مالايزيا استاناسى كۋالا-لۋمپۋردا ح ازيا – تىنىق مۇحيتى ويىندارىنىڭ اشىلۋ سالتاناتى ءوتتى.
سپورتتىق جارىسقا الەمنىڭ 24 ەلىنەن 1300-گە جۋىق ەستۋ قابىلەتى زاقىمدالعان سپورتشىلار قاتىسىپ جاتىر. ولار سپورتتىڭ 10 تۇرىنەن، اتاپ ايتقاندا، جەڭىل اتلەتيكا، تاەكۆوندو، دزيۋدو، ەركىن جانە گرەك-ريم كۇرەسى، ۇستەل تەننيسى، بادمينتون، شاحمات، بوۋلينگ جانە فۋتبولدان ءوزارا مىقتىنى انىقتايدى، دەپ حابارلايدى aqshamnews.kz.
قازاقستان قۇراماسى ساپىنان بۇل جارىستا 80 سپورتشى ونەر كورسەتەدى. جەرلەستەرىمىز 8 سپورت تۇرىنەن سىنعا تۇسۋدە: جەڭىل اتلەتيكا، تاەكۆوندو، دزيۋدو، ەركىن كۇرەس، گرەك-ريم كۇرەسى، بادمينتون، شاحمات جانە ۇستەل تەننيسى.
«قازاقستان قۇراماسى ازيا – تىنىق مۇحيتى ويىندارىنا 1996 جىلدان بەرى قاتىسىپ كەلەدى. سپورتشىلارىمىز الماتى، قاراعاندى، شىمكەنت، ىستىقكول جانە بىشكەكتە وقۋ-جاتتىعۋ جيىندارىن وتكىزىپ، جارىسقا تىڭعىلىقتى دايىندىقپەن كەلدى. ەندى ولاردان جوعارى ناتيجە كۇتەمىز. سپورتشىلارىمىزدىڭ تابىستى ونەر كورسەتىپ، ەل نامىسىن لايىقتى قورعايتىنىنا سەنىمدىمىن»، – دەدى دەنە مۇمكىندىكتەرى شەكتەۋلى تۇلعالارعا ارنالعان سپورتتىق دايارلاۋ ورتالىعى سپورت باسقارماسىنىڭ باسشىسى قايراتبەك سەيتبەكوۆ.
العاشقى كۇننىڭ جەڭىمپازدارى
قازاقستاندىق سپورتشىلار جارىستىڭ العاشقى كۇنىندە-اق جەڭىس تۇعىرىنان كورىندى. شاحماتتىڭ بليس تۇرىنەن:
• ايەلدەر اراسىندا بالجان جۇماعازييەۆا 8 ۇپاي جيناپ، ازيا – تىنىق مۇحيتى ويىندارىنىڭ چەمپيونى اتاندى.
• ەرلەر اراسىندا ساماجان كەتتەبەكوۆ 8،5 ۇپاي جيناپ، كۇمىس مەدال الدى.
ازيا – تىنىق مۇحيتى ويىندارى 8 جەلتوقسانعا دەيىن جالعاسادى.