«كارچاگ كينچە» ونەر مۋزەيىندە (ماجارستان) «قازاقستاننىڭ كوشپەندىلەرى: وتكەنى مەن بۇگىنى» اتتى كورمە اياقتالدى.
ەكسپوزيسياعا قازاق حالقىنىڭ باي تاريحي جانە مادەني مۇراسىن تانىتاتىن 200-دەن استام بىرەگەي ەكسپونات قويىلدى، دەپ حابارلايدى aqshamnews.kz.
كورمەگە كەلۋشىلەرگە ۇرپاقتار ساباقتاستىعىنىڭ سيمۆولىنا اينالعان اباي قۇنانباي ۇلىنىڭ دومبىراسى ۇسىنىلدى. جالپى، كورمەنى 12 مىڭنان استام ادام تاماشالادى.
«جوبا ۇلكەن قىزىعۋشىلىق تۋدىردى، بۇل قازاقستان مەن ماجارستان اراسىنداعى مادەني الماسۋدىڭ ماڭىزدىلىعىن كورسەتەدى. بۇعان دەيىن وسىنداي كورمەلەر تۇركيا، وڭتۇستىك كورەيا، اۋستريا، يتاليا جانە چەحيادا وتكەن. ەندى 12 جەلتوقساندا سەربيادا «ۇلى دالانىڭ مادەني مۇراسى» اتتى كورمە اشىلادى. جالپى قالا اكىمى مادەنيەت سالاسى وكىلدەرىن دامىتۋعا ىقپال ەتەتىن تاعىلىمداماعا، ءبىلىم الۋعا باعىتتالعان جانە حالىقارالىق بايلانىستى نىعايتۋعا مۇمكىندىك جاسايتىن جوبالارعا ەرەكشە كوڭىل بولەدى جانە سالا قىزمەتكەرلەرىنە ۇلكەن قولداۋ كورسەتۋدە. ماسەلەن، مۋزەي قىزمەتكەرلەرى الەمنىڭ ۇزدىك مادەني ورتالىقتارىندا، سونىڭ ىشىندە ايگىلى لۋۆردا ءبىلىم الىپ قايتتى»، – دەدى الماتى قالاسى مادەنيەت باسقارماسىنىڭ باسشىسى عاني مايلىبايەۆ.
ايتا كەتەيىك، كورمەنى الماتى قالاسىنىڭ مۋزەيلەر بىرلەستىگى الماتى قالاسى اكىمدىگى مەن قازاقستاننىڭ ماجارستانداعى ەلشىلىگىنىڭ قولداۋىمەن ۇيىمداستىردى.