قازاقستاننىڭ سىرتقى ىستەر ءمينيسترى رەسمي ساپارمەن ءازىربايجانعا باردى
قازاقستان رەسپۋبليكاسى پرەمەر-مينيسترىنىڭ ورىنباسارى – سىرتقى ىستەر ءمينيسترى مۇحتار تىلەۋبەردى باكۋ قالاسىنا رەسمي ساپارمەن بارىپ كەلدى، دەپ حابارلادى Almaty-akshamy.kz ق ر ءسىم سايتىنداعى اقپاراتقا سىلتەمە جاساپ. ساپار بارىسىندا ءازىربايجان رەسپۋبليكاسىنىڭ پرەزيدەنتى يلحام الييەۆپەن جانە پرەمەر-مينيستر الي اسادوۆپەن كەزدەسۋلەرى، سونداي-اق سىرتقى ىستەر ءمينيسترى دجەيحۋن بايراموۆپەن كەلىسسوزدەرى ءوتتى.
م.تىلەۋبەردى ءازىربايجان باسشىسىنا قازاقستان پرەزيدەنتى قاسىم-جومارت توقايەۆ پەن تۇڭعىش پرەزيدەنت – ەلباسى نۇرسۇلتان نازاربايەۆتىڭ جىلى لەبىزدەرى مەن تىلەكتەرىن جەتكىزدى. ول حالىقارالىق قۇقىق پەن بۇۇ قاۋىپسىزدىك كەڭەسىنىڭ قارارلارى نەگىزىندە ەلدىڭ اۋماقتىق تۇتاستىعىن قالپىنا كەلتىرۋىمەن قۇتتىقتاپ، جوعارى دەڭگەيدەگى ۋاعدالاستىقتاردىڭ ىسكە اسىرىلۋىن تالقىلادى.
ءوز كەزەگىندە پرەزيدەنت ي.الييەۆ قازاقستان مەن ءازىربايجاندى بۇرىننان كەلە جاتقان سەنىمدى قارىم-قاتىناستار بايلانىستىراتىنىن اتاپ ءوتتى.
«بۇل دوستىقتىڭ نەگىزىن نۇرسۇلتان نازاربايەۆ پەن گەيدار الييەۆ قالادى، ال بۇگىندە بۇل باعىتتى ەكى ەلدىڭ پرەزيدەنتتەرى جالعاستىرۋدا»، - دەدى ءازىربايجان پرەزيدەنتى.
ول پرەزيدەنت ق.توقايەۆتىڭ ءازىربايجانعا جوسپارلانعان ساپارى ق ر مەن ءازىربايجان ەلىنىڭ ىنتىماقتاستىعىنا قوسىمشا سەرپىن بەرەتىنىنە سەنىم ءبىلدىردى.
تاراپتار ساۋدا-ەكونوميكالىق بايلانىستاردى ودان ءارى نىعايتۋ جانە ترانزيت-كولىك الەۋەتىن دامىتۋ جونىندەگى كۇش-جىگەردى ۇيلەستىرۋ قاجەتتىگىنە كەلىستى.
ار پرەمەر-مينيسترى الي اسادوۆپەن كەزدەسۋ بارىسىندا ەكىجاقتى ىنتىماقتاستىقتىڭ، اتاپ ايتقاندا، ينۆەستيسيالىق، ساۋدا-ەكونوميكالىق، ترانزيت-كولىكتىك جانە ەنەرگەتيكا سالالارىنداعى كەڭ اۋقىمدى ماسەلەلەرى قارالدى. قازاقستان ءسىم باسشىسى ءازىربايجان بيزنەسىنىڭ وكىلدەرىنە ق ر اۋماعىندا كوتەرمە-تاراتۋ ورتالىقتارى جەلىسىن قۇرۋعا قاتىسۋدى ۇسىندى.
ار ۇكىمەتىنىڭ باسشىسى ساۋدا قاتىناستارىن، اسىرەسە، قازاقستاننىڭ باتىس وڭىرلەرىنە ءازىربايجان ونىمدەرىن جەتكىزۋدەگى الەۋەتتى اتاپ ءوتتى. قازاقستاندىق كومپانيالاردى تاۋلى قاراباقتى قالپىنا كەلتىرۋگە بەلسەندى قاتىسۋعا شاقىردى، بۇل بۇگىنگى تاڭدا ءازىربايجان قوعامى ءۇشىن باسىمدىق بولىپ تابىلادى.
ءازىربايجاننىڭ سىرتقى ىستەر ءمينيسترى د.بايراموۆپەن كەلىسسوزدەردە تاراپتار ەكىجاقتى ىنتىماقتاستىقتىڭ، وڭىرلىك جانە حالىقارالىق كۇن ءتارتىبىنىڭ، ونىڭ ىشىندە كاسپيي پروبلەماتيكاسى مەن بۇۇ، ەقىۇ، تمد، اوسشك، تۇركى كەڭەسى جانە باسقا دا كوپجاقتى ۇيىمدار شەڭبەرىندەگى ءوزارا ءىس-قيمىلدىڭ كەڭ اۋقىمدى ماسەلەلەرى بويىنشا «ساعاتتاردى تەڭەستەردى».
م.تىلەۋبەردى ءازىربايجان، ارمەنيا جانە رەسەي اراسىنداعى 2020 جىلعى 10 قاراشاداعى جانە 2021 جىلعى 11 قاڭتارداعى قول جەتكىزىلگەن ءۇشجاقتى ۋاعدالاستىقتاردى قۇپتادى. قاراباق توڭىرەگىندەگى جاعدايدىڭ تۇراقتانۋى وڭتۇستىك كاۆكازدىڭ قازاقستانمەن جانە ورتالىق ازيا ەلدەرىمەن نەعۇرلىم اۋقىمدى ترانسوڭىرلىك ينتەگراسياسى، وڭىردەگى كولىك بايلانىستارىنىڭ قايتا اشىلۋىن ەسكەرە وتىرىپ، ەكى ەلدىڭ كاسپيي پورتى ينفراقۇرىلىمىنىڭ ءوسىپ كەلە جاتقان الەۋەتىن اشىپ كورسەتۋ ءۇشىن جاڭا جاعدايلار تۋعىزاتىنىنا سەنىم ءبىلدىردى.
ءوز كەزەگىندە د.بايراموۆ وڭتۇستىك كاۆكاز وڭىرىندەگى اعىمداعى جاعداي، ءازىربايجاننىڭ قابىلدانعان ءۇشجاقتى ۋاعدالاستىقتاردى ىسكە اسىرۋ بويىنشا قولعا الىنعان قادامدارى تۋرالى حاباردار ەتتى.
تاراپتار ساۋدا-ەكونوميكالىق ىنتىماقتاستىق جونىندەگى ۇكىمەتارالىق كوميسسيانىڭ كەزەكتى 17ء-شى وتىرىسىن وتكىزۋ، ترانسكاسپيي حالىقارالىق كولىك باعىتى شەڭبەرىندەگى جوبالاردى ىسكە اسىرۋ بويىنشا جوسپارلاردى بەلگىلەدى، قازاقستاندىق كومپانيالاردىڭ قاراباقتىڭ بوساتىلعان اۋماقتارىنىڭ ازاماتتىق ينفراقۇرىلىمىن قالپىنا كەلتىرۋگە قاتىسۋ پەرسپەكتيۆالارىن قارادى.
قازاقستان ءسىم باسشىسى قازاقستاندىق جۇك ەلەكتروۆوزدارى مەن استىقتى ءازىربايجان نارىعىنا جەتكىزۋدى، كاسپيي تەڭىزىنىڭ ءتۇبى بويىنشا تالشىقتى-وپتيكالىق بايلانىس جەلىسىن (توبج) وتكىزۋ جونىندەگى بىرلەسكەن جوبانى جۇزەگە اسىرۋدى قاناعاتتانۋشىلىقپەن اتاپ ءوتتى. بۇل ءبىزدىڭ ەلدەرىمىزدىڭ تەلەكوممۋنيكاسيا سالاسىنداعى ترانزيتتىك الەۋەتىن كەڭەيتەدى.
2022 جىلى قازاقستان مەن ءازىربايجان اراسىنداعى ديپلوماتيالىق قاتىناستاردىڭ ورناعانىنا 30 جىل تولۋىنا وراي تاراپتار وسى مەرەيتوي كۇنىن مەرەكەلەۋگە مۇقيات دايىندالۋ قاجەتتىگى تۋرالى كەلىستى.
ساپار اياسىندا قازاقستاندىق دەلەگاسيا ءازىربايجان حالقىنىڭ جالپىۇلتتىق كوشباسشىسى گەيدار الييەۆتىڭ بەيىتىنە جانە شەحيدتەر اللەياسىنداعى ماڭگىلىك الاۋ مونۋمەنتىنە گۇل شوقتارىن قويۋ راسىمىنە قاتىستى.