قازاقستان ادام قۇقىقتارى سالاسىنداعى ءوزىنىڭ بارلىق مىندەتتەمەلەرىن ساقتاۋعا بەيىلدى.
قازاقستان ۇكىمەتى Human Rights Watch حالىقارالىق ۇكىمەتتىك ەمەس ۇيىمى قويعان ساۋالدارعا جاۋاپ بەردى، دەپ حابارلايدى Almaty-akshamy.kz.
«قازاقستان رەسپۋبليكاسىنىڭ سىرتقى ىستەر مينيسترلىگىنە Human Rights Watch حالىقارالىق ۇكىمەتتىك ەمەس ۇيىمىنىڭ قازاقستاندا قاڭتار وقيعالارى كەزىندە قۇقىق قورعاۋ ورگاندارىنىڭ شەكتەن تىس كۇش قولدانۋ جاعدايلارى تۋرالى اقپارات بەرىلگەن ساۋالى كەلىپ ءتۇستى. سونىمەن قاتار، HRW قاماۋعا الىنعاندارعا قاتىستى باسقا دا زاڭ بۇزۋشىلىقتار تۋرالى اقپارات جاريالادى»، - دەلىنگەن ءسىم باسپا ءسوز قىزمەتىنىڭ حابارلاماسىندا.
وسىعان بايلانىستى قازاقستاننىڭ ءسىم تومەندەگىدەي جاۋاپ بەردى.
قازاقستان رەسپۋبليكاسى شەكتەن تىس كۇش قولدانۋدىڭ، زاڭسىز ۇستاۋدىڭ، ازاپتاۋدىڭ جانە قاماۋعا الىنعاندارعا قاتىگەزدىك كورسەتۋدىڭ ىقتيمال جاعدايلارىن ايىپتايدى.
پرەزيدەنت قاسىم-جومارت توقايەۆ قارۋلى تارتىپسىزدىكتەرگە تەرگەۋ ءادىل بولۋى جانە زاڭ اياسىندا جۇرگىزىلۋى ءتيىس ەكەنىن بىرنەشە رەت مالىمدەگەن بولاتىن. قاماۋعا الىنعانداردىڭ قۇقىقتارىن قاتاڭ ساقتاۋ جانە سوتتا ءىستىڭ ادىلەتتى قارالۋى مىندەتتى شارت بولۋى ءتيىس.
مەملەكەت باسشىسى باس پروكۋراتۋرا مەن ىشكى ىستەر مينيسترلىگىن تەرگەۋ ءىس-شارالارىن جۇرگىزگەن كەزدە ازاپتاۋ مەن قاتىگەزدىكتىڭ وزگە تۇرلەرىن قولدانۋعا تىيىم سالاتىن ەلىمىزدىڭ كونستيتۋسياسى مەن قىلمىستىق-پروسەستىك كودەكسiءنىڭ ساقتالۋىن قامتاماسىز ەتۋگە شاقىردى.
زاڭسىز ۇستاۋ جانە قاماۋعا الىنعان ازاماتتارعا قاتىگەزدىك كورسەتۋ تۋرالى كەز كەلگەن مالىمەتتەر مۇقيات قاراستىرىلاتىن بولادى. تەرگەۋ ورگاندارى كەلىپ ءتۇسىپ جاتقان بارلىق زاڭ بۇزۋشىلىق فاكتىلەرىن تەكسەرۋدە. ازاماتتاردىڭ قاجەتتى اقپاراتتى كەدەرگىسىز جانە جەدەل الۋى، ونىڭ ىشىندە پوليسيا قىزمەتكەرلەرىنىڭ ىس-ارەكەتتەرىنە شاعىم جولداۋى ماقساتىندا «شۇعىل جەلى» اشىلعان. ق ر باس پروكۋراتۋراسىنىڭ دەرەكتەرى بويىنشا، بۇگىنگى كۇنى ازاماتتاردىڭ تەرگەۋ جۇرگىزۋدىڭ رۇقسات ەتىلمەگەن ادىستەرىنە جانە قۇقىقتارىن بۇزۋعا قاتىستى شاعىمدارى بويىنشا قۇقىق قورعاۋ ورگاندارى تاراپىنان بارلىعى 98 قىلمىستىق ءىس تەرگەلۋدە.
ق ر باس پروكۋراتۋراسى جانە باسقا دا تەرگەۋ ورگاندارى قازاقستاندىق جانە حالىقارالىق قوعامداستىق كوتەرگەن ءاربىر جەكە ءىستى جان-جاقتى قاراستىرۋعا دايىن.
قاماۋعا الىنعان ازاماتتاردىڭ قۇقىقتارىنىڭ ساقتالۋىنا مونيتورينگ جۇرگىزۋ ءۇشىن ادام قۇقىقتارى جونىندەگى ۋاكىل ەلۆيرا ءازىموۆاعا، ازاپتاۋلاردى بولدىرماۋدىڭ ۇلتتىق الدىن الۋ تەتىگىنىڭ (ۇات) جانە ۇلتتىق قوعامدىق سەنىم كەڭەسىنىڭ مۇشەلەرىنە پەنيتەنسيارلىق جۇيە مەكەمەلەرىنە قولجەتىمدىلىك قامتاماسىز ەتىلگەن.
ۇات وڭىرلىك توپتارى قازاقستاننىڭ 16 وڭىرىندەگى 83 جابىق مەكەمەگە 97 تاۋەلسىز مونيتورينگ جۇرگىزدى. ادام قۇقىقتارى جونىندەگى ۋاكىلدىڭ اتىنا ازاماتتاردان قۇقىقتارىنىڭ بۇزىلۋى جونىندە 48 ءوتىنىش ءتۇسىپ، قاراستىرىلۋدا. سونىمەن قاتار، وڭىرلىك توپتاردىڭ ۇسىنىسى بويىنشا قاماۋعا الىنعان جانە تۇتقىندالعان ازاماتتارعا ادۆوكاتتار مەن ازاماتتىق دارىگەرلەردىڭ كىرۋى قامتاماسىز ەتىلدى.
ازاماتتىق قوعامنىڭ بەدەلدى وكىلدەرى، ونىڭ ىشىندە قۇقىق قورعاۋشىلار جانە زاڭگەرلەر قاڭتار وقيعالارىنا تەرگەۋ جۇرگىزۋ بويىنشا قوعامدىق كوميسسيالار قۇردى.
قازاقستان ادام قۇقىقتارى سالاسىنداعى ءوزىنىڭ بارلىق مىندەتتەمەلەرىن ساقتاۋعا بەيىلدى جانە حالىقارالىق ۇكىمەتتىك ەمەس ۇيىمدارمەن اشىق ديالوگقا جانە ىنتىماقتاستىققا دايىن. اتاپ ايتقاندا، ق ر سىرتقى ىستەر ءمينيسترى مۇحتار تىلەۋبەردىنىڭ Human Rights Watch ۇيىمىنىڭ اتقارۋشى ديرەكتورى كەننەت روتپەن كەزدەسۋ وتكىزۋى جونىندە ۋاعدالاستىققا قول جەتكىزىلدى.
قازاقستان رەسپۋبليكاسى ادام قۇقىقتارى سالاسىنداعى بۇۇ ورگاندارىمەن جانە تەتىكتەرىمەن بەلسەندى ءوزارا ءىس-قيمىلدى جالعاستىرۋدا.