكەن ءجون. ءوز شەشىمىن قانداي دا ءبىر فاكتىلەرگە نەگىزدەۋ ءۇشىن سوت «قازاقتەلەكومنىڭ» ەسەپتەۋدەگى ءوز قاتەلىكتەرىن مويىندايتىن حاتتارىن ساناۋدان باس تارتتى. ونىڭ سەبەبىن «قازاقتەلەكوم» بۇل حاتتاردى كەيىن قايتارىپ الدى» دەپ ءتۇسىندىردى. ازاماتتىق كودەكسكە سايكەس، حاتتارمەن قوسىمشا راستالعان ءوز مىندەتتەمەلەرىنەن ءبىرجاقتى باس تارتۋعا بولمايدى. وسى دالەلدەرگە قاراماستان، الماتى ماەس ءمونوپوليستىڭ پايداسىنا شەشىم شىعارىپ، «قازاقتەلەكومعا» ايلا-تاسىلمەن اقشا وندىرۋدەگى قيتۇرقى ىس-ارەكەتتەرىن جالعاستىرۋعا مۇمكىندىك بەرگەندەي بولدى.
ءقازىر ءجۇرىپ جاتقان ءىرى مونوپوليستەرمەن كۇرەس بارىسىندا ءتيىستى ورگاندار قۇرىعى ۇزىندىعىن پايدالانىپ جاۋاپكەرشىلىكتەن جالتارىپ جۇرگەن ۇلتتىق بايلانىس وپەراتورى قىزمەتىنىڭ وسى بولىگىن مۇقيات تەكسەرەدى دەپ ۇمىتتەنەمىز.