بۇۇ-نىڭ شولەيتتەنۋگە قارسى كونۆەنسياسىنىڭ 16-شى تاراپتار كونفەرەنسياسى (COP16) 2024 جىلدىڭ 2-13 جەلتوقسانى ارالىعىندا ساۋد ارابياسى كورولدىگىنىڭ ەر-رياد قالاسىندا وتەدى.
ق ر اۋىل شارۋاشىلىعى مينيسترلىگى اتالعان ءىس-شاراعا جەر رەسۋرستارىن باسقارۋ كوميتەتىنىڭ ءتوراعاسى، شولەيتتەنۋگە قارسى كۇرەس جونىندەگى كونۆەنسيانىڭ ۇلتتىق ۇيلەستىرۋشىسى مۇرات تەمىرجانوۆتى ۇسىندى، دەپ حابارلايدى aqshamnews.kz اشم-عا سىلتەمە جاساپ.
كونفەرەنسيادا مۇرات تەمىرجانوۆ قازاقستاننىڭ جەر رەسۋرستارىن تۇراقتى باسقارۋ سالاسىنداعى تاجىريبەسى تۋرالى ايتتى. مينيسترلىك جانە جۇمىس سەسسيالارى شەڭبەرىندە جەردىڭ توزۋىنىڭ بەيتاراپ تەڭگەرىمى (جتبت) قاعيداتتارىن ەنگىزۋ، جەردى پايدالانۋ سالاسىنداعى ۇلتتىق ساياساتتى جەتىلدىرۋ جانە توزعان اۋماقتاردى قالپىنا كەلتىرۋ جونىندەگى حالىقارالىق مىندەتتەمەلەردى ورىنداۋ ماسەلەلەرى تالقىلاندى.
جەر رەسۋرستارىنىڭ جاي-كۇيىن مونيتورينگىلەۋ جانە ولاردى ءتيىمدى قالپىنا كەلتىرۋ ءۇشىن گەواقپاراتتىق جۇيەلەردى (گاج) جانە قاشىقتىقتان زوندتاۋ دەرەكتەرىن قوسا العاندا، وزىق تەحنولوگيالاردى پايدالانۋعا ەرەكشە نازار اۋدارىلدى. قازاقستان بۇۇ-نىڭ شولەيتتەنۋگە قارسى كۇرەس جونىندەگى كونۆەنسياسى اياسىنداعى حالىقارالىق ىنتىماقتاستىققا ءوزىنىڭ ادالدىعىن اتاپ ءوتىپ، تابىستى تاجىريبەلەرمەن بولىسۋگە دايىن ەكەندىگىن مالىمدەدى.
قازاقستاننىڭ COP16-عا قاتىسۋى حالىقارالىق ارىپتەستەرمەن ديالوگتى نىعايتۋعا، ۇلتتىق باستامالاردى ىلگەرىلەتۋگە جانە تۇراقتى جەر پايدالانۋ جانە كليماتتىڭ وزگەرۋىنە قارسى كۇرەس سالاسىندا جاھاندىق كۇن ءتارتىبىن قالىپتاستىرۋعا بىرەگەي مۇمكىندىك بەرەدى.