قازاقستاننىڭ وڭتۇستىگىندە كۇزدىك بيداي جاقسى شىقتى

جاعدايى جاقسى.

«قازگيدرومەتتىڭ» ماماندارى وڭتۇستىك ءوڭىردىڭ اۋا-رايى كۇزدىك بيدايعا قولايلى بولىپ وتىرعانىن ايتتى، دەپ حابارلايدى Almaty-akshamy.kz Eldala.kz سىلتەمە جاساپ.

قازاقستاننىڭ وڭتۇستىگىندە وڭ اۋا تەمپەراتۋراسى مەن جاۋىن-شاشىن جاعدايىندا كۇزدىك بيدايدىڭ، كوپجىلدىق شوپتەردىڭ بەلسەندى ءوسىپ-ونۋى جانە جەمىس داقىلدارىنىڭ بۇتاقتارىندا بۇرشىكتەردىڭ ءبورتۋى جالعاسۋدا. الماتى جانە جامبىل وبلىستارىنداعى باقىلاۋ ۋچاسكەلەرىندە كۇزدىك بيدايدىڭ جاي-كۇيى جاقسى، «كوكتەۋ» دامۋ كەزەڭى – «تۇپتەۋ». بۇل تۋرالى «قازگيدرومەتتىڭ» اگرومەتەورولوگيالىق شولۋىندا ايتىلعان.

سينوپتيكتەردىڭ مالىمەتىنشە، باتىس قازاقستان وبلىسىندا كۇزدىك ءداندى داقىلداردى ءوسىرۋ اۋداندارىندا قىستى اياقتاۋ ءۇشىن مەتەورولوگيالىق جاعدايلار قولايلى بولدى.

جامبىل وبلىسىنىڭ باقىلاۋ ۋچاسكەلەرىندە توپىراقتى الدىن الا وڭدەۋدەن كەيىن بارلىق جەردە جازدىق ارپا ەگۋگە كىرىستى. ەرتە شىعاتىن ارپا داقىلدارىندا «كوكتەۋ – «3ء-شى جاپىراق» دامۋ كەزەڭى بايقالادى، وسىمدىكتەردىڭ جاعدايى جاقسى جانە كەرەمەت.

الماتى، جامبىل جانە تۇركىستان وبلىستارىندا جوڭىشقا، ەسپارسەت جانە بەدە شوپتەرىنىڭ جاي-كۇيى جاقسى جانە قاناعاتتانارلىق، «ساباعىنىڭ ءوسۋى» دامۋ فازاسى. تۇركىستان وبلىسىنىڭ ورداباسى اۋدانىندا (بۋگۋن اگروبەكەتى) جوڭىشقا شوپتەرىن ۆەگەتاسيالىق سۋارۋعا كىرىستى.

سونىمەن قاتار، الماتى جانە تۇركىستان وبلىستارىندا جەمىس داقىلدارى بار باقتاردا الما مەن شيە بۇتاقتارىندا بۇرشىكتەردىڭ ءبورتۋى بايقالادى، جاعدايى جاقسى.