بۇل كورسەتكىش بولجامدارعا سايكەس كەلەدى.
2022 جىلدىڭ توعىز ايىندا ءىجو ءوسىمى 2،8%-دى قۇرادى. بۇل تۋرالى ۇلتتىق بانك ءتوراعاسى عالىمجان ءپىرماتوۆ باسپا ءسوز ءماسليحاتىندا مالىمدەدى، دەپ حابارلايدى Almaty-akshamy.kz Egemen.kz سىلتەمە جاساپ.
ۇلتتىق بانك جەتەكشىسىنىڭ ايتۋىنشا، بۇل كورسەتكىش بولجامدارعا سايكەس كەلەدى.
«ىسكەرلىك بەلسەندىلىكتىڭ باياۋلاۋى نەگىزىنەن تاۋ-كەن ونەركاسىبىندەگى ءالسىز ديناميكا ەسەبىنەن جۇرەدى. بۇل ەلىمىزدىڭ نەگىزگى كەن ورىندارىندا جوندەۋ جانە قاشاعان زاۋىتىنداعى اپاتقا بايلانىستى. وڭدەۋ ونەركاسىبى، ساۋدا، اقپارات جانە بايلانىس، كولىك جانە اۋىل شارۋاشىلىعى وڭ ۇلەس قوسۋدا»، - دەپ ءتۇسىندىردى عالىمجان ءپىرماتوۆ.
سونىمەن قاتار ول ەكونوميكانىڭ دامۋ ديناميكاسىنىڭ بولجامداردان اۋىتقۋىنىڭ ايقىن تەندەنسياسى بايقالمايتىنىن اتاپ ءوتتى.
«ءىجو ءوسىمى قالىپتاسقان باعا كونيۋنكتۋراسى جانە جىل سوڭىنا قاراي مۇناي ءوندىرىسىنىڭ ءوسۋ قارقىنىن قالپىنا كەلتىرۋ اياسىندا ىشكى سۇرانىس پەن ناقتى ەكسپورتتىڭ وڭ تراەكتورياسىمەن قامتاماسىز ەتىلەدى. بۇل رەتتە قازاقستان ەكونوميكاسىنىڭ تۇراقتى دامۋى ءۇشىن تاۋەكەلدەر ءوسىپ كەلە جاتقان ينفلياسيالىق پروسەستەر جازىقتىعىندا جاتىر»، - دەپ تولىقتىردى عالىمجان ءپىرماتوۆ.