قازاقستاننىڭ قاي وڭىرىندە ازىق-تۇلىك باعاسى شارىقتاپ تۇر

ازىق-تۇلىك باعالارى ەڭ قىمبات ءوڭىر – قونايەۆ قالاسى

ەل بويىنشا جاڭادان قۇرىلعان جەتىسۋ وبلىسىنىڭ ورتالىعى قونايەۆ قالاسىندا ازىق-تۇلىك باعاسى قىمبات. بۇل تۋرالى ۇلتتىق ستاتيستيكا بيۋروسى ءمالىم ەتتى، دەپ حابارايدى Almaty-akshamy.kz قازاقپارات-قا سىلتەمە جاساپ. بيۋرونىڭ دەرەگى بويىنشا، بارلىق الەۋمەتتىك ماڭىزى بار ازىق-تۇلىك باعالارى ەڭ قىمبات ءوڭىر – قونايەۆ قالاسى. وندا نان 314 تەڭگە تۇرادى. ال نان رەسپۋبليكا بويىنشا استىقتى ايماق قوستاناي قالاسىندا ارزان. وندا نان - 152 تەڭگەدەن ساتىلىپ جاتىر. قونايەۆ قالاسىندا كۇنباعىس قۇنى دا شارىقتاپ تۇر. ءليترى – 954 تەڭگە. اتالعان تاۋار ءتۇرى سەمەيدە ارزان. وندا كۇنباعىس ماينىڭ ءبىر ءليترى – 725 تەڭگە. باسقا وڭىرلەرمەن سالىستىرعاندا جەتىسۋ وبلىسىنىڭ ورتالىعىندا كارتوپ (كەلىسى 186 تەڭگە) پەن قىرىققابات (كەلىسى 89 تەڭگە) قانا ارزان. ال سيىر ەتى (كەلىسى 2369 تەڭگە)، كۇرىش (كەلىسى 375 تەڭگە)، پياز (كەلىسى 311 تەڭگە) جانە جۇمىرتقا (10 داناسى 460 تەڭگە) سياقتى ازىق-تۇلىك تاۋارلارىنىڭ بارلىعى قىمبات. ستاتيستيكالىق مالىمەتتەرگە سايكەس، باسقا وڭىرلەرمەن سالىستىرعاندا ەلىمىزدىڭ 3 قالاسىندا ازىق-تۇلىك قۇنى ەداۋىر ارزان. ولار - پەتروپاۆل، قاراعاندى جانە قوستاناي قالالارى. اتالعان ايماقتاردا ازىق-تۇلىك باعاسى وزگە وڭىرلەرگە قاراعاندا 95-210 تەڭگەگە تومەن. ۇلتتىق ستاتيستيكا بيۋروسىنىڭ اقپاراتى بويىنشا، جىل باسىنان بەرى الەۋمەتتىك ماڭىزى بار ازىق-تۇلىك باعاسى 17،6 پايىزعا وسكەن.