13-17 قازان ارالىعىندا وتكەن وزبەكستان رەسپۋبليكاسىنداعى قازاقستاندىق مەديسينا كۇندەرى اياسىندا قازاق ونكولوگيا جانە راديولوگيا عىلىمي-زەرتتەۋ ينستيتۋتىنىڭ (قازوجرعزي) ماماندارى تاجىريبە الماسۋعا، حالىقارالىق ىنتىماقتاستىقتى دامىتۋعا جانە ونكولوگيالىق كومەك سالاسىنا زاماناۋي تەحنولوگيالاردى ەنگىزۋگە باعىتتالعان ءبىرقاتار وقىتۋ جانە تاجىريبەلىك ءىس-شارالار وتكىزدى.
بۋحاراداعى جۇمىس
13-15 قازان ارالىعىندا رەسپۋبليكالىق مامانداندىرىلعان ونكولوگيا جانە راديولوگيا عىلىمي-تاجىريبەلىك مەديسينالىق ورتالىعىنىڭ بازاسىندا ونكولوگ-دارىگەرلەرگە ارنالعان شەبەرلىك سىنىپتارى، حيرۋرگيالىق كورسەتىلىمدەر، دارىستەر مەن سەمينارلار، سونداي-اق پاسيەنتتەرگە ارنالعان كەڭەستەر ءوتتى.
قازوجرعزي ونكۋرولوگيا ورتالىعىنىڭ باسشىسى، PhD دوكتورى حۋسان ءومىرزاقوۆ بۇيرەك رەزەكسياسى جانە كەڭەيتىلگەن نەفرەكتوميا بويىنشا لاپاروسكوپيالىق وپەراسيالاردى كورسەتىپ، پاسيەنتتەردى قالپىنا كەلتىرۋ مەرزىمىن قىسقارتۋعا جانە ەمدەۋدىڭ فۋنكسيونالدىق ناتيجەلەرىن جاقسارتۋعا مۇمكىندىك بەرەتىن ەڭ از ءينۆازيۆتى تەحنولوگيالاردىڭ ارتىقشىلىقتارىن اتاپ ءوتتى.
ونكوگينەكولوگيا ورتالىعىنىڭ باسشىسى، پروفەسسور ەرلان كۋكۋباسوۆ ايەل رەپرودۋكتيۆتى جۇيەسىنىڭ قاتەرلى ىسىكتەرىن اعزانى ساقتايتىن جانە جوعارى تەحنولوگيالىق ەمدەۋدىڭ زاماناۋي تاسىلدەرىن تانىستىرا وتىرىپ، بىرنەشە لاپاروسكوپيالىق راديكالدى گيستەرەكتوميا وتكىزدى.
حيرۋرگيالىق كورسەتىلىمدەرمەن قاتار، قازوجرعزي ماماندارى ءوڭىردىڭ 35 دارىگەرىنە ارنالعان دارىستەر مەن سەمينارلار ۇيىمداستىردى. سونداي-اق، ونكوگينەكولوگيالىق جانە ۋرولوگيالىق پاتولوگيالارى بار 20 پاسيەنتكە ەمدەۋ جانە ودان ءارى باقىلاۋ بويىنشا جەكە ۇسىنىمدار بەرۋ ارقىلى كەڭەس بەرىلدى.
تاشكەنتتەگى عىلىمي كەزدەسۋلەر
16 قازاننان باستاپ دەلەگاسيانىڭ جۇمىسى تاشكەنتتە جالعاستى، وندا رەسپۋبليكالىق ونكولوگيا جانە راديولوگيا ورتالىعىنىڭ باسشىلىعىمەن جانە ۇجىمىمەن كەزدەسۋلەر ءوتتى. ساپار اياسىندا ءعىلىمي-بىلىم بەرۋ سەسسياسى ءوتىپ، وندا قازوجرعزي ماماندارى قازىرگى زامانعى ونكولوگيانىڭ نەگىزگى باعىتتارى بويىنشا باياندامالارىن ۇسىندى:
• «3D-تەحنولوگيالاردى قولدانۋمەن ونكوورتوپەديا» - م.ع.ك. عاني سەرىكبايەۆ، سۇيەك ىسىكتەرى جانە جۇمساق تىندەر ورتالىعىنىڭ باسشىسى؛
• «ساۋلەلىك تەراپيانىڭ زاماناۋي ادىستەرى» - م.ع.د. ۆيكتور كيم، رادياسيالىق ونكولوگيا ورتالىعىنىڭ باسشىسى؛
• «ونكوگينەكولوگيا جانە ونكوۋرولوگياداعى روبوتتاندىرىلعان حيرۋرگيا» - پروفەسسور ەرلان كۋكۋباسوۆ پەن PhD حۋسان ءومىرزاقوۆ.
ساندىق شەشىمدەردى ينتەگراسيالاۋ، تەلەمەديسينانى دامىتۋ، NCCN جانە ESMO حالىقارالىق ۇسىنىمدارى نەگىزىندە ەمدەۋ حاتتامالارىن ەنگىزۋ، سونداي-اق قازاقستان مەن وزبەكستاننىڭ كلينيكالىق مەكتەپتەرى اراسىندا تاجىريبە الماسۋ ماسەلەلەرى تالقىلاندى.
«قازاقستان-وزبەكستان: دەنساۋلىق ساقتاۋ سالاسىنداعى سەرىكتەستىك» فورۋمى
ساپاردىڭ سوڭعى كەزەڭى 17 قازاندا تاشكەنتتە وتكەن «قازاقستان-وزبەكستان: دەنساۋلىق ساقتاۋ، تەحنولوگيا جانە كادرلار سالاسىنداعى سەرىكتەستىك» فورۋمىنا قازوجرعزي دەلەگاسياسىنىڭ قاتىسۋى بولدى.
ءىس-شارا قازاقستان رەسپۋبليكاسى مەن وزبەكستان رەسپۋبليكاسى دەنساۋلىق ساقتاۋ مينيسترلىكتەرىنىڭ، ەكى ەلدىڭ عىلىمي ينستيتۋتتارى مەن جەتەكشى مەديسينالىق ورتالىقتارىنىڭ وكىلدەرىن بىرىكتىرىپ، تاجىريبە الماسۋ جانە ەكىجاقتى ءوزارا ءىس-قيمىلدى نىعايتۋ ءۇشىن ماڭىزدى الاڭعا اينالدى.
فورۋم باعدارلاماسى اياسىندا قازوجرعزي باسقارما ءتوراعاسى ەربول بەكمۇحامبەتوۆ «قازاقستان رەسپۋبليكاسىندا ونكولوگيالىق كومەكتى دامىتۋ» تاقىرىبىندا بايانداما جاسادى. ءوز سوزىندە ول رەفورمالاردىڭ ستراتەگيالىق باعىتتارىن، ەرتە دياگنوستيكا، دارى-دارمەكپەن قامتاماسىز ەتۋ جانە يننوۆاسيالىق تەحنولوگيالاردى، سونىڭ ىشىندە روبوتتاندىرىلعان حيرۋرگيا مەن يادرولىق مەديسينانى ەنگىزۋ سالاسىنداعى جەتىستىكتەردى تانىستىردى.
بىرلەسكەن باسىمدىقتار تۋرالى ديالوگتى جالعاستىرا وتىرىپ، ەكى ەلدىڭ دەنساۋلىق ساقتاۋ مينيسترلىكتەرى باسشىلىعىنىڭ قاتىسۋىمەن تاراپتار حيرۋرگيالىق ونكولوگيا، راديوتەراپيا، پاتومورفولوگيا جانە عىلىمي زەرتتەۋلەر سياقتى باعىتتارداعى سەرىكتەستىكتى كەڭەيتۋ بولاشاعىن تالقىلادى.
فورۋم قورىتىندىسى بويىنشا قازوجرعزي مەن وزبەكستاننىڭ رەسپۋبليكالىق مامانداندىرىلعان ونكولوگيا جانە راديولوگيا عىلىمي-تاجىريبەلىك مەديسينالىق ورتالىعى اراسىندا ىنتىماقتاستىق تۋرالى مەموراندۋمعا قول قويىلدى. قۇجات بىرلەسكەن عىلىمي جوبالاردى دامىتۋدى، تاعىلىمدامالار مەن وقىتۋ باعدارلامالارىن وتكىزۋدى، سونداي-اق ەكى ەلدىڭ ماماندارى اراسىندا تاجىريبە الماسۋدى كوزدەيدى.
ىنتىماقتاستىقتى كەڭەيتۋ
قازاقستاندىق ونكولوگتاردىڭ وزبەكستانداعى قازاقستاندىق مەديسينا كۇندەرىنە قاتىسۋى دەنساۋلىق ساقتاۋ سالاسىنداعى مەملەكەتارالىق قاتىناستاردى نىعايتۋداعى ماڭىزدى قادام بولدى. ەكى ەلدىڭ دارىگەرلەرى ونكولوگيالىق قىزمەتتى دامىتۋعا، مامانداردىڭ بىلىكتىلىگىن ارتتىرۋعا جانە قاتەرلى ىسىكتى دياگنوستيكالاۋ مەن ەمدەۋدىڭ وزىق تەحنولوگيالارىن ەنگىزۋگە باعىتتالعان جۇيەلى ىنتىماقتاستىقتى جالعاستىرۋعا دايىن ەكەندىكتەرىن ءبىلدىردى.
