پرەمەر-مينيستر ولجاس بەكتەنوۆتىڭ توراعالىعىمەن وتكەن ۇكىمەت وتىرىسىندا وتاندىق تاۋار وندىرۋشىلەردى قولداۋ شارالارىنىڭ جەرگىلىكتى ءوندىرىستى ىنتالاندىرۋداعى ءرولى تالقىلاندى، دەپ حابارلايدى aqshamnews.kz
ونەركاسىپ جانە قۇرىلىس ءمينيسترى قانات شارلاپايەۆتىڭ بايانداماسىنا سايكەس، 2024 جىلدىڭ ءبىرىنشى جارتىجىلدىعىندا قازاقستاننىڭ وڭدەۋ ونەركاسىبى 5،1%-عا ءوستى. ءوسىم قارا جانە ءتۇستى مەتاللۋرگيا، حيميا، ماشينا جاساۋ سالالارى جانە جيھاز ءوندىرىسى سياقتى سالالاردا بايقالدى.
وتاندىق ءوندىرىستى قولداۋدىڭ نەگىزگى تەتىكتەرى رەتىندە ءبىرقاتار زاڭنامالىق وزگەرىستەر قابىلداندى. اتاپ ايتقاندا، مەملەكەتتىك ساتىپ الۋدا وتاندىق تاۋارلارعا باسىمدىق بەرۋ، وففتەيك-كەلىسىمشارتتار جاساۋ تەتىگىن پىسىقتاۋ، مەملەكەتتىك بيۋدجەت ەسەبىنەن سالىناتىن وبەكتىلەردە قازاقستاندىق ءوندىرىستىڭ تاۋارلارىن پايدالانۋ بويىنشا باقىلاۋ ەنگىزۋ شارالارى قابىلداندى. سونىمەن قاتار، جەر قويناۋىن پايدالانۋشىلاردىڭ ساتىپ الۋلارىندا وتاندىق تاۋارلاردى جەتكىزۋگە شارتتار جاساسۋ، تابيعي مونوپوليالار سۋبەكتىلەرى ءۇشىن كونكۋرستىق ءوتىنىم باعاسىن تومەندەتۋ ارقىلى وتاندىق تاۋارلاردى باسىم ساتىپ الۋ تالاپتارى بەلگىلەندى.
مينيستر شارلاپايەۆ بۇل شارالاردىڭ ناتيجەسىندە وتاندىق وندىرۋشىلەردىڭ ءوندىرىس كولەمى ايتارلىقتاي ۇلعايعانىن اتاپ ءوتتى. مىسالى، «رادۋگا» ج ش س قاعاز ونىمدەرىن مەملەكەتتىك ساتىپ الۋدىڭ ارقاسىندا ءوندىرىس جۇكتەمەسىن 12%-دان 100%-عا دەيىن ارتتىردى. سونداي-اق، «لاكرا» ج ش س جانە «Marschall» ج ش س مەملەكەتتىك ساتىپ الۋلارعا قاتىسۋ ەسەبىنەن ءوندىرىس كولەمىن ەداۋىر ءوسىردى. 2024 جىلدىڭ ءساۋىر ايىندا ىسكە قوسىلعان «Metal Former» ج ش س زاۋىتى «جايلى مەكتەپ» جوباسىنىڭ ارقاسىندا ءوندىرىستىڭ تولىق جۇكتەلۋىنە قول جەتكىزىپ، 3،6 ملرد تەڭگەگە ءونىم ءوندىردى.
بۇل شارالار وتاندىق ءوندىرىستى دامىتۋعا جانە ونىڭ باسەكەگە قابىلەتتىلىگىن ارتتىرۋعا ەلەۋلى ۇلەس قوسۋدا.