بۇل شەشىم گيدرومەتەورولوگيالىق جاعدايعا جانە ەل اۋماعىنداعى سۋقويمالاردىڭ مۇزدان تولىقتاي تازارتىلۋىنا بايلانىستى قابىلداندى
وسى رەتتە كولىك مينيسترلىگى تەمىرجول جانە سۋ كولىگى كوميتەتىنە قاراستى «قازاقستان سۋ جولدارى» رمقك جۇك كەمەلەرىنىڭ قوزعالىسى باستالاتىنى تۋرالى مالىمدەيدى، Almaty-akshamy.kz كولىك مينيسترلىگىنە سىلتەمە جاساپ.
وسىلايشا، جوعارعى ەرتىس سۋ باسسەينىندە كەمەلەر 1 مامىردان باستاپ جۇرە باستاسا، سەمەي فيليالىندا 25 ساۋىردەن باستاپ، پاۆلودار فيليالىندا 23 ساۋىردەن، ورال-كاسپيي سۋ باسسەينىندە 1 ساۋىردەن، ىلە-بالقاش سۋ باسسەينىندە 1 ساۋىردەن جانە «گيدروتەحنيكالىق قۇرىلىستار» فيليالىندا 5 مامىردان باستاپ قوزعالىس باستالىپ كەتتى.
ءوز كەزەگىندە «قازاقستان سۋ جولدارى» رمقك وتاندىق كەمەلەردىڭ ءقاۋىپسىز ءجۇزۋىن قامتاماسىز ەتۋ ماقساتىندا ءتيىستى جۇمىستاردى جۇرگىزدى. اتاپ ايتقاندا، 1855 قالقىمالى جانە 771 جاعالاۋداعى ناۆيگاسيالىق بەلگى ورناتىلدى.
ەلىمىزدەگى جالپى پايدالانۋداعى سۋ جولدارىنىڭ ۇزىندىعى 2104 شاقىرىمدى قۇرايدى. قازاقستان بويىنشا بارلىعى 795 وزەن كولىگى جانە 19 مىڭ شاعىن كولەمدى كەمە تىركەلگەن.
ايتا كەتەرلىگى، سۋ وبەكتىلەرىندەگى ناۆيگاسيالىق كەزەڭ – بۇل گيدرولوگيالىق جاعدايلاردى ەسكەرە كەلە، سۋ جولدارىنىڭ مۇزدان تولىق تازارتىلۋى ءارى سۋقويمالاردى قوزعالىس ءۇشىن پايدالانۋعا بولاتىن ۋاقىت ارالىعى. سۋ كولىگىندەگى ناۆيگاسيالىق كەزەڭ تابيعي-كليماتتىق جاعدايلارعا جانە سۋ جولدارىنىڭ گيدرولوگيالىق رەجيمىمەن تىعىز بايلانىستى.