قازاقستاننىڭ تاجىكستانعا 60 تاۋار ءتۇرى ەكسپورتىن ۇلعايتۋعا الەۋەتى بار. بۇل تۋرالى ءقازاقستان-تاجىستان بيزنەس فورۋمىندا پرەمەر-مينيستردىڭ ورىنباسارى - ساۋدا جانە ينتەگراسيا ءمينيسترى سەرىك جۇمانعارين ايتتى، دەپ حابارلايدى Almaty-akshamy.kz. قازاقپاراتقا سىلتەمە جاساپ.
«ءبىزدىڭ بولجامىمىز بويىنشا، ورتاازيالىق وڭىردەگى ساۋدانىڭ جيىنتىق الەۋەتى 10 ملرد دوللاردان اسادى. قازىرگى ۋاقىتتا قازاقستاندا تاجىكستانمەن بىرلەسكەن 418 كاسىپورىن جۇمىس ىستەيدى، ونىڭ 416-سى – شاعىن كاسىپورىن. قازاقستاننىڭ 2005 جىلدان باستاپ تاجىكستان ەكونوميكاسىنا سالعان ينۆەستيسياسىنىڭ كولەمى – شامامەن 132 ملن دوللار، ال تاجىكستاننان ينۆەستيسيا اعىنى – شامامەن 21 ملن دوللار. پاندەميانىڭ اياقتالۋىمەن ءبىز ىنتىماقتاستىقتىڭ بارلىق باعىتى بويىنشا ءوزارا ءىس-قيمىلىمىزدى ارتتىراتىنىمىزعا سەنىمدىمىن»، - دەدى سەرىك جۇمانعارين.
ۆيسە-پرەمەر ۋاقىت وتە كەلە ەكى ەل بيزنەس-توپتارىنىڭ وكىلدەرى اراسىنداعى ىسكەرلىك بايلانىس نىعايا تۇسەتىندىگىن اتاپ ءوتتى.
«ءقازىردىڭ وزىندە ءبىز ءوزارا ساۋداداعى الەۋەتتى كورىپ وتىرمىز. اتاپ ايتقاندا، قازاقستاننىڭ جالپى سوماسى 140 ملن دوللار بولاتىن 60 تاۋار پوزيسياسى بويىنشا ەكسپورتتى ۇلعايتۋ الەۋەتى بار. بۇل – جەتكىزىلىمنىڭ وڭ ءوسۋى بايقالاتىن وڭدەلگەن ونىمدەردىڭ تاۋارلارى. سونىمەن قاتار، ولاردى جەڭىلدىكتى شارتتارمەن ۇسىنۋعا دايىن قىزمەت كورسەتۋشىلەردىڭ قىزىعۋشىلىعى زور. ولاردىڭ ىشىندە اۋىل شارۋاشىلىعى سالاسى ءۇشىن جەردى قاشىقتىقتان زوندتاۋ جانە سپۋتنيكتىك بايلانىس قىزمەتتەرىن، ءىت قىزمەتتەرىن اتاپ وتۋگە بولادى. مەملەكەتتىك باسقارۋ مەن عىلىمي-يننوۆاسيالىق قىزمەتتىڭ سيفرلىق ترانسفورماسياسى سالاسىنداعى ىنتىماقتاستىقتى دامىتۋعا ازىرلىك بار»، - دەدى ول.