بۇدان بۇرىن ىشكى ىستەر ءمينيسترى ەرلان تۇرعىمبايەۆتىڭ قىزمەتىنەن بوساتىلعانىن حابارلاعانبىز.
مارات احمەتجانوۆ بۇعان دەيىن سىبايلاس جەمقورلىققا قارسى اگەنتتىكتىڭ باسشىسى قىزمەتىن اتقارعان، دەپ حابارلايدى Almaty-akshamy.kz
«مارات مۇرات ۇلى احمەتجانوۆ قازاقستان رەسپۋبليكاسىنىڭ ىشكى ىستەر ءمينيسترى بولىپ تاعايىندالسىن، ول قازاقستان رەسپۋبليكاسىنىڭ سىبايلاس جەمقورلىققا قارسى ءىس-قيمىل اگەنتتىگىنىڭ (سىبايلاس جەمقورلىققا قارسى قىزمەتتىڭ) ءتوراعاسى لاۋازىمىنان بوساتىلسىن»، - دەپ جازىلعان ق ر پرەزيدەنتى قول قويعان جارلىقتا.
احمەتجانوۆ مارات مۇرات ۇلى 1964 جىلى 22 جەلتوقساندا دۇنيەگە كەلگەن.1991 جىلى بۋكەتوۆ اتىنداعى قاراعاندى مەملەكەتتىك ۋنيۆەرسيتەتىن بىتىرگەن، زاڭگەر.
ەڭبەك جولىن 1991 جىلى تاعىلىمگەر قىزمەتىنەن باستاپ، كەيىن تەمىرتاۋ قالاسى پروكۋراتۋراسىنىڭ تەرگەۋشىسى بولىپ قىزمەت اتقارعان.
1993-1996 جىلدارى باس پروكۋراتۋرا جانىنداعى سىبايلاس جەمقورلىققا قارسى كۇرەس جونىندەگى ارنايى پروكۋراتۋرانىڭ اسا ماڭىزدى ىستەر جونىندەگى اعا تەرگەۋشىسى، باس پروكۋراتۋرانىڭ اسا ءقاۋىپتى قىلمىستاردى تەرگەۋ باسقارماسى ايماقتىق تەرگەۋشىلەر ءبولىمىنىڭ باستىعى بولدى.
1996-1997 جىلدارى مەملەكەتتىك تەرگەۋ كوميتەتىنىڭ اسا ءقاۋىپتى قىلمىستاردى تەرگەۋ باسقارماسىنىڭ ءبولىم باستىعى، مەملەكەتتىك تەرگەۋ كوميتەتىنىڭ اسكەري-تەرگەۋ دەپارتامەنتى تەرگەۋ باسقارماسىنىڭ باستىعى بولعان.
1997-1998 جىلدارى - ىشكى ىستەر مينيسترلىگىنىڭ اسكەري-تەرگەۋ دەپارتامەنتى تەرگەۋ باسقارماسىنىڭ باستىعى.
1998-2001 جىلدارى تەرگەۋ دەپارتامەنتى ديرەكتورىنىڭ ورىنباسارى جانە ادىلەت مينيسترلىگىنىڭ سوت قاۋلىلارىن ورىنداۋ كوميتەتى ءتوراعاسىنىڭ ورىنباسارى قىزمەتىن اتقاردى.
2001-2003 جىلدارى باس پروكۋراتۋرانىڭ تەرگەۋ جانە انىقتاۋ ورگاندارىنداعى زاڭدىلىقتى قاداعالاۋ دەپارتامەنتىنىڭ باستىعى بولعان.
2003-2006 جىلدارى – پاۆلودار وبلىسىنىڭ پروكۋرورى.
2006-2009 جىلدارى – وڭتۇستىك قازاقستان وبلىسىنىڭ پروكۋرورى.
2009-2012 جىلدارى – باس پروكۋراتۋرانىڭ قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتىنىڭ ءتوراعاسى.
2012-2014 جىلدارى –ەكونوميكالىق قىلمىسقا جانە سىبايلاس جەمقورلىققا قارسى كۇرەس اگەنتتىگى ءتوراعاسىنىڭ ورىنباسارى.
2014-2016 جىلدارى – اتىراۋ وبلىسى مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل دەپارتامەنتىنىڭ باسشىسى، اتىراۋ وبلىسى سىبايلاس جەمقورلىققا قارسى ءىس-قيمىل ۇلتتىق بيۋرو دەپارتامەنتىنىڭ باسشىسى.
2016-2021 جىلدارى – قازاقستان رەسپۋبليكاسى باس پروكۋرورىنىڭ ورىنباسارى.
2021 جىلدىڭ 16 ساۋىرىنەن باستاپ سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى بولعان.